شاعت فى وسائل التواصل الاجتماعى سخرية واسعة من احتفاء نظام المؤتمر الوطنى برفع العقوبات الامريكية التنفيذية . وتورد (حريات) أدناه نماذج لهذه المداخلات الساخرة التى تعكس عبقرية الشعب السودانى ، وتعتذر للمبدعين الذين صاغوها من ايراد اسمائهم ، لأن غالب هذه المدخلات منشورة على الواتساب بدون ايراد المصدر الاصلى أو اسمائهم ، ومن الصعب تقصى هذه المعلومات. ……………………. *( بمناسبة رفع الحظر . قالوا ايام على دينار قبضوا حرامى سارق (كيلتين) بصل. اها على دينار قال ليهو يا تأكل البصل يا تتجلد مية جلدة يا تدفع مية دينار قال باكل البصل من رابع بصلة حالتو بقت حالة. قال بتجلد من الجلدة العشرين جسمو اتملا دم. دفع المية دينار واتخارج. أسى يا الكيزان لزوم اكل البصل والجلد عشرين سنة فوق كم؟؟؟؟؟ من الاول كان تنبطحوا وتنسوا الشعارات). *(واحد سألوه عن أثر رفع العقوبات عن السودان قال : فى رأى زى رفع فراش الماتم ..لو رفعوهو أو تركوه الميت ما بيرجع تانى). *(الحظر اترفع ليه ساعة وربع وبرضو اتعشينا بفول لسة ما في اي تغيير). *(انتهاجاً لمبدأ المعاملة بالمثل السودان يرفع اسم أمريكا من قائمة الدول التي دنا عذابها). *(يا جماعة … لو أمريكا رضت علينا معناها نحن فارقنا الشريعة والدين). عمرالبشير1997. أقوال ماسورة ( الخطأ فى الثاء مقصود ). * (عاجل جدا قرار جمهوري بمناسبة رفع العقوبات عن السودان ، اعتبارا من تاريخه قررنا تغيير إسم فتة الفول ، من بوش إلى ترامب). *(دايما زمان في كل شله بيكون تلاته اربعه شباب( بيسفو ) وواحد منهم بس بيسف علني.. نسميهم افتراضا *"عمر وابراهيم وبكري وترامب"*. المهم ترامب دا بيكون بيسف علني والباقين بالدس. تقوم ام عمر تلقى ليها كيس تمباك تحت فراش عمر وتسألو بحزم: عمر انت بتسف؟ يرد: لا لا يا حاجه دا كيس ترامب. وام ابراهيم تلقى سفه مجدوعه تحت سرير ابراهيم وتسألو: دا شنو يا ولد انت بتسف؟ ويرد : معقوله يا امي دا ترامب امس كان قاعد معاي. وابو بكري يجي الصالون يلقى كيس جمب التلفزيون يسأل: دا شنو ي بكري؟ يرد بكري: دا كيس ترامب نساهو هنا امس. فجأه وبعد محاولات متتاليه ترامب ربنا هداهو وبطل يسف. هنا الامور جاطت.. بقو عمر وابراهيم وبكري قدام خيارين: يا يبطلو يسفو، او يسفو علني. The End # المهم نرجع لموضوع رفع الحظر. من وعينا ف الدنيا دي (life time ago) بنسأل: البلد اقتصادها متدهور كدا ليه؟ ترد الحكومه: البلد عليها عقوبات ومحظوره اقتصاديا.. ( دا كيس ترامب ). نسأل: ليه مشاريعنا بتفشل وم بتنمي البلد؟ ترد الحكومه: البلد عليها عقوبات ومحظوره اقتصاديا..( دا كيس ترامب ). ليه الاسعار في ارتفاع دائم والشعب م قادر يعيش. وبرضوو الرد: البلد عليها عقوبات ومحظوره اقتصاديا.. ( دا كيس ترامب). وتسمر الاسئله: الحرب، الخريجين، الاجراءات الحكوميه العقيمه، تهميش الولايات …. الخ. ويظل الرد: البلد عليها عقوبات ومحظوره اقتصاديا.. (داااا كييييس تراااامب ). # لغايه امس حصل انو *ترامب ربنا هداهو وبطل يسف.. اقصد رفع الحظر والعقوبات*. بقى عند الحكومه نفس الخيارين القبيل: # الاول *يااا تصلح البلد وتثبت (زوال الأثر بزوال المؤثر) يعني ( تبطل تسف هي برضو وتثبت انو دا كيس ترامب )..* # الثاني *أو تواصل ف الحال دا وتكون انكشفت ( يعني تسف علني )*).
