إلى الآن أنا ما فاهم موقع (فيصل العجب) شنو؟ من الإعراب...الزول دا خلاص وصل للمحطة النهائية؟ ..وإلا ح يقعد على مضض (6) شهور تانية.
مريخابي تعبيرًا عن الواقع الآن ..قلت ليه قالوا العجب قدر ما تضربوا ليه بتلقوا تلفونو مقفول.
المريخابي قال لي : العجب تلفونو ما مقفول ..العجب ..ما عندو رصيد...(رصيدو نفد).
بعدين هو ذاتو يقفل تلفونو على شنو؟...ما في وزول ذاتو ح يضرب ليه.
هذا شعور عام في المريخ الآن ..أي واحد تجيب ليه سيرة (فيصل العجب)..يقول ليك هو فيصل العجب دا عاوز يلعب لي متين؟.
كفاهو ..عاوز يعمل شنو تاني؟.
الجماعة مضايقين منو شديد.
سيرتو بقوا يزحوا منها غادي.
نحن من زمان عارفين هيثم مصطفى وقت يمشي المريخ بنتهي ليك من (الأسطورة).
وقت هيثم مشى المريخ ..اتضحت حقيقة العجب.
العجب طلع (صفر كبير).
بقوا يعاملوه زي (مكسيم).
الجماعة لقوا هيثم مصطفى ..تاني يعملوا بي فيصل العجب شنو؟.
نكروه عديل كدا ..كأنهم ما بعرفوه...بقوا يتغابوا فيه (العرفة).
زمان في غنية بتنطبق على المريخاب الآن ..أغنية بتقول دي القمرا ..شن أسوى أنا بالنجوم.
شفتوا (نجومكم) ديل ..ناس بلة جابر وناس نجم الدين وضفر وفيصل العجب وسعيد السعودي ..ما بقسّموا مع هيثم مصطفى.
هسع ديل المريخاب كلهم عاوزين يتخلصوا منهم.
بقوا يتقارصوا منهم ..تقول كانوا بيلبعوا في فريق تاني.
بضايقوا منهم عديل كدا.
أي واحد تسألوا من فيصل العجب الآن بغني ليه أغنية عثمان الشفيع (أنساني وأنا بنساك) الأغنية التى كتبها عبدالمنعم عبد الحي...وأظن أن اللحن وضعه النطاس اللحني برعي محمد دفع الله.
أنساني وأنا أنساك
والحلوة القضيتا معاك
تصير مرّة
ونتقاسم مرار البين
أنا ويّأك
غرفة فيصل العجب في المعسكر ..كتبوا فيها الكلام دا ..(أنساني وأنا أنساك).
عشان كدا ..فيصل العجب طفش من المعسكر.
بقى يتعرض لمضايقات ...وتوريات من هذا النوع.
قالوا ليك تلفون فيصل العجب كلو اتملأ (رسائل) بهذا المقطع الذي عرضناه لكم....(أنساني وأنا بنساك).
قالوا ليه أنت شهر مايو دا كلو ما عندك شغلة ..بس اضرب تلفون لي فيصل العجب.
خليك (ضارب) على طول.
كمال دحية (بضرب) صاح.
تلفون يا جماعة ...ما تقعدوا تعاينوا لي كدا.
يعني ح يضرب (أسمنت).
انتوا مالكم بتلخبطوا الكلام.
يا جماعة ما صاح كدا ...برضو حركتكم دي ما لذيذة....العجب دا خلوه على راحتو.
ما صاح تضايقوه كدا.
عملتوها ظاهرة.
المريخابي بقى يمشي (حدائق السلام)..ويمشي شارع النيل ويقعد يغني لي فيصل العجب أغنية عثمان الشفيع (خلاص ما تنسى وأنا بنساك).
المريخاب عاوزين يفهّموا فيصل العجب الحتة دي بالعافية ..والعجب ما عاوز يتزحزح من مكانو.
حكاية أنو يخلى الكورة دي ..فيصل العجب ما عندو.
العجب دا ح يظل يلعب كورة قدم إلى أن يلعب في فريق درجة ثالثة.
كوّنو العجب ..يعتزل ليكم الكورة ..دي والله العجب ما عندو ..ولا بجاملكم في الحتة.
اعتزال شنو؟..البعتزلوا ليكم العجب ...انتوا جنيتو.
العجب دا ح يلعب كورة قدم إلى أن يصل إلى سن سيد سليم.
شفتوا لو مال بقى يدخل ليكم الإستاد بالعكاز ..ما بخلى الكورة.
يقولوا ليه قوم سخن يا العجب.
يقول للكوتش : قلت شنو؟.
قلت ليك قووووووم سخن يا العجب.
ما سامع ..قلت شنو؟.
سخن ..سخن ..يعني قوم جاري.
لمن يوصفوا ليه (التسخينة) وصف.
انتوا يا مريخاب ..موش هسع بتقولوا العجب بقى (تقيل).
شفتوا (التقلة) دي لو ما اتنقلت لي (اضانو) العجب ما بعتزل.
أوضحها ليكم اكتر من كدا.
بس يا جماعة الكلام دا ما يطلع من العمود دا.
ما ظريفة في حق العجب.
العجب دا ح يلعب كورة شفتو إلى أن يشير إلى (الكشافات) في ركن الملعب ..ويقول : رايات الكورنر ديل الليلة مالن طوال كدا.
يعاين للمرمى ...يقول ليكم : دا باب ناس منو؟.
نظرو ببقى كعب.
يعاين لي بلة جابر قاعد جنبو ..ويقول (وارغو) دا الرجعو المريخ تاني شنو؟.
العجب دا ح يلعب في المريخ إلى أن يصيبو (الزهايمر)...وما في زول يقول ليه كلمة.
المريخ يكون لاعب مع الموردة ...يفتكر الموضوع (تمرين)..تقسيمة ساكت.
الحكم يديه (كرت أصفر)..ينزلوا (رصيد) في الموبايل.
ما عندو (زهايمر).
يعني العجب ...لو ما وصل (السعبين)..ما بتكتب ليه (خطاب اعتزال).
خطاب الاعتزال ذاتو ..نحن مخططين في الهلال يكتبوا ليه (حفيدو).
عشان يكون في وفاء ..وإخلاص.
وأنا من زمان بقول ليكم : (نحن أي حاجة عندنا بي نظام).
نحن ما عندنا حاجة ساكت.
ما تقعدوا ..تتطقطقوا لي في (أصابعيكم) ساكت.
تتلفتوا متل (السلطة) الما فيها عجور.
طبعاً ما في أي علاقة بين (التلفت)..والسلطة الما فيها (عجور).
لكن أعمل ليكم شنو؟.
تلخبطوا الزول في (سنونو).
والجماعة بعملوا في شنو؟.
بغنوا للعجب في (أنساني وأنا بنساك).
والمريخاب بحاولوا يفهموه ..بحاولوا يوروه أنو الكورة دي نهايتها أصلها كدا..ولازم اللاعب في النهاية يعتزل.
حاجة طبيعية جدًا.
الجماعة قاعدين يغنوا ليه الأيامات دي :
حبيبي الدنيا يوم بتروح
لا بدوم لا فرح لا نوح
ونحن اليوم ورود بتفوح
غداً نصبح حطام أحلام
وتزرونا الرياح في الدوح
فليه قلبك تزيدو جروح
(حايمين) بيه من حديقة لي حديقة ..عشان يقتنع.
من حبيبي مفلس ..إلى حبيبي ملفس.
ما خلوا ليهم (حبيبي مفلس) ما مشوا عليها.
والله كلامك دا لو عملتوه في (العرس) ...كان هسع عقدتوا ليه.
الكلام الرومانسي دا فيصل العجب ذاتو ما بقتنع بيه ولا حاجة.
انتوا ذاتو والله يا مريخاب بتبالغوا ..يعني ما معقول ..ولا منطقي ...تجيبوا لي فيصل العجب (هيثم مصطفى) عشان يلعب في المريخ ..وتقولوا لي (فيصل العجب) اعتزل ، أنت كبرت.
دي ما بتبقى.
ولا هي مقبولة ولا منطقية.
والجماعة قاعدين يغنوا.
يشيلوا ويغنوا في أغنية عثمان الشفيع ..عشان العجب ..يفهم الرسالة ..ويقوم يتظارف كدا ..ويقول خلاص أنا عاوز أخلي خانتي.
اسمعوا يا جماعة ..ما تقعدوا (تترامسوا) فينا ساكت ..دي فيصل العجب ما بعملها ليكم.
ما تحلموا فينا ساكت.
العجب يكتب خطاب اعتزالو ...والله لو لعب فيصل العجب في فريق (المكريعة) درجة رابعة..ما يعتزل ليكم.
والجماعة بعملوا في شنو؟.
الجماعة قاعدين بغنوا:
حبيبي يا الظالم المظلوم
حبيبي يا الحالم المهموم
أفيق وأترك عزيز النوم
وأحلام تائهة في دنياك
هناك لو دام
سحابة يوم
حبيبي الدنيا ما بتدوم
والعجب عامل نفسو ما فاهم أي حاجة ...وحاجات زي دي فيصل العجب ..ما بفهمها ليكم.
وأن فهمها ..بعمل ليكم فيها ما فاهم حاجة.
حبيبي الما جفاك نضار
وما أضنت رؤاك أشواق
وما فجعت هواك أيام
وما كحلت سهاد عيناك
شربت من المودة دوام
ومن كأس السلامة سلام
خلاص أنساني وأنا أنساك
نتقاسم مرار البين أنا وياك
والله فيصل العجب ..لو جبتوا ليه فرقة (عقد الجلاد)..عشان يقتنع ليكم بالأغنية دي ما بتقنع.
قالوا ليك (سعيد السعودي)..ينزل ويطلع من المعسكر ..وهو بغني في الأغنية دي.
سعيد السعودي عاوز يوصل الرسالة لفيصل العجب ..باعتبار أن فيصل العجب لمن يعتزل ..سعيد السعودي سوف يصبح رسمياً كابتناً للمريخ.
دا طبعاً لو ما شطبوا سعيد السعودي.
الشيء الميحرني ..والما قادر افهموا إلى الآن.
هو أن المريخاب ..عاوزين يكرموا (جمال الوالي)..في مأتش اعتزال فيصل العجب.
يعني فيصل العجب ..ما راضين يعملوا ليه مباراة اعتزال منفصلة.
عاوزين يكرموا جمال الوالي ..ويقوموا بالمرة دا ...يقولوا لي فيصل العجب بالمناسبة دي يا فيصل العجب ..قوم اعتزل.
أها يا جماعة الكلام دا ..كدا بجي.
دي زي حكاية المغترب ..البكون مرتاح شديد ...ويقوم يرجع من الخليج ويقول عاوز يعرس.