بالعربى الكسيح محمد الطيب المريخ يجدد عقد (وديدي) ويُجنس الفاضل أبو شنب!! * نفس (العيون) البتبكي من (الحزن) هى نفسها البتبكي من (الفرح).. * (الدمع) هو رسول الفرح والحزن.. * يعني هسه لو ختو ليك (دمعة زول) في (كباية) ما بتقدر تعرفها دي دمعة فرح ولا دمعة حزن..
* والكلام ده بيعني إنو الضحك عموما شغال بشريحتين.. * الضحك عندو (شريحتين) ممكن تضحك لأنك مبسوط وممكن تضحك من (المغصة) والزعل.. * وفي الايام الفاتت إحنا نفس الدموع البنبكي بيها على حال مجلس الكاردينال (حزنا) هى ذات الدموع التى نبكي بها على حال المريخ ونحن مبسوطين.. * نضحك ضحكة واحدة ونقصد بهذه الضحكة الهلال والمريخ.. * بنضحك مبسوطين من حال الوصيف وبنضحك ممغوصين من ناس عماد الطيب.. * عماد الطيب قاعد متصور مع فيصل موسى ويضحك أ تقول سجل لينا (شيكبالا).. * هسه تسجيل فيصل موسى داير ليهو ضحك؟؟ * غايتو جنس غايتو؟؟ * المهم.. * ناس المريخ وبواسطة اعلامهم السالب قالوا ان بكري المدينة قال لهم: (البيقعد مع جمال الوالي ما بيقوم).. * طيب تراوري قام كيف؟؟ * وباسكال قام كيف؟؟ * ولا ديل ما قعدو مع جمال الوالي.. * ديل قعدو مع (عزو) ولا شنو؟؟ * قال البيقعد مع الوالي ما بيقوم.. * باسكال ده قام وجرى جري عديييل.. * انتو فيصل موسى جرى منكم.. * إحنا الايام الفاتت دي كنا مركزين مع الهلال ومارسنا نقد الذات لأن حب الهلال اكبر من الكتابة عن مريخ الحكومة.. * لما يكون الهلال في أزمة ما بنشتغل بالوصيف.. * والوصيف أصلا لو سجل كريستيانو السنة الجاية بيكون وصيف الهلال.. * وإحنا لما غضبنا من تسجيل بكري للمريخ ما عشان بكري بيعدل حال المريخ المايل.. * لا لا أبدا والله.. * المريخ ده ما بنعدل أصلا.. * ده فريق ممحوق.. * فريق فيهو حاجة غلط عشان كده ما بيمشي لقدام.. * كل سنة بيكون وصيف.. * غضبنا لأنو بكري ممكن مع مجموعة الهلال يعمل حاجة وكنا نود ان نصدره للعالم.. * الفريق السودانى الوحيد البيصدر محترفين هو الهلال.. * وآخرهم كان بشة.. * والفريق الوحيد في الدنيا دي البيجيب محترفين وما بيصدر هو الوصيف.. * الهلال كبير رغم البيعمل فيهو (مجلس الشاعر).. * الحركات البيعمل فيها الكاردينال دي برضو ما بتأثر في الهلال.. * بكرة الكاردينال يمشي ويبقى الهلال عظيما.. * الكاردينال مسكوهو في (كلمة دماء جديدة) بقى ما بيعرف غيرها.. * اي حاجة يقول ليك دماء جديدة.. * وهو في الحقيقة ما عارف اي حاجة. * قاعد ساكت.. * والله الكاردينال ده يقعد يتلفت كده ويقضيها لينا دبي ولندن لما تلقو نزار حامد لحق الباقين.. * لا تلمو في نزار ولا تلمو في حامد.. * مش الكاردينال قال ما دايرين ناس مهند عشان كبار في السن؟؟ * بكرة يقول ليكم ما دايرين نزار حامد لأنو (طويل في السن).. * نزار ده جددو ليهو عقدو من هسه، أنا عارف نزار فترتو ما انتهت لكن برضو جددو ليهو.. * جددو ليهو يا عماد الطيب عشان لما تظهر في الصورة وانت بتضحك تكون بتضحك ليك في حاجة بتستاهل.. * وبمناسبة التجديد.. * أنا داير أذكر جمال الوالي بحاجة عشان ما ينساها مع زحمة التسجيلات.. * بقول لجمال الوالي الشهير ب(عزو) لازم تجدد عقد الحكم (وديدي).. * وكمان بالمرة حاول (جنس) الفاضل أبو شنب.. * الفاضل أبو شنب بعد الذي فعله للمريخ في لقاء القمة الاخيرة يستحق ان يتم تجنيسه.. * دي نصيحتي ليك يا عزو.. * وأي زول طبعاً حر في (نصايحو).. * الجماعة شدة ما قروش بكري المدينة كتيرة اي زول دخل يدو. * اي قطب من اقطاب المريخ بقى يقول ليك أنا ساهمت في صفقة بكري.. * القروش كتيرة شديد عشان كده الاقطاب بقو يكضبو.. * المال السايب بيعلم الكضب.. * أمبارح جمال الوالي الذى هو (صراف آلي) قال هو الذي تكفل بكل نفقات صفقة بكري المدينة.. * سجلو بكري وإختلفو في من الذي دفع قروش بكري.. * ادم سوداكال لما شاف الموضوع سمح وبيعمل نجومية مشى يفاوض مهند الطاهر.. * والله لو جبتو انيستا المريخ يا هو المريخ . * إحنا ممكن نكون اقوى بوجود بكري واخوانه ولكن انتم ستكونوا أضعف بوجود بكري وبقية الدراويش العندكم.. * وهذا هو الفرق.. * بكري في الهلال بيصفق لأنو معاهو ايادي أخرى لكن في المريخ بتكون اليد الواحدة الدايرة تصفق هى يد بكري وكده ما بينفع طبعا.. * الكشف بتاعكم ده علي بالنعمة تطلعو منو رمضان عجب تاني ما في زول بيفرزكم من مريخ كوستى.. * هوا ساكت.. * من هسه أنا بضمن لبكري المدينة (كاسين) في الموسم الجاي.. * الكاس الاول هو كأس بطولة (حوض البط) التى سيتم تنظيمها بالخرطوم بعد خروج المريخ من الابطال.. * والكاس التانى هو كأس الدورة الرمضانية التى سينظمها المريخ بالخرطوم عقب سقوطه من الممتاز.. * قلتو لي البيقعد مع جمال ما بيقوم؟؟ * شكلو باسكال ده قام لأنو قعدتو مع سوداكال.. * سوداكال ب(العاء).. * و..و.. * وجينا بعد الفرقه نسأل…(وين الباشا المنسي) ؟؟