….و…. محمد عبد الماجد شعار المريخ الجديد قالوا فيه (هلال) """""""""""""""""""""""" …و قالوا ناس المعز محجوب شكلوا ضغط على مجلس المريخ. بقى عندنا في المريخ اكتر ما عند المريخاب في المريخ. النص بالنص. دا غير (البص) – وبيت الهلال. قالوا – (والكلام دا ما يطلع من العمود دا) ، لو طلع بعمل مشكلة.
قالوا ناس المعز محجوب اشترطوا قبل التوقيع وضع (هلال) على شعار المريخ. زي ما جامع نادي المريخ فيه (هلال ونجمة)….الشعار ح يكون فيه (هلال ونجمة). غريبة عليكم انتوا يعني. متعودين. انتوا لاقين …بختكم (تلقاكم الفرحة شارطكم). و…. (قلت شنو؟). شعار المريخ في الموسم الجديد قالوا فيه (هلال)…يقولوا ليكم الكلام مية مرة. حاجة عادية. حاجة طبيعية. اختصروا الموضوع. بدل اللفة الطويلة دي. اعملوا ليكم (هلال) في قميص المريخ – وريحونا من الحاجات دي. عشان تاني ما نسألكم. ولا نقول ليكم حاجة. لا نقول ليكم المعز محجوب لا نقول ليكم بكري المدينة. ولا نقول ليكم غارزيتو. اخدوا راحتكم على الاخر. مالكم قاعدين (تستغربوا) لي كدا؟. ما تستغربوا ساكت. جنكم (استغراب). الواحد من يقول ليه حاجة تقوموا تشيلوا (استغرابكم) وتقعدوا برة البيت – في الشارع. ما عندكم شغلة غير (الاستغراب). هسع يا جماعة الله – المريخ دا نحن عندنا فيه كم زول؟. ابدأوا الحكاية من المعز محجوب …(انتوا فاكرين نحن بنخلي حقنا). مرورا بالباشا وعبده جابر وتراوري وبكري المدينة. وعلاءالدين يوسف ذاتو. وغارزيتو. وابن غارزيتو. حقنا ما بنخليه. طيب بدل الجرجرة دي – ما تعملوا ليكم (هلال) صغير كدا فوق النجمة ..ويبقى زيتنا في بيتنا. او زيتنا فوق بيتنا. حالتنا واحدة. اصلو ما مختلفين. خليفة ذاتو لو عاوزنو – ممكن نجيبوا ليكم زي (اكرا) من الاهلي الخرطوم. ما في اي مشكلة. بس ختوا لينا (هلال) في صدر لاعبي المريخ. لاعبي المريخ شنو كمان؟. ديل لاعبي الهلال. عاوزين تغالطوا. بطلع ليكم ورقة وقلم – واقعد احسب ليكم الحكاية من المعز محجوب لى بكري المدينة. وكلتشي وريتشارد ومجاهد وعلاءالدين بابكر وهيثم طمبل. ديل وقت ما لقوا كرنقو…عارفين عملوا شنو؟. جابوا اخوه. ما لقوا كرنقو. جابوا اخو كرنقو. اها في (تقليد) اكتر من كدا. ختوا ليكم (هلال) وريحونا – نحن ذاتو فترنا من الموضوع دا. مية مرة يقولوا ليكم الكلام. ويعيدوه ليكم. وانتوا عاملين فيها ما فاهمين حاجة. مكن تعتبروا (الهلال) هو الراعي الرسمي للمريخ. وبالطريقة دي ما في زول بسألكم. تختوا (الهلال). ناس مزمل ابوالقاسم وبابكر سلك ومعاوية الجاك وهيثم كابو يمكن يعترضوا في الاول. يمكن يقولوا ليكم لا في البداية. زي ما قالوا عندما سجل المريخ هيثم مصطفى. لكن تاني عادي جدا يوافقوا. والموضوع بقع ليهم تاني. ببقى ليهم عادي. انتوا فاكرين الموضوع بقيف عند وضع (هلال) في شعار المريخ في الموسم الجديد. الموضوع ما بقيف هنا. ناس المعز محجوب ديل …ح يستلموا المريخ. ويمكن كمان يغيروا مجلس الادارة. انتوا قايلين غارزيتو الجابو المريخ شنو؟. ناس المريخ شن خبرهم بي غارزيتو؟. بعرفوه من وين؟. غارزيتو جابوه ناس المعز محجوب. طيب اقول ليكم (دليل) تاني. انطونيو ولد غارزيتو الجابو شنو؟. جابوا احمد الباشا. اولادنا شغالين (هلهلة) شديدة للمريخ. ناس بكري المدينة اتحركوا. قالوا بكري والجماعة المعاهو متحركين عشان يجيبوا ليهم (خالد بخيت) مدير للكورة. ما عاوزين عادل ابوجريشة. وقالوا رئيس بعثة المريخ في القاهرة برضو عندهم فوقو رأي. قالوا عاوزين (امين زكي) يكون رئيس بعثة المريخ في القاهرة. قلنا ليهم طيب الهلال المسافر الى الامارات يكون رئيسو منو؟. قالوا لينا الهلال فيه كوادر كتيرة – الهلال ما عندو مشكلة. المشكلة في المريخ. المريخ خلاص بقى (هلالي) اكتر من الاهلي شندي. قالوا ليك اتحاد الكورة ببحث عن تعديل اللائحة. لائحة شنو كمان في البرد دا؟. لائحة غير (البطانية). بطانية شنو؟. انت عاوز تلخبط. الاتحاد قالوا عاوز يعمل تعديل في اللائحة. عارفين الاتحاد عمل شنو؟. الاتحاد قال تاني اي انتصار يحققه المريخ النقاط الثلاثة توزع على ذلك النحو. نقطة تمشي للمريخ (ما عندنا عليها اعتراض) – احتراما لتاريخ المريخ ولاسمه وللبطولات الجوية. ونقطة تانية قالوا تمشي (للحكام). انتوا الحكام ديل يحققوا ليكم في الانتصارات …وما عاوزين تعطوهم (نقطة). النقطة الثالثة عارفين ح تمشي وين؟. ح تمشي للهلال. عندنا (9) لاعبين في تشكيلة المريخ من الهلال غير الجهاز الفني – وما عاوزين تدونا (نقطة). تاني اي انتصار يحققو المريخ ما عندكم غير (نقطة). اللائحة دي ح يجيزها في اجتماع الاتحاد القادم – لو اسامة عطا المنان ومعتصم جعفر ما اتعنصروا لمريخهم. المواضيع كدا تاني ما بتمشي. ما تقعدوا تزعلوا لي ساكت. وتقعدوا تستغربوا لي في الشارع كدا. حقنا تاني ما بنخلي. ومن هسع ح نبدأ في تغيير الشعار. علقنا (هلال) في جامع نادي المريخ. وماشيين على الشعار. و… انتوا تعالوا هنا. عاوز تقول شنو؟. صحي الكابتنية في المريخ ح يمنوحها المعز محجوب. مفروض كدا. انتوا ما عندكم كبير. ما في لاعب بستحق كابتنية المريخ اكتر من المعز محجوب. و.. انتهى..
