محمد عبد الماجد شمس الفلاح وابراهومة قالوا ما بلعبوا (تمهيدي) …و عارفين سبب المشكلة شنو في المريخ؟. المريخاب السنة دي مشاكلهم تقول يا غربتي…من قولة تيت…مدورين. مشكلة شمس الفلاح وابراهومة…(دي غير مشكلة عبدالصمد وصديق علي صالح). الاولاد الصغار ابعدوهم من بعثة المريخ المتجهة الى القاهرة – بينما سيلحق بالبعثة الغاني المصاب (اكرا). يدربوا في اولاد الناس – الماصبين كمان – واولاد المريخ – اولاد المراحل السنية لا. مثل هذه المعسكرات اكثر المستفيدين منها – هم اللاعبون الذين يكونوا في سن شمس الفلاح وابراهومة. اكيد (الزعل) العريض في المريخ سببه ان شمس الفلاح وابراهومة قالوا ما بلعبوا في (التمهيدي). ما بلعبوا في دور ال (64). ليهم حق – فتروا من الكلام دا. ابراهومة وشمس الفلاح قالوا نحن كبرنا على (التمهيدي). الاولاد عندهم طموح. عندهم مستقبل – عندهم (كرامة). عليك الله هسع (الكرامة) الدخلها في موضوع (التمهيدي) شنو؟. انت ساكت شايلها مع الجماعة ديل. التمهيدي نحن عندنا في الهلال متل ملاح القرع .. ما بقع لينا ، ولا بنقبلو. المهم الظاهر كدا شمس الفلاح وابراهومة قالوا ما بلعبوا في (التمهيدي). يمكن بعمل ليهم (تتنوس). يمكن بعمل ليهم (تسمم). بقلب ليهم بطنهم. القطاع الرياضي في المريخ قال ليهم (بلة جابر) بيلعب في التمهيدي منذ ان كان بلعب في (حي العرب) ما قال كلامكم دا…انتوا كمان اولاد متين؟. ناس العجب كانوا بلعبوا (تمهيدي). هيثم مصطفى قاد الهلال (17) سنة – جاء المريخ لعب (تمهيدي). احترام مافي. ما في اصلو تقدير. تجوا انتوا يا شمس الفلاح ويا ابراهومة تقولوا ما بنلعب (تمهيدي). المريخاب عمرهم كلو بلعبوا في (التمهيدي) – ما في لاعب واحد طلع قال كلامكم. من زمن استاد المريخ كان (حفرة)…والمريخ بلعب في التمهيدي. ضفر وبلة جابر وعلي جعفر والريح علي ذاتو…بلعبوا تمهيدي. زمن الاستاد فيه بوابة واحدة – بوابة زنكي تلات ضلفات. زمن التسجيل في المريخ كان بعربات (الاتوس). والاعارة كانت ب (اللستك الاسبير). وحافز المباراة كان رصيد ب (5) جنيه. والعقوبة كانت الحرمان من الغداء. يعني تتوقعوا شنو؟…من ناس عندهم (البوفيه المفتوح) زي بطولة الدوري الممتاز. و… (اقلبوا الصفحة). صفحة شنو البنقلبها …نحن فتحناها متين؟. ناس المريخ سمعوا شمس الفلاح وابراهومة بتكلموا عن (التمهيدي) – قالوا ليهم انتوا قعدتوا مع ناس الهلال وإلّا شنو؟. الكلام دا اصلو ما بتقوله لو ما قعدتوا مع ناس الهلال. كلام الهلالاب ظاهر. الواحد من يجيب ليك سيرة (التمهيدي) ويقعد (يشنف) في دور ال (64) – اعرفوه هلالابي. اصلهم الهلالاب كدا. ما بحبوا (التمهيدي). يشوفوا العمى ما يشوفوا (التمهيدي). عشان كدا من شمس الفلاح وابراهومة جابوا سيرة (التمهيدي) – ناس المريخ طوالي قالوا الجماعة ديل قعدوا مع ناس الهلال. لو ما قعدوا مع ناس الهلال ما بقولوا كلامهم دا. التمهيدي دا ناس المريخ ما عندهم معاه مشكلة. الحركات دي حركات ناس نزار حامد…وبشه. يشوفوا الموت وما يلعبوا في (التمهيدي). قالوا ليك (مكسيم) حارس الهلال الكاميروني ..وقت قال لي اهلو في الكاميرون انا ماشي ألعب في السودان – ابوه قال ليه اسمع لو لعبت لي في (التمهيدي) تاني البيت دا ما تدخلو. مكسيم قال ليه (تمهيدي) شنو انا ماشي ألعب في الهلال ..لا ح ألعب في المريخ ولا الخرطوم الوطني البلعبني في (التمهيدي) شنو؟. نحن الهلالاب طبعا (التمهيدي) عندنا عيب. و…. (وشنو تاني؟). شمس الفلاح وابراهومة الشافهم في الهلال ما كضب. شكلهم شكل رديف الهلال. شغلكم معاهم شغل (قنع) يا مريخاب. مجلس المريخ قال وقت الاولاد ح يمشوا الهلال – نحن ندربهم ونمرنهم للهلال ليه؟. مفروض شمس الفلاح وابراهومة يمشوا يقعدوا في بيوتهم زي هيثم مصطفى. بدل ما يتعرضوا لحرب ساكت في المريخ – افضل ليهم يمشوا يقعدوا في بيوتهم. و… (اكمل ليكم). قالوا ليك غارزيتو وقت قالوا ليه عمر بخيت الهلال ما جدد ليه ..انفقع بكا. الزول دا كان تسجلوه اول لاعب في المريخ. تفوتوه كيف؟. يعني شنو؟. يعني الذين سجلهم المريخ كلهم – عمر بخيت الذي استغنى منه الهلال افضل منهم. بما في ذلك الارتكاز النيجيري سالمون. المريخاب براهم شهدوا بذلك. وقالوا كلامهم دا في جرايدهم. اللاعب الذي استغنى منه الهلال افضل من كل الذين سجلهم المريخ. يا خسارة التسجيل. يا خسارة الاعارة. يا خسارة التجنيس. مجلس المريخ قال لي غارزيتو ..عمر بخيت ما مشى بعيد …مشى الاهلي الخرطوم. يعني يا غارزيتو ممكن المريخ والاتحاد العام دا يجيب ليك عمر بخيت في فبرائر. في رأس السنة دي – ممكن الاتحاد العام يعمل تسجيلات خاصة للمريخ. غارزيتو جاب ولدو انطونيو. وسأل من عمر بخيت. ومعاه علاءالدين يوسف وبكري المدينة والباشا وعبده حابر والمعز محجوب. ديل مفروض تفتحوا ليهم استاد الهلال يجوا يتمرنوا فيه. مفروض المريخاب يكملوا جميلهم ويجيبوا خالد بخيت. ومحمد ابوشامة. غارزيتو لا بشتغل ليكم مع ناس محسن سيد وبرهان ولا حاجة. ولا بتفق مع بكري المدينة وعلاءالدين يوسف. وزي ما بقول الزميل محمد كامل ..بكرة نقعد تحت الحيطة ونسمع الزيطة. اصبروا بس انتوا؟. و…. انتوا تعالوا هنا. نجي وين؟. التمهيدي باقى ليه كم يوم؟. قربتوا لي تمهيدكم. و… انتهى…….. ق سبورت