عاصم بابكر ………… يا ناس يا ضو ………… فارشين في الروح ………… تبروقه حنين ………… جاردين الحب بي سبحة شوق ساقيين جواي ملطم للخير قدحي المكسور معدول بي طينكم ياطينة أصيلة وساقيها النيل ياريحة شارع وزقاق ومزارع يابيوت جالوص يامدرسة إنتو مقرر ريدة ولوحة وصفحة جديدة ياااااا ضوكم وأنا لسة رايح في العشم في الضو وفي الناس الخُدر لااااااااا حولتن عند المساء والناس تغازل في الورود تتنفسة ياااااااا شهقة الضحك المرق على باب السما والقريفة ما فارق الدرب القسا لكن بنتقاطر عِنِاد ونوشوش أضان الريد غُنا وياااااااا بعضنا وياااااااا كلنا ويانحنا كنا مشينا وين ؟ مشوار سماح في الروح هِنا ؟ ولا نحن مرقنا كيف ؟ ياكيف … بخورك إنطلق مطلوق ولحااااق للبعيد لاتعريفة لاقرشاً يسوق وبرضو لحاق يا إنتو نحن كنا مشينا وين ؟ ولا هي المحطات الوصول ؟ الكل وصول للمدرسة والخلوة واللوح القديم والضحكة والحلم العشم وبنية بي مشاطة مسرحة وشايلة كراس الدخول للحصة والدرس إنتباه … الدرس الأول : قالو نفتح صفحة ونكتب فووووق بي خط واضح محسوس ملموس عنوان الدرس وبين قوسين الحصة الأولى قالو الدرس إسمو الحُب الحُب الصاح من روح لي روح حُب الأرواح الديمة مباح والمغزى شنو ؟ شان نقدر نمشي ما السكة طويلة ومحتاجة الزاد والزاد في الروح الزاد إحساس إصرار و عزيمة ونِية سليمة … الدرس التاني : شطف قدم حزنك .. صباح إغتسل من السواد .. جواك إتوضا بي دمع .. الحنين وقالد الناس .. النضاف ما الضو بعادي …الدرس التالت : (لسة بتعلم فيهو ) …. ياااااااا بكرة نحن كنا مشينا وين ؟ يابكرة جايينك دَغَش