محمد عبد الماجد الخانة في الهلال ممكن تطلع ليها (بدل فاقد) في المريخ ….و….. الحكومة دفعت في بكري (المدينة) مليارات اكتر من التى دفعتها في (المدينة) الرياضية. يعني انتوا (المدينة) الرياضية دي إلا يسجلها ليكم (الهلال) عشان تدفعوا فيها قروش. لو في (صور) في المدينة الرياضية – كان بدفعوا فيها قروش. لكن (المدينة) الرياضية ما فيها صور ولا فيها اضواء ولا اعلام – ولا عندها جماهير. و… (حتة تانية). واحد قال لي (المليارات) التى دفعها المريخ في بكري المدينة كلها قروش الحكومة. قلت ليه عرفت كيف؟. قال لي تاني يوم من تسجيل بكري المدينة في المريخ مشيت وزارة المالية لقيت ما في سيولة. عرفت ليك طوالي (المليارات) مشت وين؟. مرتبات المعلمين بتاعة نوفمبر قالوا اتأخرت – الى الان ما صرفو (في دليل اكبر من كدا). المرتبات شالها بكري المدينة. وقالوا ناس حوادث الخرطوم قالوا ليهم انتظروا (البنسلين) بنجيبوا ليكم بعد (التسجيلات) ما تنتهي. ما في بناسلين هسع – البنسلين شالوا بكري المدينة. وقالوا ناس البرلمان وقفوا (الحوافز والنثريات) قالوا المريخ بمر بي حالة (تسحيلات). الحوافز والنثريات شالها بكري. البلد في حالة (دعم) وطني للمريخ. انتوا فاكرين نحن بنريحكم – يمين ح تتعبوا معانا جنس تعب. ح نبدأ نحرسكم من دور ال (64). بعدين انتوا تعالوا هنا علاقة مصرف المزارع بي تكريم الحارس اليوغندي جمال سالم شنو؟. ايه الدخل (الزراعة) في الموضوع دا. قالوا ليك مصرف المزارع يكرم جمال سالم وواقفين متصورين معاه. بدون خجل كدا. يا رجال ما تشوفوا زراعتكم وين؟. دا شنو الكلام الفارغ البتعملوا فيه دا؟. جمال سالم ح يبقى ليكم (قمح). جمال سالم ح يبقى ليكم (قطن). جمال سالم ح يبقى ليكم (بصل). جمال سالم ح يبقي ليكم (فجل). بتكرموه ليه؟. الزراعة اطينت في ستين نيلة – كمان عاوزين تطينوا لينا الكورة. اصلو ما في حاجة تخلي بنك المزارع يكرم الحارس جمال سالم. انتوا لو عاوزين ليكم صور – لو عاوزين ليكم جرايد كرموا ليكم زول بستحق. كرموا عبدالكريم الكابلي. كرموا محمد علي ابوقطاطي. جمال سالم شنو البكرموه. تقول شارك في معركة (كرري). بعدين يا ناس مصرف المزارع – الهلال دا ما فريق اجنبي. والهلال دا هو الفائز ببطولة الممتاز – البخليكم تكرموا حارس (الوصيف) شنو؟. قلنا ليكم قروش الحكومة ظاهرة – مرات بتظارف وتقوم تظهر كدا في شكل (وشاحات وظروف). الحاجات دي نحن عارفنها. نحن حافظنها. درسناها مع (الاملاء). اها (الاملاء) دي بالذات تاني ح اكرهم بيها. ح احددها ليكم. قروش الحكومة ظاهرة. من تلقى اللاعب شايل صورة جمال الوالي في تسجيلو اعرف طوالي دي قروش الحكومة. لكن قروش الحكومة دي اصلو ما بتودي لي قدام. بتطلع الفريق من دور ال (64). حدكم دور ال (64). ومن هسع كلموا (بكري المدينة) قالوا ليه المجموعات وبطولة الممتاز والانجازات التى كنت بتلقاها في الهلال في المريخ ما في. وشهر 6 يمكن تمشي تقعد في بيتكم. موسم يمكن ما تقدر تصبر على الجماعة ديل. خليك عارف من هسع ح تلعب في (التمهيدي) يا بكري. كمان (التمهيدي) دا فيه جنس (ابيولا). التمهيدي دا مكان (الايبولا) ذاتها يا بكري. وبكري المدينة ح يتلتل جنس تلتلة في المريخ. ح يطلع من دور ال (64). باقى الموسم ح تعديها (سيكافات) ساكت كدا. ح تشبع يا بكري المدينة في سيكافا. وممكن بي حالتك دي تطلع هداف سيكافا – اصلا لقب الهداف في بطولة سيكافا ما عاوز ليه حاجة. اي زول يجيبوه من الشارع ممكن يطلع هداف سيكافا. اتخيلوا كدا بكري المدينة وعنكبة في تشكيلة واحدة – اها ديل القون ما بجي معاهم إلا جمال الوالي يعمل ليه مفاوضات في ابوجا. القون ما بجي ليهم بالساهل تاني. تاني القون للمريخ عاوز ليه (ابوجا ون) و (ابوجا تو) وعاوز ليه سلسلة من (نيفاشا) مجموعة نيفاشات كدا. عاوز ليه (مفاوضات). غايتو يا ناس المريخ إلّا تركزوا من الان مع وديدي الفاتح والفاضل ابوشنب. ناس (عنكبة) ديل ما فيهم رجا. الواحد بقى يشيل هم على (الكشافات). الظاهر كدا (الكشافات) ح تتعب معاكم. عنكبة طبعا في (4) فرص بضيّع ليه (7) اقوان. بكري المدينة في (120) فرصة مضمونة بجيب ليه (كورنر). مجربنو نحن الكلام دا (لكن ساكت كنا ساكتين). تاني لمن ندخل مباريات المريخ ح نقعد ونصقع في (الكشافات). دراويش الكورة كلهم اتلموا في فريق واحد. مواليد منطقة الكشافات – عنكبة وبكري المدينة. زمان كانوا موزعين شوية …(انت قايلين ح نخليكم تتهنوا بي بكري المدينة). تاني الواحد يدخل استاد المريخ ويقبل (الكرسي) على (الكشافات). الواحد فينا يخش الكورة – يقولوا ليه حاجز وين؟. يقول ليهم حاجز (كشافات). ناس التلفزة ذاتهم بوجهوا كاميراتهم نحو (الكشافات). وناس (سلك) الواحد فيهم وقت يكون عاوز يصلح الحكاية شوية – بقول ليك والله بكري المدينة عندو كورة قربت تجي قون – ضربت في (الكشافات). يعني بدل ضربت في القايم. اي لاعب يسجلو الهلال مفروض يكون (مبسوط) فهو ان تم (شطبه) او لو انتهى عقده في الهلال سوف تكون خانتو محفوظة في المريخ. يعني الخانة في الهلال بي (بدل فاقدها) في المريخ. ما في اي مشكلة. اتسجل في الهلال في حالة الشطب خانتك في المريخ مع (5) مليار جنيه. المريخ دا ما في زول بصبر عليه من غير مليارات. المريخ اللاعب الذي يرتدى شعاره يعيد قيده ب (100) الف جنيه. واللاعب القادم من الهلال يدفع له (5) مليار جنيه. في عظمة للهلال اكتر من كدا. اللاعب القادم من الهلال ناس المريخ تقول جايبنو من (برشلونة). ناس مزمل ابوالقاسم يخلوا اولادهم في المريخ ويقعدوا يتصوروا مع الزول القادم الهلال. فرحة شديدة. وجمال الوالي ذاتو – في الشارع مشيتو تتغير. ما بصدق. وناس هيثم كابو يطلعوا يظهروا من جديد. بعد ما تدسهم (الوصافة) وتخليهم يختفوا يقوموا يظهروا وقت يسجلوا ليهم لاعب من الهلال. مع العلم ان اللاعب الذي يأتي للمريخ من الهلال بفضل القعاد في بيتو من الاستمرار في المريخ. مع ذلك الجماعة ما بتعظوا. تاني بجوا يعافروا. تاني بعملوا حركاتهم دي. بكري المدينة قالوا عاوز يصلح الصالون بي قروش تسجيلو في المريخ – عشان الظروف ما معروفة. بكري عارف ملعبو (البيت). زول (البيت) ظاهر. و… انتوا تعالوا هنا الحكومة دي قايلة بكري المدينة (وارغو). طيب مالها دفعت القروش دي كلها. يا زول اطلع. و.. وانتهى….
