وان طال السفر محمد عبدالماجد صفارة ابوشيبة . بيني وبين مامون ابوشيبة الكثير من الود ..والمحبة ..وكتابتنا عنه هذه الايام ربما بغلظة نرجو ألا تفسد ما بيننا من ود. . واعترف ان متابعة كتابات الزملاء والرد عليها او التعليق امر غير لائق (صحفيا) ..لكني مع ذلك افعل ..واعتذر مقدما للاستاذ مامون ابوشيبة فهو عندنا محل تقدير ..وكل شخص حر فيما يكتبه ..وله ان يطرح اراءه بالصورة التى يريد. . و… . (اقول حاجة تانية). . تركيز مامون ابوشيبة على (الحكام)…جعلنا نطالب منه ان يسمى عموده (الامبراطور) تزامنا مع فقرة فيصل سيحة في التلفزيون القومي في برنامج (عالم الرياضة). . وان لم يفعل ذلك فعلي مامون ابوشيبة رئيس تحرير الغراء (الصدي) ان يشيل (الكرسي) حقو ويمشي يحلل مع فيصل سيحة ..عشان يطلعوا كل الاهداف التى يسجلها الهلال (تسلل). . ولكي يأكدوا ان كل الاهداف التى يسجلها المريخ (صحيحة)..وان كل الاهداف التى جاءت من تسلل واضح للمريخ …نقضها الحكم بغير وجه حق. . و… . (نقضها ليه؟). . وان اي مباراة للمريخ فيها (5) ضربات جزاء لم يحتسبها الحكم لصالح المريخ..وفي نفس الوقت اي ضربة جزاء احتسبت للهلال غير صحيحة. . لو كسرتوا رقبتكم غير صحيحة. . مامون ابوشيبة مازال (معلق) في ضربة جزاء (وهمية) للمريخ لم يحتسبها الحكم امام الهلال سنة 1996. . الكاتل ليه زول ..الكاتل ليه رقبة عديل كدا يا ابوشيبة سنة 1996م بكون الناس نسوه. . والدم عفوه. . ابوشيبة بتحدث عن ضربة جزاء (وهمية) ارتكبها احمد النور الذي اصبح الان (مدربا). . الطريف ان الشخص الذي ارتكبت معه ضربة الجزاء هو ذاتو اصبح مدربا وهو الكوتش عبدالمجيد جعفر. . لو جبنا عبدالمجيد جعفر ..اكيد بكون ما متذكر حاجة في الموضوع دا. . عبدالمجيد جعفر اهدافو الصحيحة نساها…عاوزنو يتذكر ليكم ضربة جزاء وهمية. . لو تعاملنا بنفس المنطق الذي يتعامل به ابوشيبة سوف نقول ان كندورة سجل هدفا صحيحا في المريخ ..الحكم لم يحتسبه. . وسجل قبل ذلك عبده الشيخ هدفا صحيحا في المريخ ..الحكم لم يحتسبه. . وسجل وليم هدفا في المريخ صحيحا ..الحكم لم يحتسبه. . واحتسب الحكم ضربة جزاء صحيحة مية المية للهلال امام المريخ زيكو شال الكورة وفات. . ولم يعد حتى الان. . يعني يا ابوشيبة عندنا ضربة جزاء ثابتة (شرعيا) ..ومسجلة في الشريط ..والحكم احتسبها ..مع ذلك الى الان لم ننفذها. . وابوشيبة بتحدث عن ضربة جزاء (وهمية) ..لم تحتسب في الاساس. . علما ان كل هذه الوقائع التى عرضتها مثبتة ..ومعترف بصحتها حتى من قبل الحكام الذين نقضوها. . و.. . (نرجع للنقطة الاولى). . سيحة وابوشيبة في اي مباراة يحللوها (تحكيميا) للهلال ..ممكن يقولوا لينا الحكم مفروض يطرد سيف الدين مساوي..والمعز محجوب (كترها). . واي كرت يناله لاعب في المريخ اصفر او احمر ..هو غير صحيح. . مامون ابوشيبة امس في عموده (صفارة في الساحة)..اقصد (قلم في الساحة) جمّل حكم مباراة الهلال والاهلي شندي ..ودافع عنه ..واعتبره حكم جيد ..عشان نقض هدفين للهلال. . ابوشيبة كتب عن ذلك الحكم (الكارثة) : ( علمت ان حكم كوستي محمد بلال كركة ، الذي ادار لقاء الهلال واهلي شندي ، يعيش حالة نفسية سيئة بعد العقوبة التى اوقعتها عليه لجنة التحكيم المركزية بايقافه لثلاثة اشهر). . اذا كانت اللجنة اعترفت بذنب هذا الحكم وبالاخطاء التى ارتكبها في مباراة الهلال والاهلي شندي ..انت يا ابوشيبة بتدافع عنه ليه؟. . وإلّا اي حكم يظلم الهلال ويحرمه من اهداف صحيحة ..هو حكم ممتاز ..ومظلوم. . الطريف في الامر ان مامون ابوشيبة قال ان الحكم يعيش حالة نفسية سيئة. . لا بالله. . الفيلم الهندي دا شنو؟. . الفيلم العاطفي دا جبتوه من وين؟. . ليه حق بلة جابر يقعد يبكي ..اذا كنتوا ان بتكتبوا ليه الكلام (المؤثر) دا. . بعدين الهلال سرو باتع ..اي حكم بظلمو بعيش في حالة نفسية سيئة ..وقد دخل المغربي (لارش) في حالة نفسية سيئة جدا عندما نقض للهلال هدف صحيح امام الاهلي المصري في نهائي بطولة الاندية الافريقية للابطال بالقاهرة. . ابوشيبة نكر ظلم هذا الحكم للهلال …وكتب عنه بصورة مجافية للواقع : ( محمد بلال حكم جيد وطموح ومرشح لنيل الشارة الدولية ..ولكن يبدو انه لن ينال هذه الشارة فمن سوء حظه خسر الهلال امام الاهلي شندي). . والله العظيم مامون ابوشيبة بقدم اكبر خدمة للهلال …ابوشيبة قال ان الحكم لن ينال الشارة الدولية عشان الهلال خسر امام الاهلي شندي. . وهذا اعتراف جميل ..بس فقط نصحح كلام ابوشيبة ونقول ان اي حكم (يظلم) الهلال لن ينال الشارة الدولية ..خسر الهلال او لم يخسر. . خسارة الهلال امام الاهلي شندي كانت بسبب هذا الحكم محمد بلال كركة والذي يعيش في حالة نفسية سيئة كما قال ابوشيبة عشان نقض للهلال هدفين ما فيهما اي كلام. . حكم بهذا السوء ..عاوزين تمنحوه الشارة الدولية ..لو حكم هذا الحكم مباريات افريقية بهذا المستوى لحدثت كارثة. . ما تقولوا ان الاهداف المنقوضة سببها حكم الرأية ..مثل هذه الحالات واضحة وظاهرة وما عاوزة ليها حتى حكام خطوط. . خيتافي امس الاول سجل هدفا صحيحا (نقضه) حكم الرأية مع ذلك احتسبه حكم المباراة. . ابوشيبة بدافع عن حكم نقض هدفين للهلال ..وبهاجم حكم مباراة الامل والمريخ لأنه فقط احتسب زمن بدل ضائع للمباراة (8) دقائق. . و… . (حاجة صغيرة كدا). . اي تعثر للمريخ اليوم يعني ان ابوشيبة سوف ينزل (هجوم) في حكم المباراة وان كنت اراهن منذ الان ان المريخ سوف يمنح اليوم (ضربة جزاء). . لكن برضو يا ابوشيبة ما بتطلعوا من (النقعة). . النقعة دي الخروج منها ب (نقطة) مكسب. . ركزوا على النقطة..عشان شكلكم الليلة تتغلبوا عديل كدا. . و… . (حاجة اخيرة). . يا سيحة ..نحن في انتظار (المستندات) التى هددت بنشرها ..يلا البرنامج وقف ..ورينا (المستندات). . و…. . (اخر حاجة). . بدلا من ان تقولوا ب (قلم) مامون ابوشيبة قولوا ب (صفارة) مامون ابوشيبة. . و…. . انتوا في (كركبة). . دا شنو دا. . انا لخبطت وإلّا شنو؟. . احسن ارجع. . او … . احسن اقيف عديل هنا. . انتهى.
