محمد عبد الماجد دق الدلجة الهلال افريقيا ترتيبه الرابع المريخ محليا ترتيبه الخامس فوز الخرطوم الوطني امس على فريق هلال الفاشر ..دحرج ليك المريخ للمركز الخامس. وصافة مافي. وصافة الوصيف السنة دي مافي. قربوا يطلعوا من العشرة الاوائل. بعد ترتيبكم دا – لو ناس جمال الوالي ما استقالوا يبقى ما عندهم كرامة. الهلال من الطبيعي والمنطقى والمعتاد بيتقدم على المريخ في التنصيف…دا ما عندنا فيه كلام. لكن الجديد المرة دي مريخ الفاشر اتقدم على المريخ. الخرطوم الوطني اتقدم على المريخ. الاهلي شندي اتقدم على المريخ. البلد كلها اتقدمت على المريخ. جايبين ليكم محترفين وجهاز فني اجنبي وعاملين ليكم مقصورة في الفاضي. وبتجوا في روليت الممتاز في المركز الخامس. انا وقت قالوا لي المريخ ترتيبوا الخامس ..افتكرت الكلام دا في تنصيف الكاف. اعتبرت الترتيب على مستوى افريقيا. لكن الترتيب طلع على المستوى المحلي. تتخيلوا الهلال مع ناس الاهلي القاهري والترجي التونسي جاء (الرابع) افريقيا حسب تنصيف الكاف. في افريقيا الهلال في المستوى الرابع ..وانتوا يا ناس المريخ محليا مع ناس الخرطوم الوطني ومريخ الفاشر بتجوا في المركز الخامس. غايتو دي اصلو ما حصلت عليكم قبل كدا. دا كلو من بكري المدينة. الحاجات دي زمان ما كانت عندكم. المركز الخامس منذ انطلاقة الدوري الممتاز ما حصل المريخ جاء في هذا المركز المتأخر. ولسه – الجماعة مدحرجين. يمكن بعد ما تنتهي الدورة الاولى للممتاز يلقوا نفسهم في المركز التاسع. الامل يمكن يجي يتقدم. وعلي جعفر ما قاعد يقصر. لغارزيتو المدير الفني (السابق) للهلال تصريحا عندما اصبح مديرا فنيا للمريخ عن علي جعفر بعد ان تسبب في ولوج هدف عزام الاول في تنزانيا. غارزيتو قال ان علي جعفر سوف يصبح من نجوم المريخ وسوف يتألق ويعود في اول مباراة يشارك فيها. كانت مباراة المريخ امام الاهلي شندي هي اول مشاركة لعلي جعفر بعد الخطأ الجسيم الذي وقع فيه في تنزانيا. قلنا نشوف كلام غارزيتو. وقد جاء علي جعفر ووقع في خطأ مماثل ليهدي الاهلي شندي هدفا ما كان سوف يأتي لولا علي جعفر. هذا يجعلنا نعود الى غارزيتو ونقول له ان علي جعفر لم يعد ولم يتألق كما صرحت انت ودافعت عنه. قصة غارزيتو تشبه قصة الشخص الذي ذهب لزيارة مريض فاعترض طريقه كلب وعضه. ذهب الرجل الى الطبيب ..غير ان الطبيب قبل ان يصرف ويقرر له (21) حقنة طالب منه معرفة اذا كان الكلب حيا ام انه مات. الرجل ذهب هذه المرة ليس من اجل زيارة المريض ..وانما من اجل معرفة ان كان الكلب حيا ام ميتا ؟. الرجل المسكين (الكلب) تاني قام عضاه. هسع العملية بقت على ناس المريخ. او بقت على غارزيتو. علي جعفر تاني غلط. غارزيتو بعد الخطأ الذي وقع فيه علي جعفر امام عزام في مباراة الذهاب اشركه ليخرجه من الحالة النفسية الصعبة التى دخل فيها اللاعب. ومن اجل ان يثبت غارزيتو نظريته في اللاعب علي جعفر. علي جعفر ما كضب – قام كرر نفس الخطأ. بالكربون. في مباراة عزام صلح الكورة بالقدم..وفي مباراة الاهلي شندي صلح الكورة بالرأس. مرة كنت قد كتبت عن هذه الموضوع وذكرته فى احدى ثغرات دفاع المريخ. علي جعفر دا بطبق لينا عمليا (الشروق مرت من هنا). اي زول بفوت فيه. غربال. لو جبتوا الكوميديان والمقدم محمد موسي ولعب في مكانة علي جعفر ..محمد موسى ما بقع ليكم في الاخطاء البقع فيها علي جعفر. غايتو يا مريخاب عندكم خط دفاع..وقت تتلعب ليهم كورة كل واحد فيهم بمشي على اتجاه. بقعدوا يفتشوا في الصواني. البشرق يشرق..والبغرب يغرب. والبصنقع. والما برفع رأسو. والبتمسكو دوشة. والبنسي اسمو. والما بعرف عنوان بيتو. والبيقع منو ضرس. والبتجيه حمى. والبطير ليه ملاريا في الرأس. ضفر جاب ليه قون في عزام – عاوز يعمل فيها اساسي ..وكمان لاعب طرف يمين. وامير كمال (الفلسفة) كاتلوه تقول بيحضر في الماجستير. وعلي جعفر ..زي الزول السمع ليه خبر وفاة حار. دوشة شديدة. رأسو بلف. المهاجم وقت يدخل المنطقة وما يلقى زميلو ..بيلعب طوالي لي علي جعفر ..علي جعفر بقوم يصلح ليه الكورة. اي مهاجم منافس لعب الكورة لي علي جعفر – علي جعفر كتر خيرو صلحها ورجعها ليه. اما المعز محجوب فهو واضح انه في المريخ ممكن يكون (احتياطي) جيد – بملأ الكنبة..لكن جوة ما بنفع. عشان كدا – المعز محجوب لو عاوز يحافظ على تاريخه ما يجازف ويلعب اساسي. جمال سالم ما يمقلبك يا معز ..خليك قاعد في كنبتك ما في زول بقدر يقول فيك كلمة. اصلك ما غلطان. لكن تخش جوة – ناس علي جعفر ديل تاريخك بمسحوا ليك. يا زول مالك ومال التلتلة؟. مباراة الاهلي شندي والمريخ امس الاول كانت مباراة (هلالية) خالصة. قدر ما تصنقع تلقى ليك (هلالابي) قدامك. زي كأنو الهلال لاعب ضد الهلال. تعاين في المريخ تلقى (غارزيتو) واقف في الخط. تعاين جوة تلقى المعز محجوب في حراسة المرمي لو ذاكرتك ما قوية تقول الزول دا الجابو هنا شنو؟. تمشي قدام تشوف الباشا. تعاين في الكنبة تلقى علاءالدين يوسف. الهجوم بكري المدينة وتراوري. تقول دي شنو اللخبطة دي؟. زي طلب الكبدة البكشحوه في صحن العدس. تعاين في الفريق التاني تلقى هيثم مصطفى ذاتو بوزع فيها زي ما كان بيعمل في الهلال. تستغرب جنس استغراب. لمن تقعد تنكرش من الاستغراب. كلتشي – نادر الطيب. استغراب شديد. وبعد (الهلال) دا ..الميدان كلو هلال ..ناس المريخ بقولوا ليك عندنا (ضربة جزاء) الحكم لم يحسبها للمريخ. وناس الاهلي شندي يقولوا ليك عندنا ضربتين جزاء الحكم لم يحسبها. لا المريخ ولا الاهلي. الكلام دا نقوله نحن الهلالاب. انتوا هسع المباراة دي عندكم فيها شنو؟. كلهم (اولادنا) بما في ذلك عمكم غارزيتو ..وصلاح ادريس. يعني نحن برانا البنقول كدا. ونحن برانا البنحتج. ديل ولادنا – وديل ولادنا. وديل اعترضوا – وديل اعترضوا. وكلهم في النهاية ولادنا. بكري المدينة ما فاضل ليه إلّا يشيل ليه (طار). ناقصو يمدح. وترواري لسه بضيّع – ويقعد يصنقع ويشد الشورت. والمعز محجوب الخطأ الذي وقع فيه امس الاول وقع فيه في الهلال قبل 12 سنة ، عندما كان في بداياته. الطريف في الامر – والحاجة الغريبة ان غارزيتو المدير الفني السابق للهلال كان مراقب هيثم مصطفى كابتن الهلال السابق بي المحترف ايمن سعيد. طيب يا غارزيتو انت ما قلت ما مقتنع بي هيثم مصطفى. وقت ما مقتنع بي هيثم مصطفى ..بتراقب فيه مالك؟. وكمان بيراقبو بي ايمن سعيد. الشيء الما قادر ألقى ليها لغاية الآن حتة استوعاب ..غارزيتو مقتنع بي علي جعفر. وهيثم مصطفى لا. …………. و مباراة المنتخب الاولمبي اليوم سوف تكون متعة في كورة القدم. الهلال عندو اربعة. من وليد نيمار لي بشه الصغير. اها تاني قصرنا معاكم في حاجة. المريخ في موقعه الطبيعي – المركز الخامس. هلال الفاشر امس لعب مباراة كبيرة. لكنه خسر في اخر (4) دقائق من عمر المباراة. امس المريخاب كلهم كانوا بيشجعوا في هلال الفاشر. بقيتوا تشجعوا في هلال الفاشر. حالتكم صعبة شديد. ….. السيدة (ل)…ديل خصموا (5) ايام من قمر 14. وقرّض على كدا.
