…و… محمد عبدالماجد المريخ في المجموعات عاوز يشارك بالاستضافة!! . …و . فريق المصري البورسعيدي …المهدد بالهبوط من الدوري المصري الممتاز – اعتذر عن المشاركة في بطولة سيكافا. . قالوا ما عاوزين. . لقى الحكاية ما بتغطي ..ولا جايبه حقها …(خسارة تذاكر) ساكت. . و… . (امشوا افحصوا الملاريا احسن ليكم). . فريق المقاولون العرب رغم انه سوف يدخل في اجازة طويلة – ايضا اعتذر عن المشاركة في بطولة سيكافا. . قال ما عاوزين.
. الناس ديل ما بجاملوا ولا مستعدين يفقدوا ليهم لاعب بسبب الاصابة في مباريات سيكافا التى لا قيمة لها. . سيكافا دي زي ملاح (ام شعيفة) ما فيه اي فائدة غذائية. . بطولة سيكافا حق الشاي ما بتجيبو…رغم انهم هذه المرة حاولوا يدلعوا بطولة سيكافا ويخففوا على جماهير المريخ شوية..قاموا اطلقوا على البطولة من باب الدلع (دورة حوض النيل). . عشان الهلالاب ما ينقشوا الحكاية. . حوض النيل بتاعة مين؟. . عشان بس يخموا المصريين …اصلو المصريين الايامات دي عندهم هوس من سد (النهضة). . عندهم فوبيا من (النيل). . لذلك غلف المريخاب بطولة سيكافا هذه المرة باسم دورة حوض النيل. . الجماعة ديل خجلانين من الاسم. . و… . (في نظرية هنا). . حوض النيل – حوض البحر الاحمر – حوض الحمام ..كلو ما بنريحكم. . لو سميتوها دورة (بوليوود) ..ما ح نسيبكم. . ح نبقى ليكم في رقبتكم. . رغم ان الاخوان مزمل ابوالقاسم ومامون ابوشيبة ..اعترفوا بقوة الهلال واشادوا به اخيرا…وحاولوا يصلحوا الحكاية شوية. . عرفوا ليك الهلال ما بتصاقع. . قالوا نفتح صفحة جديدة. . بل ان مامون ابوشيبة رشح الهلال للفوز بالبطولة وقال انه من اقوى فرق البطولة في عمود كتبه تحت عنوان ( تاني لبنت يا هلالاب). . خلاص انجهونا. . يا ابوشيبة انت بالذات ..اول حاجة تعترف بهدف نزار حامد ..(وما تقعد تغالطنا فيه). . وتعترف بهدف (بشه). . بعد كدا ممكن نقبل كلامك. . المريخاب ديل ممكن يطيروا علينا البطولة مع السبق الاصرار والترصد وما زيارة اتوفيستر لمعسكر فريق مازمبي إلّا من اجل ذلك. . الله يشوفنا من المريخاب. . الواحد بقى خائف على نزار حامد (ربنا يحفظو)..ويحميه. . المصريين ديل عينهم زي (الفرن). . تكسر الحجر. . محمد احمد بشه كان زي (الطلقة)..المريخاب شبكونا هدفو تسلل – هدفو تسلل – هدفو تسلل ..لمن وقع بشه براهو كدا واتصاب. . من غير ما يهبشو زول. . وسيف مساوي ..بدون اي مناسبة …احد لاعبي مازمبي اصطدم به من الخلف ، واصابه في رأسه ..ليضرب ارض ملعب الخرطوم الصلبة على رأسه ويفقد وعيه بسبب الاصطدام العنيف. . دا شغل عين. . هسع الله يستر على نزار الصاقعة وبكري المدينة. . الله يشوفهم. . اصلو الهلال لمن يكون ماشي عديل تظهر لينا (عوارض) كدا من مافي. . نرجع لدورة حوض النيل …(سيكافا) بعد اعتذار فريق المصري البورسعيدي واعتذار المقاولون العرب …حي العرب نفسه قام اعتذر. . وهذا يؤكد ضعف تنظيم هذه البطولة التى اصبح امر قيامها نفسه مهدد. . وقد تختصر البطولة التي اعلن عن مشاركة اكثر من (12) فريق فيها على اربع اندية بينهم فريق المريخ الخرطوم والمريخ الفاشر. . بل ان الدورة ربما يشارك فيها مريخ الخرطوم ومريخ الفاشر وحدهما..رغم وصول نادي فكتوريا اليوغندي والدفاع الاثيوبي. . ديل (كافتريات) وإلّا شنو؟. . اوعكم تقولوا لي ديل اندية. . بتفقع من الضحك. . في التاريخ زمان كانوا بقولوا ليك ان الدولة كانت تحمل عناصر فنائها في تكوينها. . الان يمكننا القول ان بطولة سيكافا تحمل عناصر فنائها في تنظيمها. . اخطر من هذا ان كل الاشياء التى يمكن ان ينشغل بيها المريخ ويعمل بيها (موضوع) طرشقت. . طبعا المريخاب كانوا عاوزين يتباركوا باستضافة مباريات مرحلة المجموعات. . عشان على الاقل يشعروا شوية كدا بي وجودهم ويظهر ليهم حس. . اصلهم في الكورة ما عندهم شيء غير (المقصورة) – لذلك كانوا عاوزين يشاركوا بيها في مرحلة المجموعات. . قالوا يستضيفوا مباريات الاهلي بنغازي عشان ما يطلع من المجموعات بدون حمص. . بدل ما يقعدوا لينا كدا زي (نا) نمر. . يعني قعاد زي (القحف). . لكن حتى استضافة مباريات الاهلي بنغازي نفسها على ما يبدو سوف يفقدها المريخ. . فقد جاء في موقع الزاوية الرياضي نقلا عن موقع بوابة الوسط الليبي : (ان الاهلي بنغازي قرر تحويل مباراته مع الترجي من ملعب المريخ الى ملعب الطيب المهيري في صفاقس لاسباب تتعلق بضيق الوقت وحسب ما جاء في الموقع " خاطب مجلس إدارة نادي أهلي بنغازي ، ظهر الاثنين ، الاتحاد الأفريقي لكرة القدم "كاف" للرد بشكل عاجل على طلبه بشأن خوض مباراته الثانية أمام فريق الترجي التونسي ، المقرر لها أن تقام يوم السبت المقبل ، ضمن ذهاب الجولة الثانية لدوري المجموعتين من دوري أبطال أفريقيا لكرة القدم على ملعب الطيب مهيري بصفاقس، بدلاً عن ملعب نادي المريخ السوداني بأم درمان). . يعني يا ناس المريخ (استضافة) ساكت في مرحلة المجموعات ما تحلموا بيها. . ولا استضافة. . الاستضافة طارت. . دي سمعتوا بيها قبل كدا. . ناس يطيروا من (الاستضافة). . اجر الاستضافة في المجموعات ما عندكم فيه طريقة. . وما حدث في تنظيم بطولة سيكافا على ما يبدو سوف يحدث في تنظيم مباريات الاهلي الليبي في استاد المريخ. . عليه لا استبعد ان يستجدى مجلس المريخ فريق الهلال من اجل ان يلعب الهلال مبارياته في استاد المريخ. . يمكن يجوكم جارين يا ناس الهلال. . لكن عشان حركاتكم دي ..نحن ما بنلعب في استاد المريخ …خلاص استاد الخرطوم اصبح قلعة حصينة لانتصارات الهلال ..كما ان لاعبي الهلال اعتادوا على اللعب في ارضية النجيل الصناعي ..واصبحت الارضية عامل من عوامل انتصار الهلال. . يلا يا ناس المريخ شوفوا ليكم دورة نظموها في استادكم دا..وحاولوا املأوا اوقات فراغكم شوية ..واعملوا ليكم موضوع. . الفرق الكبيرة في افريقيا بتلعب الان في مرحلة المجموعات ..نحن في الوقت دا ما عاوزين اي ازعاج. . انتوا يا ناس المريخ ادوكم اجازة زي اجازة والي سنار احمد عباس. . لا شغلة ولا موضوع. . ولا استضافة. . استضافة ما في. . و… . انتوا تعالوا هنا جدول تلاتة غيروه. . يغيروا شنو يا زول؟. . انت عاوز تلخبط وإلّا شنو؟. . اطلع سريع. . احسن اقيف ليكم هنا من اللخبطة. . وانتهى.
شارك فى مسابقة كورة سودانية وكن الفائز السادس بجائزة موبايل جلاكسى استار ...اليوم الثلاثاء آخر يوم للمسابقه