العتب مرفوع هيثم كابو (رمضان) ثبت بي قونو ..!! * وصول منتخب البرازيل أمس الي ربع النهائي بعد ولادة عسيرة بركلات الترجيح على حساب تشيلي لا يعني قدرته علي الفوز بكأس المونديال حتى ولو رقصت (الأرض) سامبا، فدوي الهتاف وتدافع الجمهور لا يمنح (رفاق نيمار) كروت العبور ..! * حب معظم السودانيين للمسة الساحرة يدفعهم لمساندة البرازيل، ولكن منتخب 2014 ليست فيه ملامح لقب مونديالي ولا يبشر بطول صمود، فالخطوط متباعدة والادء فاتر والمردود مخيف، ويا (نيمار) عليكم بوصية (الحوت) وتجاوز هذا المستوى الضعيف ..و(أبقوا الصمود ما تبقوا زيف) ..! * لن يكون بوسع نيمار وحده الظفر بكأس العالم ..و(اليد الواحدة ما بتصفق) ..! * فقدت البرازيل أعدادة كبيرة من قاعدتها العريضة بالسودان ..(وكلكم يعرف السبب) ..!! * إن كان السودانيون قد عرفوا منذ وقت قديم بحبهم للبرازيل وإنحيازهم السافر لنجومها، فأن مدرب الهلال البرازيلي كامبوس قد لعب دوراً كبيراً في كراهية السودانيين للبرازيل وجميع دول امريكا اللاتينية . * الكرة اللاتينية تتقدم بثبات ولا يعيبها شئ سوي (عضة سواريز) ..!! * وضع مهاجم سواريز منتخب بلده في موقف لا يحسد عليه بتصرفه اللامسؤول ..و("عضة" وبتزول) ..! * جنسية مدرب الهلال كامبوس أثرت على مستوى نجوم السامبا ..!! * ما يفعله (كمبسة) في كرة القدم لا علاقة له بالبرازيل من قريب او بعيد ..! * الناس زعلانة من سكولاري تقول لي كامبوس ..(سلامة النظر والبرازيل في خطر) ..! * قلنا من قبل أن خليفة علي حس علاقتو بكامبوس بموت موت مع البرازيل . . ! * يا خليفة موت مع البرازيل لكن ما تكتلهم معاك ..! * يا (هاليفا) فك البرازيل دي شوية خلينا نشوف لينا نقلة نقلتين حتمسك الأولاد ديل لمتين ..! * يا خليفة فك البرازيل وأمسك مهاجمين (فيتا) ..! * حلاقة بكري المدينة (شربت) نيمار ..! * حلاقة بكري (ما صائمة) ..! * هسع يا بكري لو ما تقليدك لحلاقة نيمار (الود الكورتو زي الطلقة دا محتاج يفوز بضربات ترجيح) ..! * ندرك جيداً أن (بجري) المدينة حالق زي (نيمار) عشان يقول للناس (اطمئنوا الكرة في الرأس)..! * نيمار ربنا يحفظه من (جري بكري)..! * نيمار دا لو ما وصل النهائي بيكون تقليد بكري المدينه لحلاقته أثر عليه ..! * بكري سيبك من نيمار و(أحلق) لينا لي فرنسا ..! * روبن عارف حركات ناسكم دي يا خليفة عشان كدا خلى حلاقتو زي فرفور ..! * الليلة أول يوم صيام إن شاء الله فرفور ما يلعب ضاغط مع قدور ..! * قدور ما بنقدر سيل (الضحك) المنحدر ..! * ضحكة قدور زي (تخريمات) ميسي، لو ما سمعتها ما بتشرب قهوة الفطور ..! * قهوة الفطور ساهلة (صعب) برازيلي الهلال ..! * ما كامبوس يا خليفة .. (قاصد ليك الماسورة الكبيرة) ..! * ايوه سيرجيو .. عليك نور ..! * قبل كدا قلت ليك يا خليفة أنو ناس سيرجيو ديل المبوظين سمعة البرازيل .. ! * برازيل ناس سيرجيو زادوها موية .. (روحا تتسلا مع تشيلي يعني لو لاقت هولندا الوضع بكون كيف ؟). * بمناسبة هولندا : لا علاقة بين صلعة روبن والطاهر الحاج ..لذا لزم التنويه ..! * غادر الطاهر الكشوفات مع أن البقاء (للأصلع) ..! * غايتو يا خليفة ..بسيرجيو وكمبسة البرازيل بقيت زي الكنغو برازفيل ..! * البرازيل الفيها كامبوس وسيرجيو دا طرفنا منها ..(المرة دي بنموت موت مع ميسي)..! * ميسي دا يا خليفة ابعدوا منو .. (الود بعرف الجيهة ربنا يكفيهو شر الحلاقة والنجيهة)..! * (رمضان) ثبت بي قون في الشعلة ارقو..! * الكرة يا خليفة (ما لعب) ..الكرة (ابداع)…و(حقو تشوفوا المونديال عشان تقرروا الإعتزال)..! * يا جماعة ..القوا نظرة واخدوا نقلة ..! * إتنقلي ..! نقش أخير * الإنتخابات على (الأرباب) افتحوا (الأبواب)..!
