محمد عبد الماجد …و…. زولكم دا كويس ما عندو عوجة لكن خلوا تلفوناتكم فاتحة …و حكاية الترشيح والتفسير و (النجضابية) التى اجتحات المريخاب بعد قرعة بطولة الاندية الافريقية للابطال واحتمالاتهم العديدة (ضرب وقسمة) ونزول بالواحد ذكرتني ليكم بعدد من القصص البتحصل لينا يوماتي داخل غرف الانعاش المركز. (النجضابية) ح اكلمكم عنها في اخر العمود لو اتذكرتها. شكلها ح انساها مع اللخمة دي. لكن قبل غرف الانعاش المركز – تعالوا نشوف ناس المريخ بعملوا في شنو؟. بعملوا في عمائل …ناس (الخرطوم الوطني) ما بعملوها. و.. (اصبروا بس). مرات الواحد بيقيف في تقاطع من تقاطعات الشوارع يقوموا يعرضوا ليه (بضاعة). اي حاجة كدا. لعبة – لبسة اطفال. جهاز كهربة. مكوة. اشمعنا (مكوة) يعني. تقوم تقول للولد الحاجة دي بي كم؟. الولد بعين قوية يقول ليك الحاجة دي ب (750) جنيه. بقول ليك كدا لمن الاحمر يكون منور في التقاطع والرقم بكون (99). اول ما الرقم يبقى (80) الولد البيبيع بقول ليك طيب شيلها ب (700) جنيه. الرقم يبقى (60) يقول ليك خلاص جيب (600) جنيه. الرقم يبقى (50) يقول ليك يا زول جيب (500) جنيه. الرقم يصبح (40)..يقول ليك (400) جنيه كيف معاك؟. لمن تتبقى (30) ثانية بقول ليك ب (300) جنيه. (20) ثانية ب (200) جنيه. لمن تبقى (10) ثواني من النور الاخضر يولع يقول ليك يا زول جيب (100) جنيه. لمن الاصفر يولع بقول ليك (10) جنيه. اول ما الاخضر يولع بقول ليك طيب انت بتدفع كم؟. تفوت تخليه. يعني شنو؟. يعني بمشي معاك خطوة خطوة. ما من دور ال (64) يا مريخاب بتكلموا عن دور ال (16). انتوا الترجي دا الي الان ما بقيتوا عليه…(ما تشيلوا همو ساكت). بتكتلوا نفسكم بالهم. و… (نفس الشيء). نفس الشيء شنو يا زول؟. ناس المريخ ديل هسع يا دوب الاستوب بتاعهم مولع احمر في (99) جنيه. وبتكلموا عن (الاخضر). بتكلموا عن دور ال (16). بتكلموا عن الترجي. تصوروا ديل لو اتأهلوا من (64) ح يصعدوا لدور ال (32) ولو اتأهلوا من دور ال (32) ح يتأهلوا لدور ال (16) الذي يمكن ان يواجهوا فيه (الترجي) التونسي لو تأهل هو من دور ال(32). بعد (المسلسل التركي) الطويل دا. بعد (ليالي الحلمية) دي…خمسة اجزاء المريخ يمكن ان يواجه فريق الترجي التونسي. المريخاب خلوا عزام. وخلوا البعد عزام ..وقعدوا يعيّطوا لينا من الان خوفا ورعبا من (الترجي). يا جماعة الله. يا عالم. يا سلك. دي اشرحها ليكم كيف؟. انتوا في دور ال (64) وشايلين لينا من هسع هم لمباريات دور ال (16). دور ال (16) وينكم ووينو؟. انتوا بتحلموا. انتوا لو وصلت دور ال (16) ما طلعتو عديل كدا ..دربكم طلع. كدا اول حاجة اطلعوا لينا من (عزام) بعد داك فكروا لينا في (الترجي) البعد بعد (عزام). حكاية الخوف من الترجي والكلام منذ الان عن مواجهة الترجي ..ذكرتني ليك بي طالب كان بقرأ في مرحلة الاساس. صاحبكم الطالب دا ..كان من تمغرب الواطة بمشي الدكان وبقول لبتاع الدكان اسمع اديني (طحنية) ب (3) جنيه والله اول ما ادخل الجامعة واتخرج من كلية الطب وانتهي من الخدمة الوطينة واتوظف واشتغل ارجع ليك قروشك من تاني ماهية اصرفها. بتاع الدكان زول طيب بقول ليه : ليه ما بترجع لي قروشي من اول ماهية …(انا الطحنية دي ما قاعد ادين فيها). الطحنية دي انت عارف صفيحتها عملت كم؟. الطالب يقول لبتاع الدكان اول ماهية ما بقدر اديك منها حاجة والله – عشان (سيد اللبن) عاوز مني حق (3) ارطال لبن شلتهم منو السنة الفاتت وما اديتو قروش. ناس المريخ هسع بعملوا في نفس الشيء. بلعبوا في دور ال (64) وبتكلموا عن دور ال (16). وينكم وين دور ال (16). انتوا بتحلموا…(يقولوا ليكم الكلام مية مرة). اشبه ليكم الحكاية بي شنو؟. لازم اوقعها ليكم. لازم اشرحها ليكم. اقول ليكم شنو؟. شفتوا الزول لمن يكون عندو (موعد) في (قاعة الصداقة)…ويكون ما التزم بالحضور في الموعد المحدد. عارفين بحصل شنو؟. زولكم دا كل ما يضرب ليه الزول الضارب معه الموعد في قاعة الصداقة بقول ليه انا قريب منك – انا في الكوبري. 5 دقائق بس واكون معاك. وصاحبكم وقت بقول انا في الكوبري – عارفنو بكون وين؟. بكون في الجيلي. هسع ناس المريخ بعملوا في نفس الشيء. جماعتكم في الجيلي ..وبقولوا للزول المنتظرهم في قاعة الصداقة نحن في (الكوبري). الترجي دا يا مريخاب ما بتصلوه. ما بتلحقوه. انتوا لسع بتلعبوا في دور ال (64) يعني غادي للجيلي ..البيجيبكم لقاعة الصداقة شنو؟. البيجيبكم للترجي شنو؟. و… (اكمل بس). قعدوا يقولوا لينا (لو) الحكم حسب لينا ضربة جزاء ..نحن بنغلب عزام. ولو عزام كان ما فيه تجانس ح نتأهل. ولو وصلنا دور ال (32) بنتأهل لدور ال (16). ولو اتأهلنا لدور ال (16) بنلاقي الترجي. ولو طلعنا امام الترجي بنمشي (الكونفدرالية). عليكم الله في (لولوة) اكتر من اللولوة البعملوا فيها ناس المريخ ديل. بي حالتكم دي الترجي إلا تلاقوه في (المطار). هو عابر وانتوا راجعين من المعسكر. ما عندكم (احتمالية) غير دي. و… (اطبق ليكم النظرية). الزول وقت يكون تعبان شديد. الزول بتاع (غرفة الانعاش) الكلمتكم عنو فوق. في بداية العمود…(انتوا لحقتو نسيتو). الزول وقت يكون تعبان شديد ..والدكاترة قنعوا منو. زول منتهى ..ما في امل. الدكاترة يقولوا ليك والله نحن عملنا العلينا..تاني ما عندنا حاجة اكتر من كدا نعملها. وزلكم يكون خلاص..حركة مافي. يقوم كل ما يسجلوا زيارة للزول التعبان دا في المستشفى وتسأل عن حالتو..يقولوا ليك والله كويس …الليلة فتح عينو. فتح عينو يعني عاوز يلعب ليه عشرة كوشتينة. الليلة شرب ليه ليمون. الليلة سأل من عثمان. عثمان منو؟. الليلة قال جيبوا لي الموبايل. الليلة اكل ليه (طحنية) ..قال نفسو في طحنية. انت رجعت تاني تجيب لينا في سيرة الطحنية. اهل الزول التعبان بحاولوا يطمنوا الناس. او بحاولوا يطمنوا نفسهم. وهو تعبان لاخر. واحد من اهل الزول التعبان دا بكون واعي ..بكون عاقل… بكون عارف اي شيء. خبرتو كبيرة في الحياة. وخبرتو كبيرة في الموت. وبكون نظرو بعيد زي الكاردينال. بقوم لمن تسألو من صحة الزول التعبان دا بقول ليك والله كويس بس خلوا تلفوناتكم فاتحة. لو ما فهمت كلامو. برجع يكرر ليك تاني ويقول ليك خلوا تلفوناتكم فاتحة الحياة من الموت ما معروفة. كدا طوالي الكلام بقع ليك. بتبلعوا زي الموية الناشفة. اول في موية ناشفة؟. انت مالك عاوز تلخبطنا ساكت من الصباح. انتوا عاوزين الجد ..(التمهيدي) دا بلخبط الزول. من قالوا لي الهلال في (التمهيدي) الكلام بقى ما واقع لي. ادخل واطلع من البيت …زي (ساعة الصفر). و… (اختم بس). هسع انتوا يا ناس المريخ …بقول ليكم خلوا تلفوناتكم فاتحة. عشان الكلام يبقى واضح. عشان الكلام يقع ليكم. مع (الترجي) دا الحياة من الموت ما معروفة. بعدين انتوا في (الانعاش). يعني في (التمهيدي) الجابكم لدور ال (16) شنو؟. يا جماعة عليكم الله قولوا ليكم حاجة معقولة. حاجة تتبلع. الترجي دا انتوا بدري عليه. انا قبيل قلت ليكم برجع ليكم ل (النجضابية) لو اتذكرت. شكلي كدا نسيت. وقلت ليك امس لو اتذكرت موضوع (العجور) – وليه منعوه برضو برجع ليكم. وبرضو شكلي نسيت الموضوع. طلع من رأسي. و.. انتوا تعالوا هنا (حاجة جديدة). البخلي (الطعمية) تغلي في المولد شنو؟. البغليها في المولد شنو؟. الطعمية عندها علاقة بالمولد. عندها علاقة بالحلويات. مالكم انتوا عاوزين تستغلوا اي مناسبة؟. و… انتهى…. ق سبورت
