كان الاعتقال من أمام مسجد ود نوباوي يوم 13 /7 بعد صلاة جمعة الكنداكة من أمام الحشد، تم ضربي في العربة، وصلنا بعد 40 دقيقة السياسية، هسي تمام ادوني حبوب كتيرة ومضادات، وصلنا السياسية (يقصد إدارة الأمن السياسي ببحري) بعد حوالي 40 دقيقة ولمن وصلت كبروا وهللوا، قلت ليهم كضابين بتعرفوا الله من وين ؟ عدد الجلادين كتير في البداية كانوا 7 بعدها جاء واحد قال ليهم ده رأس الحية ذاتو بعد داك حسيت انه السياسية كلها بتضرب فيني، بعد ساعة كده دخلوني غرفة في شكل مكتب واساءات والليلة نسوي لك ونعمل لك ، جوه الغرفة قالوا لي اقعد في السرير ، قعدت ، قالوا لي ارقد علي بطنك ، اضاربت معاهم ، العميد قال ليهم : دقوه في صلبوا عشان يمشي يتصور بيهو، المهم بعد ساعة جاء واحد اسمه خضر قال لي: أنا كايس ليك لي زمن ، ضربني كف ورديتو ليهو تاني ضربوني بعدها جاء واحد قال ليهم اوع تضربوه شكله ضابط كبير وبدأ التحري : اسمك، سكنك… الخ ، التحري طول ، المهم أنكرت علاقتي بالاحزاب السياسية والمجموعات لحدي ما جاني واحد قال لي: انت كنت جبهة ديمقراطية وشيوعي وكنت غواصة في البعثيين ، المهم التحقيق طويل ، ودوني الجامع صليت ولقيت بكري عمر برضو كان قابضنو ، رجعوني ، واحد اتساخف قال لي : انتو مقضينها صعلكة وشراب عرقي و(….) بنات وكفار، قلت ليهو ياخ اختشي البنات ديل اخواتنا ، قال لي : اخواتكم ديل (….)، اضاربنا ومنها ودوني مستشفي الأمل واعتذروا لي، رجعوني ضباط كويسين غايتو اتظارفوا معاي، رجعت بيّتَ في السياسية تاني يوم اتحروا معاي تاني ودوني بعد المغرب لي ادارة التحفظ (تلاجة الموز: مبنى خاص بالأمن مبني بتصميم خاص) غرب السياسية لقيت بكري العجمي وعمار نصر الدين و3 شعبيين قعدنا في غرفة تلاتة في تلاتة بي حمام ومكيفة، جوني بعد اسبوع رجعوني لتحقيق في الطابق التاني في السياسية اتحروا معاي لفترة طويلة وكنت متذكر الكلام القلتو المرة الفاتت ، علاقتك بالاحزاب ، علاقتك بالتجمعات الشبابية قلت ليهم انا مستقل وغير ناشط ، بتسكر ؟ لا ، بنقو ؟ لا ، بنات ؟ لا . علاقتك بالمنظمات ؟ ما عندي علاقة . المراكز زي الخاتم عدلان ؟ ما قعد امشي . طيب نحن قررنا نطلعك الليلة بس تتعاون معانا وعارفنك انت زول ضكران وأخو بنات اتنين وانت ولد واحد وابوك عيان نوظفك ونلحقك دفعتك في الكلية الحربية هم نقباء هسه ونقريك دراسات عليا رأيك شنو قلت ليهم ياخ أنا اسير والاسير لا يفاوض اذا وافقت احتمال اطلع برة واقول لا ، نتلاقي برة ونتفاوض.. رجعوني تاني الزنزانة ادارة التحفظ ، طلعوني ودوني كوبر زيارة من ناس البيت أختي شاكلتهم ، انتهت الزيارة رجعنا ادارة التحفظ الزنزانة وما شفت النور الا اول امس ودونا كوبر سلمونا اماناتنا موبايلي ومفاتيحي وقروشي، لاقيت ساطع الحاج وبوشي ومحمد ضياء وشعبيين ومنتصر الاهلية وناس كتار.
