عصيان كفانا جمود ساكتين علي الحاصل و الصبر ليهو حدود عصيان لاجل الشعب و مستقبلوا الموءود عصيان عشان بكرة نلقي الوطن مسنود سودانا يا غالي يا الفيكا آمالي حنحقق المنشود و نبنيكا وطنا حلم بي كُلِ اطيافنا ما فينا زول مفقود أعلنا عصيّانّا و حنحقق أهدافنا و بالروح فداكا نجود يا شعبي يا باسل يا كامل الهيبة يا حلمنا الموعود انت العليك الحِلم و القدلة بي عزة يا شعب ضاق المُر و صابر صبر أيوب حامل معاناتك و راهنت بالموجود طلعن بنياتك و اصطف كل الشعب و أعلنا لا للصمت لابد من عصيان لابد من ثورة تمسح أسي الطغيان ينهد عرش السوس و نبنيكا يا سودان يا أغلي بقع الكون يا اروع الأوطان . يا اخوي و يا اختي خالي يا عمي يا بتي يا أمي ما تكسروا العصيان و ما تخذلوا السودان سودانا جد منكوب و أطرافوا مشتعلة أطفالنا بتعاني جوعا و تشريدا لا امن لا صحة و كل البقول الحق ودوه في خبر كان الفكرة في العصيان شان ننقذ السودان من أخطبوط الجهل و قبضة تجار الدين القسموا السودان و باعوه بالمجان و فصلونا حسب العرق و السحنة و الألوان . و هم أصبحوا المُِلاك و نحنا الرقيق و اماة ما هابوا حكمتنا و العزة في عروقنا و دم الأسود السود الراوي جيناتنا سامحنا يا سودان سنوات خذلناكا و قبلنا كل ألكان و الليلة يا والد كل الشباب و الشيب نازل علي الميدان حنجيب مهر فجرك و خلاصنا بالعصيان و بي ثورة سلمية في كل ربوعنا نهب نفديكا يا وطني يا اروع الأوطان . عشقك ملأنا حماس زلزل جدار الخوف لا رجعة لا استسلام يختانا اي جبان طالعين و ما راجعين يا نحرر أرواحنا يا نموت فداء السودان
