…و…. محمد عبد الماجد لو دي كورتكم شاركوا في (سيكافا) ساي . …و . طبعا نحن لو عاوزين نعمل لينا موضوع من اللا موضوع – ممكن نقعد ندبر امورنا كدا ونعمل لينا حفلة شاي ونشارك في سيكافا. . لو الكورة غلبتنا – بنشارك في سيكافا. . لكن سيكافا دي من مرحلة المجموعات ما في فريق بمشي عليها. . سيكافا دي – الطريق اليها بكون من (التمهيدي).
. من التمهيدي تشارك في سيكافا. . ما في فريق من المجموعات بمشي (محو الامية). . و…. . (اكمل). . انتوا يا سلك براكم عاوزين تمحو اميتكم – نعمل ليكم شنو؟. . انت تشيل وتلمح لي نفسك. . طبعا (محو الامية) بتكون للناس الكبار …وانتوا فريقكم دا والله ما صغير – فريق كبير. . يكفي انو (ند) للهلال. . لكن مع ذلك دخل سيكافا لمحو الامية. . لو طلعنا من دور ال (64) كنا هسع ح نكون بنلعب مع المريخ في بطولة (سيكافا). . كنا برضو ح نمشي نمحي اميتنا. . وكنا نحن في اعلام الهلال عملنا لبطولة سيكافا (توم شمار) وطلعناها زي ما بعمل اعلام المريخ الان (بطولة). . نحن في الحاجات دي طبعا اصعب من اعلام المريخ. . فريق (بنادير الصومالي) كان بي كل بساطة ح نطلعوا ليكم زي مانشيستر سيتي. . كمان نحن الحاجات دي فيها بنلفت. . نقنع ليكم الحجر ذاتو. . اعلام المريخ يمكن يكون ما عندهم (منطق) – عشان كدا ما قادرين يقنعوا ليك (الباشا) نفسو ببطولة سيكافا – ناهيك عن الجمهور. . اذا كان (الباشا) كابتن المريخ والمشارك في هذه البطولة ما مقتنع بيها – عاوزننا نقتنع ليكم نحن ب (سيكافا). . سيكافا دي قالوا ليك (شرابات) ما فيها – يعني اللعب فيها بدون (جوارب). . وبدون رأيات كورنر. . وبدون شبكة. . وبين الشوطين (تلج) للموية ما في. . بطولة (تلج) ما فيها. . والفريق ممكن يشارك معاه (51) لاعب – ما في اي مشكلة. . بطولة ما فيها اي قانون – زي سوق الحرامية. . قالوا ليك المباريات التى تلعب في تلك البطولة (كشافة) واحدة ما فيها. . كشافة شنو؟ سيكافا دي (بطارية) ما فيها. . و… . (وشنو تاني؟). . لكن لو الهلال شارك فيها – اعلام الهلال كان قادر يعمل ليكم لبطولتكم الميتة دي طعم ورايحة ولون. . على الاقل كان (الباشا) اقتنع بيها. . لكن بالجد كدا يا ناس الهلال لو دي كورتكم ح نوديكم (سيكافا). . يا كاريكا لو عملتوا تاني كدا ح تمشوا (سيكافا). . سيكافا طبعا نحن عندنا (عقوبة). . سيكافا قاعدين نخوف بيها ناس نزار حامد وبشه ومهند الطاهر. . اللاعب في الهلال لو عمل غلط – نقول ليه نجيب ليه (الغول) وإلا تمشي تشارك في سيكافا. . اللاعب طوالي يقول ليك جيبوا لي (الغول). . بطولتكم دي اخير منها الغول. . تتخيلوا المريخ لعب في بداية اعداده للموسم امام بايرن ميونخ. . وجاء ولعب في اعداده لنهاية الموسم امام (بنادير الصومالي). . بنادير الصومالي دا بعد البطولة ح يكون فيهم (9) لاعبين مطالبين بحق اللجوء السياسي. . فريق عزام التنزاني الذي سوف يلعب امام المريخ غدا في ربع النهائي قالوا ليك فيهم (7) لاعبين سماكين. . و(3) منهم (كمنسجية). . و (5) فرانة. . و(13) نزلوا معاش من وزارة الصحة بتاعة تنزانيا. . و(7) بتاعين اسكريم. . فريق ما عندو اي علاقة بي كورة القدم – الكورة شافوها في قبل اسبوع من انطلاقة البطولة. . لكن نحن لو اتقرصنا. . وبقت علينا حكاية المريخ دا. . قمنا طرنا من المجموعات – والشكوى ما اتقبلت. . بنقوم نتصرف برانا. . اول حاجة بنقوم نعلي (سور) الاستاد. . تاني حاجة بنعمل لينا (مقصورة). . ونقعد نردح غزل فيها – لمن الناس تصدق. . بعد كدا بنشوف لينا اي (بارين ميونخ) كدا ونلعب امامه مباراة ودية. . الغريبة الناس اللعبوا من المريخ امام بايرن ميونخ كلهم طاروا. . بداية من عبدالصمد الذي كان رئيسا لبعثة المريخ في قطر. . ثم الجهاز الفني باكمله بقيادة كروجر ومساعده ابراهومة. . ثم طاروا كما اشار رمضان احمد السيد باسيرو وشيلميس واوليفيه وغاندي. . بل مضت لعنة بايرن ميونخ الى ما هو اكثر من ذلك فابعدت هيثم مصطفى من المريخ تماما – وابعدت عنبكة من تشكيلة المريخ. . وبلغت اللعنة موسى الزومة وسعيد السعودي واكرم الهادي سليم الذي حفزوه بسيارة في قطر بسبب تألقه امام بايرن ميونخ. . الجماعة ديل وين؟. . قلنا ليكم – ضحايا بايرن ميونخ ديل لو قبلنا عليهم ما في واحد فيهم بثبت. . هسع الله يستر عليكم من لعنة بنادير الصومالي. . كمان قالوا ليك بنادير دا عندو (لعنة). . لعنة ما بمرق منها زول. . بكرة ح نشوف (عزام) بتاع الاسكريم دا ح يعمل مع المريخ شنو؟. . شكلنا كدا بعد الاداء الذي لم يكن جيد من الهلال امام الرابطة كوستي اننا ح نظم سيكافا. . خاصة اذا لم تقبل الشكوى في فيتا كلوب. . طوالي يا ناس الهلال لو حصلت هذه الاشياء شوفوا ليكم (سيكافا) واتلموا عليها. . طبعا اعلام الهلال الليلة ممكن يطلعوا ليك الهلال قدم مباراة رائعة وجميلة امام الرابطة. . لا قدم مباراة رائعة ولا جميلة. . قولوا الحقيقة. . الاداء دا اداء (سيكافا). . و… . انتوا البصل ليه ارتفع سعرو كدا؟. . ناس البصل ديل زي ناس الولاية برضو قاعدين يتفاجأوا بالخريف. . يا زول ما تقول كدا. . يا زول اطلع. . اتخارج – سريع. . و… . انتهى.