محمد عبد الماجد دق الدلجة وصيتي ليكم يا مريخاب بكرة تتعشوا من خمسة عندنا نسوان في الحلة ..صعبات ..وكلامهن كتير…وداخلات ليهن في صندوق. في كل (صرفة) ..بعملن ليهن مشكلة. الحلة كلها بتشهد العكة دي. واي واحدة ..تقول انا عاوزة الصرفة القادمة ..عشان عندي (سماية). حنك النسوان ..كلكم عارفنو. النسوان الصعبات ديل وقت يتلمن …ويشيلن ليهن (عمود) ويبقن طالعات على المستشفى..اعرفوهم طوالي ..بكونن كتلن ليهن زول. زول ما يكون عندو اي ذنب ..غير عمود السيدات ديل. اصلو (عمودن) دا ما بطلع ساكت. كمان العمود وقت يكون فيه ملوخية ورز…خلاص اقنع. في موت..في موت. هسع الليلة ..النسوان ديل كتلن منو؟..طالعات من الصباح كدا. وعمودهن يا هو ذاتو. وملوخية. ورز. الليلة طالعات بي عمودن. من صباح الرحمان. عمودهن الما بيغباني داك. في زول ح ينقرض. غايتو عمودن دا ما بطلع من حالتين. يا في زول ح ينقرض. يا المريخ مغلوب. وحسب علمي ..ما في زول راقد في المستشفي. شفتوا انتوا تفكيركم مشى وين؟. انا هسه قلت المريخ ح يتغلب. براكم انتوا بتربطوا بين الحاجات. ولا في زول عيان. ولا في زول عندو نزلة. انا بس بوضح ليكم الموقف. وبشرح ليكم الاحوال. طيب العمود دا في شنو من الصباح كدا؟. لو مكضبين كلامي ..انتظروا بكرة بعد الساعة عشرة. بتعرفوا حكاية العمود. بالمناسبة دي. بكرة عندنا امتحانات. القفة فيها كم اضان؟. القفة فيها خمسة اضنين. دي قفة وإلّا (ارنب) الفيها خمسة اضنين دي. اول ..الارنب فيها خمسة اضنين؟. جايز. الزمن دا (الاضنين) الكتيرة ما بعيدة على الارنب. ارانب الزمن دا …فيهن (11) اضان. الاضنين كترت. يا ربي الحكومة عندها دخل بالموضوع دا. يا زول حكومة شنو؟. الحكومة مالها ومال الاضنين؟. بكون عندها دخل. حكومتنا دي ما في حاجة بعيدة منها. زمان بقولوا ليك القفة ام اضنين بشيلوها اتنين. هسع القفة ما بقدروا يشيلوها إلّا خمسة – اذن القفة فيها خمسة اضنين. منطق. عشان تعرفوا نحن ما بنتكلم ساكت. المنطق عندنا زي (كورية اللبن). تشرب لبنك..وتبقى مارق. يا جماعة الشغل دا شغل رياضايات ..ما تفتكروا نحن بنتكلم ساكت. زمان جابوا لينا (روسي). روسي ظاهر عليه صعب…عيونو متل بئر السلم. شعرو ذهبي ..زي الميداليات. الروسي دا ساعة ونص بتكلم ونحن ما فاهمين حاجة. شن خبرنا عاد باللغة الروسية؟. نحن اللغة الروسية ما بنعرفها. وقت قلنا لمدير المدرسة نحن الروسي دا ما فاهمين منو اي حاجة..اللغة الروسية دي (حرف جر) واحد فيها ما بنعرفو. مدير المدرسة قال لينا والقال ليكم الروسي دا بتكلم باللغة الروسية منو؟. قلنا ليه طيب بتكلم بي ياتو لغة؟. قال لينا بتكلم باللغة العربية. ما عرفنا نمشي وين؟. قلنا لمدير المدرسة وقت بتكلم باللغة اللعربية ..(النضارات) اللابسها دي لزومو شنو؟. الفلهمة في شنو؟. نضارتو دي جهجهتنا ساكت. لابس ليه نضارات وبتكلم باللغة العربية. النضارات في شنو؟. الروسي قالوا ليه (الديك) مذكر وإلّا مؤنث؟. قال ليهم …نحن مذكر او مؤنث دي في روسيا بقت ما فارقة معانا ..عشان نحن سواينا بين الجدادة والديك ..عندنا مساوة. قلنا ليه ان شاءالله بعد المساوة دي الديك يبيض ليكم. وان شاءالله الجدادة تعوعي ليكم. روسي ما عندو رأس. عندنا جماعة كدا بكرة ح ندخلهم في حتة ضيقة .. ح ندخلهم ليكم (امتحانات) صعبة. بكرة يوم الامتحانات. الامتحانات اصلو ما فايتكم. يا بلة جابر ..اهم حاجة تكتب اسمك واضح ..ورقم الجلوس. دائما انت بتنسى رقم جلوسك. ودائما انت يا بلة بتكتب في مكانة اسمك ..اسم موسى الزومة. موسى الزومة فارق المريخ فراق الطريفي لي جملو. عندنا زمان طالب بيكتب في ورقتو اسم جارو في الفصل. جارو في الامتحان. يوم المراقب قبضو ليك ..وقال ليه انت ليه بتعمل كدا؟. قال ليه انا ما بعمل حاجة ..جاري دا البيعمل. المراقب قال ليه ..بتكتب اسم زميلك ليه؟. صاحبكم قال ليه يا استاذ انا ما قايل دي اسمو ..انا قايل دي الاجابة الاولى على السؤال الاول. المراقب قال ليه في اجابة اسمها (عبدالفتاح عبدالقيوم عمر الحنين). هسع بلة بكتب اسم الزول القاعد جنبو. بقولوا لي رمضان عجب ..وقت بلة يتقدم..امشي غطي ليه. عشان كدا ..بلة جابر بكتب في ورقتو اسم رمضان عجب. بيبص يعني. إلّا يقولوا ليكم الحاجات واضحة كدا. وعلي جعفر ..في الدينا دي ما بكره شيء اكتر من (الامتحانات). من تجيب ليه سيرة الامتحانات بيشيل (دفتر العيادة) ويقول انا عيان. بكرة ..ننصح اخوانا المريخاب ..يتعشوا من خمسة ..عشان عشاء بعد تمانية ما في. ما ح تشوفوا ليكم مريخابي واحد شايل ليه (جك) وفول وحايم في الحلة عاوز ليه فول بعد تمانية. جيبوا فولكم من بدري ..صلحوه ..واضربوه قبل المباراة. عشان لو قعدتو بي جوعكم دي الى بعد المباراة تاني ما بتاكلو. ولا بتشربو. ولا بتنوموا. أنا عارف ح تواجهكم مشكلة وما ح تلقوا ليكم (فول) طلع الساعة خمسة. احسن تشيلوه بي حالتو دي..بدل تنوموا القوا. لو ما عاوزين فول…شوفوا ليكم (لبن) اشربوه. اللبن ما كعب ..مع الحاجات البعمل فيها فيصل موسي دا. يمكن مع حركات وليد علاءالدين يعمل ليكم (تسمم). لكن مع حركات فيصل موسى ما بعمل ليكم حاجة ..اشربوا ساكت. يا بلة ..بكرة ح نعمل ليك امتحان رياضايات. المليون فيه كم صفر؟. ح تقول لينا المليون فيها (6) اصفار. وح نقول ليك غلط. ناس نزار حامد عندهم رأي في الحتة دي. ناس نزار حامد عاوزين يشيلوا ليهم صفر من المليون ..عشان المليون تبقى فيه (5) اصفار بس. المليون بقى ما عندو اي قيمة..يعملوا ليه (6) اصفار ليه. دي خسارة (اصفار) ساكت. طيب يا علي جعفر ..المليار جينه فيها كم جنيه؟. سؤال صعب. خلاص نسهل ليك الموضوع. المليار فيها كم رصيد بي عشرة؟. انتوا إلّا يشرحوا ليكم الموضوع بالرصيد. غير الرصيد الموضوع ما بقع ليكم. …… و …….. (هسع انا قلت حاجة). خلاص ناس المريخ قاموا يتكلموا عن هدف الهلال الثالث. الخامس كيف؟. جمال سالم ..بمرق ساي من المرمي ..انتبهوا لذلك. الزول دا قاعد في السهلة. انا مازلت مصر ..جمال سالم دا لا حارس ولا حاجة. في حارس الكورة الواحدة بفكها سبع مرات. تقول حارس ليه (قطة). تعالوا شوفوا القط الكاميروني. و… السيدة (ل)…ما تردي من اول جرس …عشان نخسر (الشوق) جالون شفقة في الفاضي.
