….و… محمد عبد الماجد (بخيت) خميس من الليلة اسمو (بيد) خميس …و والله فعلا (بخيت). تضربها بي (يدك) عديل كدا – تقول راكب ليك في ناقة – والحكم ما يحتسبها (ضربة جزاء). في (بخت) اكتر من كدا. اقصد في (خبط) اكتر من دا. انتوا الفاضل ابوشنب عندو (ضربة الجزاء) كيف؟. تلقى ابوشنب دا (ضربة الجزاء) عندو إلّا يحصل فيها (4) حالات وفاة و(11) اصابة خطيرة عشان يحسب لينا (ضربة جزاء). ضربة الجزاء عند ابوشنب إلا يكون فيها (مجاعة) – ونزوح ولجوء سياسي وضرب نار ، ودم للركب. الزول دا ما بحسب ليه (ضربة جزاء) بالساهل. الصفارة الشايلها يكون معطّل فيها (صفارة) ضربة الجزاء. او احتمال ما يكون درسوهم (ضربات الجزاء). او يوم الدرس دا بالتحديد – الفاضل ابوشنب ومعاه حكم الراية كانوا مسجلين (غياب). و… (وشنو تاني؟). بخيت خميس دا من الليلة ح نغير ليه اسمو. تاني ما نسمع لينا زول يكورك ليه بخيت خميس. اوعكم نسمع الاسم دا. (بخيت) خميس دا من الليلة اسمو (بيد) خميس. عاوز اسأل ناس الاتحاد. عاوز اسأل فيصل سيحة. طبعا ما ح اسألو في الكيمياء. ولا ح اسألو في الفيزياء. ولا في الاحياء. ولا حتى في الجغرافيا. ح اسأل سيحة واقول ليه الفرق شنو بين (ايد) سيدي بيه – و (ايد) بخيت خميس. بخيت خميس دا كراعو في ايدو. البخلي الاولى (ضربة جزاء) والتانية لا – شنو؟. عاوز اعرف. ايد بخيت خميس مطلعين ليها تصريح باللمس من الاتحاد الدولي لكورة القدم. خلوها (الفيفا). جبتوا ليها اذن – من الاتحاد السوداني. والله (ايد) خميس اوضح من ايد سيدي بيه. و… (اكمل). جمال الوالي في بطولة كأس السودان – (البطولة التانية) عمل ليه احتفالات – وطلع لجماهير المريخ في الشارع. هسع جمال الوالي مفروض يعمل نفس الشيء. وصافة الممتاز اعلى من لقب بطولة كأس السودان. على الاقل وصافة الممتاز بتخليك تمثل السودان في البطولة الكبري. لكن بطولة كأس السودان – إلّا توديكم (سيكافا) – ما عندها اي فرصة مشاركة في بطولة خارجية. اذا كان انتوا في بطولة كأس السودان بتحتفلوا في الشارع – نحن في (الممتاز) نعمل شنو؟. كأس السودان ما تجيبوا ليه اكتر من شريف الفحيل. نحن بطولة الممتاز ح نجيب ليها (كاظم الساهر). يعني (كمال ترباس) العراق – إلّا يقولوا ليكم الكلام بالسوداني – الموضوع اصلو ما بقع ليكم بالساهل. لو ما عملوا ليكم (مقارنات) ما بقع ليكم. و… (افتح صفحة جديدة). انا من البداية كنت عاوز اتكلم عن قناة قوون ونقلها للمباراة بصورة رجعتنا الى العصر الحجري. في العصر الحجري هل يتم نقل المباريات على هذه الطريقة؟. اظنهم كانوا اكثر تقدما مما حدث في قناة قوون. اعرف ان قناة قوون على قمتها الادارية الشاعر ازهري محمد علي الذي حقق فيها نجاحات ادارية كبيرة. واقدر تبريرات الزميل خالد ماسا – لكن كل ذلك لا يمنعنا ان ننقد قناة قوون التى فشلت في النقل. واحترم اجتهادات الرشيد بدوي عبيد رئيس التحرير في ما حققه من نجاح في القناة. واحفظ لرمضان احمد السيد ما خطه من دمه وعرقه ويراعه لكي تقوم القناة وتخرج للناس بكل البهاء. لكن كل ذلك لن يمنعنا من ان نهاجمها. ولا خير فينا ان لم نقلها – حتى لو كان قولنا ذلك يمكن ان يجرح صديق او يحرج صاحب. امس قناة قوون كانت في اسوأ حالاتها وهي تفشل في نقل مباراة يبعدها عن مقرها الرئيس بعض كيلومترات. وبالطبع لن ننجر وراء قناة قوون وننتقد جهات (مجهولة) كما شاروا لها في القناة وقالوا انها تسببت في قطع الاشارة او في التشويش على البث. نظرية (المؤامرة) طبعا نحن تسيطر على كل افكارنا – اي خلل او تقصير نرده الى مؤامرة كبرى. وان حدثت مؤامرة وتدخلت ايادي خارجية وتسببت في عدم بث المباراة كاملة على الهواء – ذلك لا يعفي قناة قوون وادارتها. ولا يجعل قناة قوون تظهر لنا كما ظهرت امس في شكل (الضحية) او القناة المستهدفة. اذا كانت القناة غير قادرة على حماية حقوقها ..وبث المباراة بصورة خالية من (التشويش) عليها إلّا تدخل في سباق النقل. اسوأ من ان تسهتدف ان تكون (ضعيفا) غير قادر على حماية حقوقك. ربما تجربة قوون الحديثة تجعلها تفتقد للتدابير التى تجعل القناة تقدم المباراة بصورة مكتملة. لكن وان ضعفت الخبرات – يجب أن لا تحمّل اخفاقات القناة الى جهة خارجية – القناة حتى لم تجد (الجرأة) الكافية للاعلان عن تلك (الجهة) لأنها لا تملك مستند او معلومة مؤكدة. فكانت تهاجم في المجهول. من السهل ان نخلق (اعداء) من اوهامنا – ونلاحقهم ونلعنهم ونسبهم كلما كان هناك (قصور). اذا كان هناك (استهداف) للقناة – وتدخلات خارجية لتعطيل نجاحات القناة – فان ذلك الامر لا يهم المشاهد كثيرا. تلك امور داخلية – على القناة ان تحسمها قضائيا او اداريا – لا يعني المشاهد مما حدث وما سيحدث شيء. يهم المواطن ان تكون القناة التى تنقل له المباراة قادرة على النقل – وقادرة على حماية بثها. قناة قوون ذكرتني بقناة الجزيرة (بي ان) التى تنقل المباريات من اخر الدنيا ومن مناطق مجهولة في افريقيا وفي امريكيا اللاتينية وتقدم في الساعة الواحدة اكثر من (10) مباريات تلعب في مناطق مختلفة من العالم في وقت واحد – وتعتذر ان حدث عطل لبعض ثواني بخلل حدث من المصدر. قناة قوون امس اعتذرت بنفس العذر التى تعتذر به قنوات (بي ان) ..وقالت تعذر نقل الصورة من المصدر. تفتكروا (المصدر) وين؟. لا في الجابون ولا في بيرو. المصدر في استاد الهلال – الذي يبعد عن القناة (40) كيلو متر. يعني بي موبايل كان يمكن ان تنقلوا المباراة – ناهيك عن (قمر صناعي) غير قادرين على تأمين تردداته. بعدين اذا كان ناس التلفزيون القومي وقناة النيلين عندهم تلك (القدرات) التخربية – كان نافسوا الجزيرة. التشويش يحدث من عصابات وقراصنة تخصصوا في ذلك المجال- ولا احسب ان هناك خبير واحد في السودان قادر على تعطيل بث (رسالة) – سيبك من بث مباراة. ناس قناة قوون ديل (فيوز) ممكن يجهجهم ويقطع ليهم (البث). نحن الى الان ما وصلنا مرحلة (التشويش). لسه نحن المرحلة دي بدري عليها. خربتوا لينا بطولة الهلال. وجهجهتوا لينا (فرحتنا). اسوأ من كل هذا ان القناة بعد المباراة اعلنت عن تقديم المباراة واعادتها وقدمت فاصل اعلاني اكثر من (30) دقيقة. وبعد ذاك الكم من الاعلانات بدلا من ان يقدموا اعادة المباراة – قدموا جولة الملاعب ، وجابوا ليهم زول برمي الجله. كمان بتغشوا المشاهد. برضو (الاعادة) فيها (تشويش). و… انتوا الموضوع دا ممكن يكون من (المعارضة). احتمال (التشويش) دا من (الجبهة الثورية). يا زول اطلع. انت كدا قاعد تغلط. طلعنا. و… وانتهى .