بقلم : سمية هندوسة يا حُرقة حشا الاُمات ولادِن في زنازينك و يا حسرة رويحة المات و كاتلو طليق علي دينك ويا وجعة وطن مغبون صِبح ضايع علي يمينك بيًنده في عشا البايتات تعال خلصني سد دينك. دحين يا ناس ده اسمه كلام ؟ !!! وطنا يضيع شبابنا يموت آونطة يفوت حكومة تبريء القاتل قضاء ظالم نظام فاشل وطن ممكون بخارج الروح شباب ينجح فشل (عاطل) و مُتصبر و مُتحزم و مُتفائل بِيحلٓم بي وطن واحد وطن للشعب كُل الشعب لا طارد ولاهو ضنين ولا قاتل وطن لا فيهو جنسك ايه و حسب عِرقك يجي التصنيف وطن وافي ووطن عادل . بِنحلم نحنا بالتغيير و نعدِل حالك المائل و نبنيك بي تُراب الحب و طين الألفة و العزة نصيغ دستور لاجل الكل نعيدا كتابة التاريخ نحاكم كل من ظلمك و كل من باع شرف عزّة ولا مهتم ولا سائل . كأنه الدنيا مهدية و كأننا في زمن سيدي خدم و عبيد لجهدية . بنحلم نحنا بالثورة و نعيش الدنيا حرية أكيد من حقنا الأحلام بتتحول الي واقع و تتحقق مع الأيام بفعل بسيط و ناس صادقة شُجاعة .. قوية.. دُغرية تطلع للشوارع فوج تهتف عٓدل.. حُرية و تقول للشهدا الفِ سلام عشانكُم نعقِد النّية يا محمد صلاح و التاج و كل سجين رفض للظلم انت وقودنا للثورة نعاهدكُم نكُون راكزين مرقنا عشان نسِد الدين نموت واقفين و ما راكعين و تبقي الفينا محرية نجيب للشهداء مٓهَر الروح و للنازحين نداوي جروح عشان أطفالنا تلقي وطن تعال لاقينا في الشارع تعال اهتف عشان اهلك عشان حقك و أطفالك تعال قاوم و ماتساوم واهتف العن الظالم ابكي و نوح علي حالنا وطن ضائع شباب عاجز شعب جائع بلد مبيوع رئيس بايع حرب دوارة بالسنوات إبادة شعب بالميات حكومة بتسرق الثروات و امن بيحصد الأرواح قمع .. تعذيب .. يسفر عالم الأموات . لا تعليم و لا صحة لا تقييم ولا خدمات بنصرف نحنا من جيبنا علي قاتلنا بالرصاص و بالصاروخ و بالدانات بعد باع البلد للغير و خلص فيها كل الخير بيحارب الناس في أكل العيش ست الكسرة ست الشاي سيد الموية كونو بخير طواقي،، فريشة،، درداقات. دحين يا ناس ده اسمه كلام ؟!!! ساكتين نحنا عاد لمتين ؟ يا حُرقة حشا الاُمْات و يا حسرة وطن عايش و شعباً مات اطلع حطم الأغلال و أكسر حاجز الازلال تعال لاقينا في الشارع عشان اهلك و أطفالك عشان فعلاً كفانا سُكات.
