…و…. محمد عبد الماجد استقالة جمال الوالي – سيكافا – عودة جمال الوالي – وبالعكس . …و . انتوا ناس المريخ ديل ما عندهم (شغلة). . ما عندهم (موضوع). . الواحد وقت يكون ما عندو (موضوع) – بقول ليك شايف (السخانة) دي كيف؟. . الشمس الليلة من شرقت شرقت بي نمرة اربعة.
. وتقوم فجأة كدا تلقوا نفسكم عملتوا ليكم موضوع من ما في. . هسع مواضيع الايامات دي – المدورة في البلد – الواحد بدون اي مناسبة ، يلاقيك ويوقفك ويقول ليك : (عليك الله شفت رمضان دا مشى كيف؟). . الليلة يوم 17 رمضان. . يعني (زرزرة) العيد بتكون بدأت في المناطق الطرفية من العاصمة – الناس الساكنة في قلب الخرطوم ما بكون عندهم مشكلة (خبيز). . او نقص في هدوم العيد. . الزرزرة بدأت في بيوت الموظفين. . لكن في ناس (الزرزرة) اخير ليهم من سخانة رمضان. . و… . (وشنو تاني كمان؟). . ناس المريخ (عطفا) على الفقرات السابقة – طلع ما عندهم اي موضوع. . 11 خ. . اقصد 11 سنوات جمال الوالي دا – (حنكهم) طلع ليك واحد. . ما في اي جديد. . 11 سنة نحن في الطريقة دي. . يقوموا ويقعدوا وينزلوا القزاز. . زي الزول البلاقيك كل يوم العصر بفتش ليه في (سخلة) في الحلة. . سخلة رايحة. . لا السخلة كبرت وبقت غنامية…ولا اتلقت. . لا هو كمان اتجاوز حتة (الكواسة) دي. . او زي الزول القدر ما تمشي مستشفى الخرطوم بتلقاه طالع سلاليم العنابر وشايل ليه (درب). . ناس المريخ ديل هسع نحن موضوعهم دا (حلجوا) لينا بيها حلقونا. . كل سنة هم في (الحنك) دا. . نحن نعمل انتخابات. . ونفسنا يقوم. . يفوز صلاح ادريس – يفوز الامين البرير – يفوز اشرف الكاردينال وهم (للخلف دور). . جمال الوالي وحده في المريخ لا شريك له. . جمال الوالي براهو ما عندو حاجة اسمها شركاؤه. . نحن نطعن في الانتخابات. . الانتخابات تطرشق. . يجيبوا لينا مجلس تسيير جديد – ما عندو اي علاقة بالكورة…يتعلموا الكورة ويبقى عندهم خبرة. . ونصل مرحلة المجموعات …والمريخ في سيكافا. . وجمال الوالي (لسه). . بعد 11 سنة مازال في سنة اولى ادارة. . والحكاية هي الحكاية. . نفس الحركات. . نفس القصص – ما في اي جديد. . يا جماعة ما تبقوا لينا زي (اغاني واغاني)..جددوا لينا شوية ..ابقوا زي (مع النصري). . غيروا لينا في السيناريو – غيروا لينا في الحوار. . حكاية (الولف كتال) دي كفاكم منها. . شنو كل (6) شهور …جمال الوالي يزعل ..ويمشي يقعد في بيتو. . قبل كدا يقفل التلفون. . ويغيّر الشريحة. . وانتوا تقعدوا تتجرسوا فينا. . تكبوا ليكم (جرسة) ما حصلت. . لمن جمال الوالي يصدق. . جمال الوالي يرجع ..يقول خلاص انا ح استمر الى ديسمبر القادم. . تجي التسجيلات يسجل ليه لاعبين كدا مع شوية (زعيق) جمال الوالي يقوم تاني يقعد. . يقول ما صاح امشي يا جماعة قبل التسجيلات. . يقعد ليه (6) شهور تاني. . و… . (اكمل). . في نص الموسم ..الهلال يشدد الخناق على المريخ ..والصرف يكتر على جمال الوالي. . يقوم جمال الوالي فجأة كدا – وبدون اي سبب يقوم يزعل ..ويقول عصام الحاج بحفر لي. . تتخيلوا جمال الوالي يعمل شنو؟. . يقوم يستقيل..استقالة (جرايد) كدا. . ويقول خلاص انا تاني ما برجع ..وكفاية كدا ..وانا اتعرضت لحرب خفية. . خلوا ناس عصام الحاج يمسكوا المريخ. . الوالي يقعد ليه (45) يوم كدا كاملة (الاستقالة). . ثم يرجع تاني. . يقول ليك ظروف المريخ ما بتسمح..وتقديرا لكبار المريخ ح ارجع. . ويرجع. . بعد (6) شهور – ينسي ليك موضوع كبار المريخ ..وظروف المريخ …وحاجات المريخ ..ويقوم منو وليه كدا – (يزعل). . زعلة شديدة. . جمال الوالي براهو يقول ليك الزعلة دي قوية ..وانا ما برجع تاني ..خلاص كفاية كدا. . الجماعة البي غادي يتفتحوا ليك (تحانيس)..انت الكبير يا جمال الوالي – ونحن ذاتو ما عندنا غيرك. . يمين لو قعد كرسي الرئاسة خالي كدا (6) شهور ما في زول بمشي عليه. . كمّل زعلك وارجع لينا. . نحن ورانا شنو؟ – ازعل على اقل من مهلك…ووقت زعلتك تنتهي ح تلقانا في الانتظار ..(تغلطوا انتوا يا حلوين نجيكم نحن بالاعذار). . اصلو نحن ما عندنا مشكلة. . جمال الوالي يلقى الابتعاد من الاضواء والجرايد امر صعب عليه. . شيء لا يطاق. . يقوم يقول شنو؟. . يقول تقديرا لجماهير المريخ …(جماهير المريخ ما عندها اي ذنب – تقديرا لتلك الجماهير انا قررت ارجع). . والجماعة يغنوا ليك. . ارجع تعال عود لي. . ونحن ما ناسك. . ونسانا حبيبنا الما مفروض ينسانا. . وتسافر كيف تخلينا. . وكان زعلان نحن ما بنزعل. . وما منك من العليك…(من ناس عصام الحاج). . ورجعنالك ..وكيف نرفض رجوع القمرة لي وطن القماري. . وتلاقانا نحن يانا نحن. . وكيف هان عليك يا حبيب تسلاني. . وعود لينا يا ليل الفرح. . وبتتعلم من الايام. . معليش يا جماعة بتتعلم من الايام دي دخلت غلط. . عشان جمال الوالي دا لا بتعلم من الايام ولا حاجة ..وما عاوز اقول اكتر من كدا. . زحمتونا بي قصصكم دي. . جمال زعلان. . جمال مستقيل. . جمال سافر برة البلد. . جمال في اجازة. . جمال الوالي سحب استقالتو. . اول هو استقال في الاساس ..عشان يسحب الاستقالة. . يا جماعة الافلام الهندية دي نحن فترنا منها ..وحفظناها ..وبقى ذاتو ما في سينما في البلد عشان تقدم العروض. . بقوا يقدموا لينا العروض في الجرايد. . ما تقلبوا لينا الجرايد (سينمات). . نحن ما ناقصين. . المضحك في المريخ ان بين كل زعلة لجمال الوالي وعودته من الزعلة مشاركة المريخ في (سيكافا). . يزعلوا يرضوهم ب (سيكافا). . يستقيلوا يرجعوهم ب (سيكافا). . والمدهش ان المريخاب بعد كل هذه (اللدغ) بفرحوا ب (سيكافا). . عليكم الله في تواضع اكتر من كدا. . سيكافا دي مفروض (يفطموكم) منها انتوا كبرتوا على الحكاية دي. . الهلال الان بشارك ب (عرق جبينو) في بطولة الاندية الافريقية وهو قد بلغ مرحلة المجموعات. . وانتوا بتتكلموا عن سيكافا. . تتخيلوا يا جماعة بعد (كأس العالم) في ناس بتكلموا عن (سيكافا). . والله عشان كلامكم دا المانيا ليها حق تغلب البرازيل 7 / 1. . عشان نقتكم الكتيرة البرازيل اتغلبت بالسبعة. . ديل برازيل شنو؟. . انا اول مرة اشوف لي (برازيل) جدول اتنين ما حافظنو. . خسارة البرازيل عليكم. . يا ربي الجماعة ديل عطفا على المواضيع السابقة عندهم (جمال الوالي) ايضا. . يعني سبعة البرازيل دا ممكن يزعل فيها جمال الوالي البرازيلي في البرازيل (5) شهور. . يا ناس البرازيل اقول ليكم. . حاجة سر. . نظموا (سيكافا). . ما عندكم حل غير كدا. . و.. . انتوا… . عاوز تقول شنو عليك الله بعد كدا؟. . اطلع ما تقول اي حاجة. . ابقى مارق. . و… . وانتهى.
