….و…. محمد عبد الماجد ديل من سوء الاداء جابوا ليهم حكم اسمو (صبري) …و الحكاية واضحة – ولا عاوزة ليها (درس عصر) وكباية لبن ساخنة. طبعا في ناس ما بفهموا ليك إلّا ب (كباية اللبن). كباية اللبن عندهم قبل (درس العصر). تدفع ليهم مقدم فهم (كباية لبن) – ومن ثم تقعدوا تتناقشوا على (الفهم) دا. زمان في واحد قالوا ليك كان شغال (صراف) في مصلحة حكومية – تمشي ليه يوم تلاتة عشان تصرف – بقول ليك لو عاوز تصرف إلّا تجيب لي فنجان قهوة. تمشي تجيب ليه فنجان القهوة – وتصرف وتفوت. يوم في واحد كانت قافلة معاه – والظاهر عليه (مفلس) شديد. صاحبكم قام مشى على الصراف يوم (27) من الشهر وقال ليه عاوز اصرف. صاحبكم منتظر الصراف يقول ليه امشي جيب لي فنجان قهوة. لكن الصراف ما طلب منو فنجان قهوة – الصراف عاين ليه سمح وقال ليه والله لو جبت لي (خروف) اقرن ما تصرف هسع. انتوا بتلعبوا. ما عارف الزول وقت يعاين ليه لي زول معاينة حقارة كدا – بقولوا ليك عاين ليه (سمح). السماحة وين هنا؟. و…. (ادخل في الموضوع). محسن سيد امس بعد مباراة المريخ والاهلي شندي طلع تصريح غريب ..وحلل للمريخاب سوء الاداء. اغرب منطق. محسن سيد قال : (الدوري نقاط ونحن نبحث عن النقاط ومن يبحث عن العرض الجميل عليه أن يذهب لدور السينما). انا قلت الكلام دا قالو منو؟. الكلام دا قالوا يوسف شاهين ..قالو سعيد مرزوق ..قالو اسماعيل عبدالحفيظ – اصلو ما ممكن يكون قالو محسن سيد؟. يا كوتش (النقاط) دي بجيبوها ليكم (الحكام) – انتوا قايلين نفسكم تعبانين في شيء. ركز في العرض. يا محسن عشان نكون واضحين معاك – انت جايبنك عشان (الاداء). على الاقل عشان الانتصار يكون مقنع. وال (3) نقاط تكون حلال. ما تقعد تشرع لينا ساكت – انت خالد يوسف – وإلّا مروان حامد؟. خليك في كورتك. يعني ما معقولة يا محسن سيد (6) مباريات شغالين لي بالقطاعة كدا. بالقطارة. يلقطوا في النقاط هدف – هدف. شغلكم ما مقنع للجماهير. ولا تغشوا نفسكم ..والناس ديل ما بصبروا عليكم اكتر من كدا. لو جيتوا بي حالتكم دي للهلال – ناس بشة ديل بفرتككوم بشه – بشه. ناس نزار حامد الهدف والهدفين ما بقيفوا فيها – ولا بعتبروه انتصار. بعدين انتوا تعالوا هنا في (سيكافا) دي كنتوا بتعملوا في شنو؟..كنتوا بتركبوا ليكم في تلفونات. وينها بطولتكم؟. وينو مستواكم؟. الهلال بدون مدرب – بقدم في كورة زي الحلاوة. الناس بتخش تتمتع في كورة الهلال وتطلع على كدا – تضحك من الاضان للاضان. و…. (اكمل). الشيء الثابت والذي اضحى امر متقف عليه ان (اداء) المريخ اصبح باهتا وغير مقنع. الجماعة بقوا يطلعوا من مباريات المريخ اي واحد ما عاوز يتكلم مع التاني. الواحد يكون ماشي بحري يسأل من حافلات الكلاكلة. يكون ماشي الثورة – يركب حافلات الكلاكلة. يكون ماشي الحاج يوسف – يمشي على حافلات الكلاكلة. انتوا الكلاكلات دي فيها شنو؟. الحكاية دي قصد – وإلّا صدفة ساكت. جماعتكم حالتهم بقت صعبة. محسن سيد بقى يطلع ويحلل في الاداء. محسن سيد عاوز يقنع ليك ناس المريخ ان العروض بتوجد فقط في (السينما). طيب يا كوتش. يا محسن. يا مدرب يا كبير. ناس نزار حامد ديل ونيسلون بلعب معاهم نور الشريف. بلعب معاهم أحمد عز. انت قصدك يا كوتش استاد عطبرة دا كان (سينما). على كدا الهلال ما عاوز ليه مدرب. الهلال مع عروضه الجميلة دي – مفروض يجيب صلاح السعدني ويعينو مدير فني. لكن يا محسن (الحنك) طلع عندك. الظاهر المريخاب ح يقتنعوا ليك بالنظرية دي. يدخلوا المباراة يشيلوا (النقاط) عن طريق الحكام ويقولوا ليك بعد المباراة – المهم النتيجة. صدقوني (النتيجة) ذاتها ح تفقدوها بي حالتكم دي. اصبروا بس. قربتوا. تاني لا عرض ولا نتيجة. ح تشوفوا الكلام دا قريب. المضحك في الامر ان مجلس المريخ اصدر بيان امس هاجم فيه حكم مباراة المريخ والاهلي شندي. تتخيلوا هاجموه في شنو؟. هاجموه عشان عربية الاسعاف ما دخلت للملعب. قالوا العربية اتأخرت. بالله. قوموا لفوا عليكم الله. هسع انتوا ما بتخجلوا مجلس ادارة فيه اكثر من (13) عضو – بطلع ليه بيان وبهاجم فيه الحكم عشان عربية الاسعاف ما دخلت سريع للملعب. والله نحن ما كنا عارفين (جمال سالم) دا حارس رئاسي. انتوا ما تحمدوا الله ساكت. جمال سالم لو اصابتو دي حصلت ليه مع كمبالا سيتي – كان عربية الاسعاف الى الان ما دخلت. بعدين انتوا يا ناس المريخ عاوزين الاتحاد العام اكتر من كدا يعمل ليكم شنو؟. الحكم احتسب ليكم (ضربة جزاء). وعشان مستواكم الكعب دا – وهدفكم الوحيد ..الاتحاد العام جاب ليكم حكم اسمو (صبري). يعني اصبروا ساكت. فريقكم دا عاوز ليه (صبر) تقيل. انتوا فاكرين الموضوع دا صدفة. فاكرين اختيار (صبري محمد فضل) لادارة مباراة المريخ والاهلي شندي طالع من فراغ. الموضوع مقصود. ومرتب ليه. عشان الاداء الجنايزي دا – جابنا ليكم (صبري). و…. اربع رغيفات بي كم؟. يا زول (رغيف) شنو؟. اطلع. و… ….انتهى.