محمد عبد الماجد دق الدلجة العاصفة (وليد الشعلة) بينزل ب(امير) وبيطلع ب(علاء) بالحساب. وبالورقة والقلم. ممنوع اصطحاب الاطفال. ممنوع التحدث مع السائق – وبنت الجيران. ممنوع تناول ملاح القرع والكمونية قبل المباراة. رمضان عجب سجلوه بي اتنين مليار ونص …غير (الفكة)…و… والعربات. وتشطيب الطابق التاني. امير كمال في التسجيلات القادمة ….(50) مليون ما بجيبها. والسبب في ذلك يرجع الى ان (وليد الشعلة) سوف يكون عامل اساسي في انخفاض سعر (امير كمال). ح يدق الدلجة. علاءالدين يوسف يمكن يشطبوه عديل كدا. الجماعة ديل ما بقدروا يلعبوا امام مهاجم صغير في السن وبلعب في المنتخب الاولمبي. والكورة بكشحها في القون متل (الحطب). زمان نحن كنا معجبين جدا – والدهشة ماسكنا في (فراني) كان بجدع ليك (الحطب) في الفرن وهو شغال زي (الهمزة) على السطر. بننتظر الموقف دا – ونشيل لينا عشر رغيفات ونتخارج على كدا. العشر رغيفات بنصل بيهم البيت (تلاتة) بس. الشارع طويل. والرغيف سخن. والونسة حلوة. ونحن شفوت. ما بنتفلت في الحاجات الزي دي. الافران هسع اتقدمت. بقت تشتغل بالكهربة والغاز والطاقة الشمسية. والريموت كنترول. والصورة اتقدمت. لكن الحاجة الباقية في الموضوع دا الى الآن تتمثل في ان (وليد الشعلة) لي وقتنا هذا بيجدع ليك الكورة في القون زي (الحطب). زي الزلابية. والمدرجات تقوم وتقعد. والصفوف حدها السوق الشعبي. دحين يا علاءالدين يوسف لو عندكم مشكلة في (الركب) اتخارج سريع. لو عندك حساسية في (الطوحال) ادفق برة. لاحظوا اني ما جبت ليكم تاني سيرة (الكمونية). او واحد من الاقارب او الاعارف او الاهل عندو ازمة – احسن ليك من التسجيلات دي اتخارج (مريخ الفاشر) يا علاء. امشى الحق (حسبو) في مريخ الفاشر – افضل ليك من المصير الظالم الذي ينتظرك في المريخ. السن اتقدمت. والعمر مشى. ومحمد عبدالرحمن مع وليد الشعلة (الشفع) ديل لو لمّوا ليهم في (صاروخ) بفرتكوه. انت شن قدرك على (المشقة) دي؟. حافظ جدول تسعة؟. ابدا. اكيد ما حافظو. حافظ (دجاجي يلقط الحب ويجري وهو فرحان). اكيد لا. لو حافظها كنت مشيت (بيطرى). الحاجات دي كلها بيسألك منها (وليد الشعلة). وبقول ليك من اول مواجهة ..اشتغل (الواجب المدرسي) في البيت. وتمرين الرياضات لو عندك فيه غلطة – بقطع ليك (اضنينك) ديل. انت يا علاءالدين ما حمل (الرباط الصليبي) الذي ينتظرك في اول مواجهة مع وليد الشعلة. ولا حمل تسميع نشيد (دجاجي يلقط الحب ويجري وهو فرحان) بعد العمر دا. في زول في سنك دي يا علاءالدين يوسف بقيف في خط 18 ويسمّع نشيد (دجاجي يلقط الحب ويجري وهو فرحان). الكلام دا خليه لي شيبون – ممكن. شمس الفلاح. لكن ليك انت – والله ما بيجي. يا علاءالدين يوسف انت ما قدر (الانبراشات) التى سوف تصبح طابع لك في كل لقاء يجمعك بي وليد الشعلة. وليد الشعلة وهو بيلعب في الاهلي الخرطوم …جاب فيكم قون. لمن يجي الهلال كيف؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس يا علاء – الظاهر ح ترجع تاني تشمع في (الدفار). راجيكم (تلتلة) شديدة. خمخمة تقلية. الراجيكم يا علاءالدين يوسف ما شوية. كان مرقتوا من الجزائريين ما بتمقروا من (العاصفة) وليد الشعلة. امير كمال – اصلا بعاني من (التقلة). هو صورة اخرى من (علي جعفر). على جعفر الجواني. المريخ عندو اتنين (علي جعفر). واحد قاعد في (الكنبة) لو عاوز يلف ساكت بكسر كراع (الكنبة). والتاني بيلعب جوة في الميدان …(لفتو) لو شافوه ناس المرور بقطعوه ايصالات خمس مخالفات. ويمكن يصادروا منو العربية. ندخل على الصالون!!. وليد الشعلة اضافة حقيقية لكفة اللاعب الوطني في الهلال. الحمدلله ان مجلس الهلال مع مجلس ادارة النادي الاهلي نجح في ان يحل اشكالية اللاعب مع الاتحاد – ووصلوا جميعا الى (عقوبة) يمكن ان تكون مقبولة رغم عدم منطقيتها. يهمنا هنا ان الاتحاد رفع عقوبة الايقاف عن وليد الشعلة. وقد اثبت الاتحاد العام لكورة القدم السوداني ان لوائح الاتحاد تعيق اللاعب الوطني وتمهد السبل والطرق والقوانين لصالح اللاعب الاجنبي. لذلك اتجهت مجالس الادارة الى اللاعب الاجنبي بعد المعوقات التى اصبح يضعها الاتحاد امام اللاعب الوطني. الاتحاد العام كان يمكن ان يدمر موهبة اللاعب وليد الشعلة – لو نجح مكر الاتحاد في تعطيّل او منع توقيع اللاعب في كشوفات الهلال. كان يفترض من الاتحاد ان ينظر لمستقبل اللاعب ولموهبته وما يمكن ان يتوفر له مع الهلال فينفع المنتخبات قبل الهلال. الحمدلله ان الاتحاد ادرك الخطأ الذي وقع فيه – وعالج الامر بصورة كما اشرنا يمكن ان تكون مقبولة. مجلس الهلال نجح ايضا في اعادة قيد اللاعب نزار حامد الذي كان عقده مع الهلال ينتهي في ديسمبر الماضي. لكن مجلس الهلال من اجل استقرار اللاعب وعدم تشتت ذهنه فضّل ان يعيد قيد اللاعب في كشوفات الهلال قبل (6) شهور من انتهاء تعاقده مع الهلال. هذا امر نحسبه ايضا لصالح اللاعب الوطني. مجلس الهلال بصورة عامة يمنح اللاعب الوطني رعاية واهتمام اكبر – ويبدو من تحركات المجلس دعمه اللا محدود للاعب الوطني. وهذا امر يشكر عليه مجلس الهلال. اللاعب صلاح الجزولي التفريط فيه امر قد يكلف الهلال كثيرا وان كان ذلك تحت ستار (الاعارة). الابقاء على صلاح الجزولي في ظل اصابة محمد عبدالرحمن وعدم قيد وليد الشعلة في كشوفات الهلال الافريقية ..وانهاء التعاقد مع كيبي وعدم ضمان نجاح المحترف القادم امر يجعلنا نشدد على الابقاء على صلاح الجزولي. الجزولي لاعب قوي ..ويمكن ان ينفع الهلال في المواجهات الافريقية ..لأنه يمتلك البنية الجسمانية القوية والخبرة الكافية. كما يتميز صلاح الجزولي بالقدرة على العودة والرضاء بالجلوس على الكنبة دون تضجر او اثارة المشاكل. هذه الامور كلها تجعلنا نطالب بالابقاء على صلاح الجزولي ودعمه بالصورة التى تجعل ما يقدمه اكبر واعظم. ما ينطبق على صلاح الجزولي ينطبق كذلك على محمد أحمد بشه ومدثر كاريكا وسيف الدين مساوي – جميعهم يحتاج للدعم والمساندة. هذه عناصر الهلال واسلحته في المجموعات ان اضعفها الهلال او فقدها سوف يفقد الهلال الكثير. في الهلال عشرة اجانب الان بعضهم نال الجنسية السودانية …دون ان يستفيد الهلال منهم في شيء إلّا في حدود. حيث نحفظ الدور العظيم والكبير الذي لعبه مسكيم حارس المرمي الكاميروني. كذلك لا خلاف حول نيسلون. وتحفظ مشاركات سيسيه المسترة مع الهلال وتنمحه حق البقاء. الى اجانب اتير توماس وجمعة جينارو الذان لا نعتبرهما اجانبا من منطلق سودانيتهما التى لا خلاف حولها. هذه خمسة اسماء يفترض ان تبقى وتستمر في كشوفات الهلال. الاسماء الخمسة الاخرى في ملف الاجانب او المجنسين يجب ان يغادروا كشوفات الهلال اذا كان البديل افضل. يمكن ان يأتي بديل اقل من سيدي بيه وكيبي ..مما يفرض ذلك الابقاء على سيدي بيه وكيبي ان كان البديل اضعف او اقل عطاء. مجلس الهلال قرر اعارة مالك وشطب علي النور ..ولا نحسب بعد هذا يحتاج الهلال الى خانة اخرى حتى تكون التضحية باللاعب صلاح الجزولي. نحن مع اللاعب الوطني …ومع اضافة عناصر وطنية جيدة مثل وليد الشعلة الذي سوف تكتمل حلقات مسلسله اليوم بالتوقيع باذن الله وتوفيقه في كشوفات الهلال. شيء اخر يجب ان نشهد به لمجلس الهلال ولرئيس النادي اشرف الكاردينال وهو اختياره لعناصر صغيرة في السن كان نجاحها ملحوظ في مباراة القمة الاخيرة. نتمنى ان يسير المجلس في نهجه ويضيف عناصر وطنية اخرى لكشوفات الهلال في هذه الفترة. نجاحات اللاعب الاجنبي اصبحت قليلة وغير مضمونة ..لذلك الاتجاه نحو اللاعب الوطني امر لا بد منه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس كلامك بقى كتير. ……. و يمكن ان يرتفع عدد الاجانب في المريخ الى (12) لاعبا. وهذا امر نحسبه في صالح الهلال. في الهلال يجب تخفيض العدد العالي من الاجانب في كشوفات الازرق. تسجيل عمر بخيت في المريخ يعني ان المريخ يحتاج الي اضافة (ابراج) انارة اخرى في استاد المريخ. نتمنى ان يقوم المريخ بتسجيل عمر بخيت. عشان (هلالية) المريخ تكتمل. ايمن سعيد…براهو عاوز ليه كشافة. الشوط التاني في المريخ اقنعو منو. وليد الشعلة ..بالتوفيق ان شاءالله مع الهلال. على الاقل يجب ان يوقع وليد الشعلة لمدة اربع سنوات ان لم يكن لمدة خمس سنوات. التلاتة سنوات بتلف في رمشة. ووليد الشعلة لاعب صغير السن. ….. السيدة (ل) – الفرح لا يحتاج الى اعلان رسمي من المحكمة. وقرّض على كدا.