…..و…. محمد عبد الماجد البلد دي لا فيها كهربة ولا رأس حربة """""""""""""""""" …و الزول وقت يكون ما عندو موضوع – بطلع التلفون يضرب ليه لي اي زول – اي زول وش كدا يلقاه يقوم يضرب ليه. المكالمة اول مرة ما بتدخل. الشبكة كعبة. تاني يرجع ليه. اول ما يرد عليه – يقول ليه وين انت الايامات دي؟. الايامات دي اي حاجة تمشي عليها يقولوا ليك (الشبكة) ساقطة. الشبكة (ساقطة) في السخانة دي. اي حاجة عندكم ماشه بالعكس. نحن ما عارفين ذاتو الصاح شنو؟. واحد عاوز يرخص عربيتو (11) يوم بمشي على ناس المرور. وكل ما يصل الشباك يقولوا ليه الشبكة (طاشة). عليكم الله نحن البقعدنا شنو؟..والشبكة ذاتها (طاشة). الشبكة ما انسترت. واحد من الناس مع الشبكات الطاشة دي قال احسن يمشي يشتري (الخروف). مشي لبتاع الخرفان. لقى ليك بتاع الخرفان زي (مدير البنك).. ما فاضل ليه إلا يربط ليه (كرفتة) ويجيب ليه (سكرتيرة). زولكم مسك ليه خروف ..وقال لبتاع الخرفان – الخروف دا كيف؟. بتاع الخرفان شغال في (واتس آبو). والخروف (مفسبك). بعد ساعة ونص – زولكم رفع رأسو..وقال ليه : والله الخروف دا متكلمين فيها. زولكم اتهجم ..زي الزول البدأ يقطع السلطة من البصل. زولكم قال ليه متكلمين عليه كيف يعني؟…(مرتبط) يعني؟. بتاع الخرفان ولا اشتغل بيه – الغريبة بتاعين الخرفان في الموسم دا ..كلامهم شوية – الواحد لو اداك كلمة ما بديك التانية. انا ما عارف ليه رافعين القزاز كلهم كدا. كلهم بقوا داخلين واتس آب. زولكم مشى ليه على خروف تاني – وقف جوارو زي (الاستوبر)..وقال لبتاع الخرفان – اسمع الخروف دا كيف؟. بتاع الخرفان تقول دكتور في غرفة العملية – رفع (النضارة) من عيونو ورجعها تاني (زي غطاء الحلة). بتاع الخرفان عاين للخروف (سمح)…ورجع تاني لي تلفونو – عمل ليه مجموعة من الحركات. ضرب ليه حاجات في رأسو. ثم قال للمشترى معليش (الشبكة طاشة). زولكم قال لبتاع الخرفان – هو شنو الطاشة؟…انا عاوز ارخص (الخروف). حتى الخرفان دخلت فيها (الشبكات الطاشة) دي. طبعا السودانيين ديل وقت يلقوا ليهم (سبب) بقوموا يتعذروا بيه في اي حاجة. الايامات دي (الشبكة طاشة) بقت عذر لي اي زول. البتأخر من المواعيد بقول ليك (الشكبة طاشة). البتأخر في العرس بقول ليك (الشبكة طاشة). الما اشترى خروف – بقول ليك (الشكبة طاشة). عملوا لينا طشاش في اي حاجة. بالمناسبة بتاعة (الطشاش) دي – عندنا واحد بدون مناسبة كدا قال احسن يمشي يكشف عند دكتور العيون. قال عيونو دي ما حصل راجعها عند دكتور عيون. كدا اليمشي اليشوف الحاصل شنو؟. يا ريت لو ما مشى. زولكم اول ما الدكتور عاين ليه كدا – قال ليه انت عيونك دي شغال بيها كيف؟. دي في الاساس قاعد تشوف بيها كيف؟. زولكم اتهجم – الدكتور دا مالو عاوز يشفقنا؟. والدكتور (يبسبس) ليك في شفقتو. تقول دارستو في الطب كلها كانت في (البسبسة) دي. يا دكتور في شنو؟. والدكتور مواصل في مشروع (تشفيقو). لا – لا – لا ما معقولة…انت عيونك دي منتهية عديل كدا ..انت في الاساس وصلت هنا كيف؟. يا دكتور في شنو؟..لو في اي حاجة قولها لي. زولكم افتكر الدكتور اكتشف (داعش) في عيونو. الدكتور عندو (شفقة) مبالغ فيها. طلع ليكم الزول عندو ضغط في العين ..وعندو شنو كدا في الغشاء الداخلي للعين وعندو التهابات حادة في الشبكية – وعندو مشكلة عويصة في انسان العين. والحاجات دي كلها مافي. ما في اي حاجة من الحاجات البقول فيها دكتور العيون دا. يا ربي الدكتور دا قرأ طب (مطالعة). يا ربي الدكتور دا ادكتر (سمع). بقى طبيب بالشمومة. وإلا بالواتس آب. والله الواحد بقى يخاف. الواحد بقى تدخلو خوفة مع (الواتس آب) الحايم الايامات دي. في كلية طب بالواتس آب؟. طيب الخلل دا طالع من وين؟. المشكلة في شنو؟. المهم اقنع ليك الزول انو عندو مشكلة في (الشبكة). المعنى (الشبكة) طاشة. صاحبكم تاني يوم جاء الخرطوم. الدكتورة قالت ليه الكلام القالو ليك الدكتور داك ما عندو اي اساس من الصحة. لا من بعيد ولا من قريب. انت ما عندك اي مشكلة وعيونك ستة من ستة. ما في اي مشكلة. بالله يا جماعة الدكاترة النص – نص ديل وصلوا حتى لعيونا. العيون دا والله ما بتستحمل التجريب. ما بتستحمل (التخريب). يعني (دكتور) قرأ الطب في حدايق (حبيبي مفلس) عليكم الله ما تجيبوا لينا. الحاجة البتقنعنا نحن من (عيونا)..اننا والله العظيم بنكتب (والكهربة) قاطعة. تتخيلوا زول بكتب بالشمعة في اللاب توب. وسخانة …سخانة (شية جمر). الخروف من غير ما تضبحوا بتطلع شية جمرو. سخانة الف. تتخيلوا مع الكهربة القاطعة دي – العداد شغال. العداد بجر. لاشفنا كورة برشلونة ولا سمعنا بيها. ويقولوا ليك (السد). انتوا كهربة السد دي مشت وين؟. اتضح كدا ان كهربة السد (موبايل) ما بتشحنو. كلام ساكت. طلعتوا اي كلام. ويا ريت الحكاية لو وقفت على كدا. البلد دي مع كهربتها القاطعة دي ..ما فيها (مهاجمين). البلد دي ما فيها (رأس حربة) واحدة. عشان كدا ابقوا عشرة على ناس كاريكا وبكري المدنية وصلاح الجزولي ومحمد عبدالرحمن. البلد دي تاني ما فيها (مهاجم). وقية (مهاجم) البلد دي تاني ما فيها – اخر واحد واقفين فيه بكري المدينة. و… وشنو تاني مع الضلمة دي. ما تقول اي حاجة. ابقى طالع. و… …. انتهى.