…و…. محمد عبد الماجد انتوا ناس الجزيرة ديل نقلوا لينا (كأس العالم) دا لميدان عقرب؟ . …و . اول يوم في كأس العالم قابلني ليك زول (حفيان) – عيونو متل (الفنجان) المقلوبة في تربيزة الغسيل. . جيوبو من رأسو من شدة الفلس. . واضنينو الاتنين (تسلل). . مارقات برة رأسو – واقفات بعيد….(تسلل واضح).
. ما عرفت حالة الزول دا من شنو؟. . مالك يا زول؟. . الحاصل عليك شنو؟. . معقولة (الاسعار) بتعمل في الزول كدا. . الحالة العليك دي من كأس العالم – وإلّا كمان خوف من رمضان؟. . باقى الحاجات مرات قاعدة تتداخل على الزول. . في ناس رمضان بجرسهم ليك زي الطالب العاوزين يسمعوا ليه وهو ما حافظ. . ما ناقش اي حاجة. . ما عارف اي شيء. . يقوم يتلفت ويعاين بالشباك – متل (سرحان عبدالبصير) في مسرحية (شاهد ما شافش حاجة). . قلت ليه يا زول مالك (ملخوم) كدا – ورأسك ضارب. . قال لي : اشتريت لي كرت وجهاز ب (3) مليون عشان اتابع واشاهد مباريات كأس العالم. . هسع دي ما شيلة عديل كدا. . قلت ليه يا زول انت (جنيت) تشتري ليك جهاز وكرت ب (3) مليون لكأس العالم اصلك انت (لاعب) فيه. . مشارك – انت مدرب. . قايد منتخب – البخليك تدفع القروش دي كلها شنو في (الفرجة). . انت عاوز تلعب فيه وإلّا عاوز تشاهد بس؟. . انت يا زول عاوز (تعرس). . لو كنت رجل رأية في نهائي البطولة مفروض ما تدفع المبلغ الكبير دا عشان كأس العالم. . دا جن بس. . بعدين الجماعة ديل ليه رفعوا السعر كدا …هم عاوزين ينقلوا لينا كأس العالم دا في ميدان عقرب وإلّا عاوزين ينقلوه لينا في (بي ان) سبورت. . انتوا يا ناس الجزيرة كأس العالم دا عاوزين تنقلوه لينا ب (درب). . ناقلنو لينا بالوريد. . مشاهدة ساكت – فرجة بس …تدفعونا القروش دا كلها. . شوفوا الزمن الغريب دا ..سعر مشاهدة كأس العالم بقى زي سعر العمرة. . كان مشيتوا (عمرة) احسن ليكم – من البتعملوا فيه دا. . بعدين زي ما قالوا الالمان مفروض بعد ما طارت المنتخبات الكبيرة من الدور الاول في البطولة الشركة الناقلة للمباريات كأس العالم مفروض تدفع تعويضات للمشاهدين. . معقولة يا ناس جماعة يدفعوا ليهم (3) مليون جنيه عشان يشاهدوا كوستاريكا وبلجيكا. . نحن لو عاوزين نشاهد كوستاريكا كان قعدنا هنا نتابع في كورة ناس بلة جابر. . ساكت دفعتونا (3) مليون ..والمنتخابات الكبيرة كلها طارت. . هسع ح نقعد نحارس في (ميسي) ونيمار كدا لو واحد فيهم طار من البطولة ح تكون خسارنة معانا عديل كدا. . و… . (وشنو كمان؟). . بمناسبة بلة جابر دا – قالوا ليك بلة جابر بعد ان انتهى موسم الشطب ..قالوا ليك قال انو احق بالكابتنية وان اللائحة تمنحه ذلك الحق. . يعني لا الباشا والا علاءالدين يوسف. . الكابتنية في المريخ عملة ليها (مشكلة). . في المريخ دائما هناك خلافات حول القيادة ..واي زول في المريخ عندو رأي في الزول التاني. . عصام الحاج عندو رأي في جمال الوالي. . وجمال الوالي شايف مع القروش البدفع فيها دي – مفروض ما في اي زول في المريخ يقول ليه حاجة. . جمال الوالي فاكرها كلها دفع. . الوالي ما عارف انو في حاجات اهم من المال ..وان القروش براها ما بتعمل ليها فريق. . جمال الوالي اعلن الرحيل عن المريخ …واختفي عصام الحاج الذي ملأ الدنيا تصريحات من الساحة. . اظهر يا عصام الحاج ..تعال استلم. . ورينا ح تمشي الامور كيف؟. . عصام الحاج كان يمكن ان يدير المريخ ..لولا ان جمال الوالي خر طبع المريخاب. . جمال الوالي خرب طبع اللاعبين وخرب طبع الاداريين الشغالين معاه وخرب طبع الصحفيين وخرب طبع الجماهير ذاتها. . الزول دا كان بصرف علي اي زول في المريخ. . عليه طبيعي ان يجد الشخص الذي يأتي بعد جمال الوالي معاناة في ادارة المريخ. . بل ان جمال الوالي نفسه الحكاية صعبت عليه …وهو نفسه اصبح غير قادر على تسيير الامور في المريخ. . اذا جمال الوالي فشل في ادارة نادي المريخ (ماليا) بعد الصرف الخرافي الذي اصبح في المريخ. . لذلك غادر جمال الوالي (مغادرة نهائية) للمريخ واعلن من مهجره انه قرر (التنحي). . في الهلال الامور تختلف عن المريخ. . في الهلال مازال هناك صراع من اجل رئاسة نادي الهلال ..ومع الصرف الكبير في الهلال الذي ربما يكون اكبر من الصرف الذي هو في المريخ إلا انه مع ذلك الهلال مازال جاذبا. . والصراع الذي هو الان بين صلاح ادريس واشرف سيد احمد الكاردينال يثبت ذلك. . علما ان الهلال مثقل بالديون …وملاحق من جهات عديدة ..وهناك اكثر من (9) لاعبين مطلوب اعادة قيدهم في فترة التسجيلات القادمة إلأ انه مع ذلك الصراع والتنافس باقيا في الهلال. . في المريخ اذا ابتعد جمال الوالي ورغم المساوي التى كانت في عهد جمال الوالي إلا انه خلفه سوف يجد معاناة كبيرة في ادارة نادي المريخ. . في المريخ دائما خلف جمال الوالي هو جمال الوالي. . يذهب جمال الوالي ليعود جمال الوالي. . المريخاب سوف يكون غضبا عليهم انتظار جمال الوالي إلي ان تفك زعلته ليعود من جديد. . لا عصام الحاج ولا الف عصام الحاج قادر على ان يخلف جمال الوالي. . خاصة بعد ان عود جمال الوالي المريخ على وضع معيشي معين. . وضع لا يقبل عصام الحاج. . الوضع المعيسي الذي يعيش فيه المريخ ..قلنا ان جمال الوالي نفسه عجز عن القدرة على استمراره. . لذلك سافر جمال الوالي. . وربما يسافر عصام الحاج ايضا. . نصيحة للمريخاب للخروج من هذه الازمة شجعوا الخرطوم الوطني او الاهلي الخرطوم. . وانسوا حكاية المريخ دي. . ما تزعلوا ساكت. . دي الحقيقة. . و… . المسلسل بدأ. . مسلسل شنو يا زول. . اطلع. . واقفل. . و… . وانتهي.