دق الدلجة محمد عبد الماجد الحمام دا (beIN ) كتيرة عليه كان تجيبوه في (النيلين) الناس ديل من شدة ما (حمام) القون بيجيبوه براهم. يقولوا ليك الزول دا لو امتحنوه براهو ما بيجي (الاول) بيجي (الطيش). قالوا ليه ..(الطيش) ليه دائما بكون بعاين في (المروحة) يوم توزيع النتائج. قال ليهم عشان يقول ليهم الاساتذة ظلموني …عندي اربعة نمر في الرياضيات ما حسبوها لي. قول حسبوا ليك الاربعة نمر ..يعني ح تجي الاول. ادوكم النقاط التلاتة …ح تصعدوا. غايتو حمام زي دا ..نحن ما لاقانا. نحن زي دا ما شفنا. ولا سمعنا بيه. لا الميرغني الكسلاوي. ولا هلال كادوقلي. ولا الاهلي مدني. ولا حتى (جزيرة الفيل) ما شفنا ليهم (اهداف) عكسية. يطرشنا. ولا الناس البلعبوا قدام بيتنا العصر. ما عندهم علاقة بالكورة. والكورة ما عندهم علاقة بيهم. لكن مع ذلك احسن من ناس (العلمة) ديل. ديل لو مشوا بيهم اقرب مركز صحي ح يلقوهم كلهم عندهم (ملاريا). نحن كمان ما بنعرف الملاريا. جماعتكم ديل وقت بيجيبوا القون براهم …ناس (بكري المدينة) لزومهم شنو؟. ولا في داعي ليهم. الكورة تكون ماشي على الكشافات المدافع بدخلها في القون. تقول حارس ليه (بنطون). بكري المدينة ..عمرو كلو ..بيمر من المدافعين كلهم ..وبخلي الحكم يأشر بي ايدو على النص – وحكم الراية بقوم جاري على (السنتر)..وبخط الكورة في (الكشافات). بكري المدينة بي حالتو دي جاب فيهم قون. لو في حكم عاقل ما بحسب القون دا. لو عندو رأس الحكم ما بعدو. ناس (العلمة) ديل عندهم جنس دفاع. الكبر ظاهر على باكاتهم. لكن نقول شنو؟. كبار سن قابلو كبار سن. الباك من (شيخوختو) …صفارة الحكم ما بسمعها ..(اضانو تقيلة). يقول ليك قلت شنو؟. الواحد في نص المباراة يقول ليك لو لقيت لي كباية شاي تقيلة كدا – تعدل الدماغ دا. هو وينو الدماغ ..عشان يجيبوا ليه شاي تقيل. الباك الشمال قالوا ليك الى ان انتهت المباراة فاكر ..الكهربة قاطعة. زولكم ما شايف (الكشافات). نظرو كعب. فاكرها (مضلمة). لا بشوفوا ولا بيسمعوا. العلمة عندهم حارس مرمى – قالوا عندو (زهايمر). الجماعة ديل دفاعهم زي (المسجل) البيعض (الشريط). معصلجين. بيخربوا الشريط. موش زمان كانت في (مسجلات) كدا – بتمسك (الشريط). بتعض. يكون عندك (شريط) فرحان بيه ..يقوم المسجل يمسكو ليك. بتذكر (المسجل) زمان كان طوالي بمسك شريط (حمد الريح). اي شريط تجيبوا لي حمد الريح …المسجل بمسكو. ما عارف المسجل مشكلتو شنو مع (حمد الريح). وشريط الطيب عبدالله يمشي ليك زي الحلاوة. ما في اي مشكلة. من تجي اغنية (الرحيل) لي حمد الريح – المسجل بقوم يمسك. في الرحيل بالذات. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). حمام زي دا بتلموا فيه وين؟. فريق درجة تانية. حق التذاكر ما عندهم. دفاعهم كلو اتخلف في الجزائر ..عشان ما عندهم رسوم (التأشيرة). حارسه يعاني من مرض (الزهايمر). الباك الشمال مصاب بحالة فقدان للشهية – نتيجة لتقدم السن. مهاجمهم الاساسي (6) شهور ما صرف مرتبو. العلمة دا (حمام) بمواصفات عالمية. حمامكم دا قناة بي ان سبورت كتيرة عليه. هسع ديل تجيبوهم لينا في القناة المشفرة دي. خسارة كرت. وتعملوا ليهم استديو. ونقل مباشر. انتوا جنيتو؟. انتوا ما عندكم رأس؟. قال ليه كان عندنا رأس كان قسمنا البلد. الكلام دا كتير على (الحمام) الجزائري دا. العلمة ديل بيشبهوا (النيلين). مفروض تجيبوهم في قناة (النيلين). بتشبهم تماما. الحمام دا جيبوه لينا في (النيلين). اعملوا ليهم استديو بي رعاية (الفتريتة). او الشوربة. او (الرز). الرز مفيد للحمام ..زي ما بقول عادل امام. ولا تلفوا ليهم (الطبق). خلوه بي حالتو دي. وخلوا المباراة في النيلين كل خمسة دقائق ..يحصل عطل فني ..يقوم المعلق يرجع للاستديو. المذيع في الاستديو يقول نحن نأسف لهذا العطل المفاجيء…المشكلة من ناس (الميناء البري). ناس النيلين اصلو ما عندهم ذنب. المشكلة من ناس (الميناء البري) – يوم داك عندي (شنطة) راحت عندهم. الصورة ترجع. ناس النيلين يقولوا نرجع لمتابعة المباراة – نتمنى مشاهدة (طيبة) للمشاهدين الكرام. يجيبوا ليك الكورة. الكاميرا في حتة والكورة في حتة ..ومعلق المباراة بتحدث عن (رئيس اللجنة الشعبية) في شرق النيل. الصورة تقطع. نرجع للاستديو. المذيع داخل الاستديو يقعد يعتذر للمشاهدين..يقول للناس نحن نأسف لهذا العطب الفني ..الذي تسبب فيه (كوبري النيل الابيض). الكوبري مقفول. والمهندس المسؤول عن التشغيل عالق في الكوبري. لكن ااكد ليكم ..السبب اصلو ما من (النيلين). السبب من (الكوبري). يا كوتش ما بتعتقد ان الضغط الموجود تحته فريق (العلمة) ممكن ينتج عنه (هدف) لصالح المريخ – عاوزنك تحدثنا عن هذه النقطة الى ان تصلنا الصورة. الكوتش يقعد (يحلل)…يجيب لينا كلام من رأسو – ما عندو اي علاقة بالسؤال. يوم داك مشيت لي صالون حلاقة ..لقيت ليك البلد كلها هناك. قلت الحاصل شنو؟..البلد دي كلها حلقت!!. دا التحليل ..تتخيلوا ..يعني انتوا فاكرني قاصد لي حاجة تانية. ما قاصد اي حاجة دا كلام الكوتش عن مباراة المريخ والعلمة. الصورة ترجع. المذيع يستلم الموضوع – ويقول الظاهر (الكوبري) فتح ..نعود لمتابعة المباراة. يجيبوا لينا المباراة. حاجة ما عندها اي علاقة بما يحدث في الملعب. المعلق يقعد يحكي لينا قصة عن (السكة الحديد). الصورة تاني تقطع. نرجع الاستديو. نلقى الكوتش نام في الاستديو ..والمذيع شغال بالواتس اب. وفي كديسة حايمة تحت التربيزة. فجأة المذيع ينتبه الى ان الصورة رجعت …يصحي (الكوتش)..ويوجه سؤالي طوالي للكوتش ويقول ليه بعد هذا الضغط ما بتعتقد ان المريخ اصبح قريبا من الهدف. الكوتش يطلع فرشة اسنانو يتسوك ..يفتكر الواطة صبحت. الكوتش يقول ليه مريخ شنو؟. المذيع يقول ليه المريخ السوداني. الكوتش يقول ليه هو المريخ لاعب ضد منو؟. المذيع يقول ليه دقيقة نرجع للكنترول. المذيع يقول للكوتش المريخ يلعب اليوم طبعا امام (العلمة). الكوتش يقول ليه و(الهدف) السألتني عنو علاقتو شنو بالسؤال. الصورة ترجع. يجيبوا لينا (كمال عبدالغني) جاري. نقول دا شنو دا؟…ناس (النيلين) ديل جنو؟ …كمال عبدالغني دا اعتزل من عشرين سنة. الظاهر الشرائط اتخلبطت عليهم. اصلهم ناس النيلين كدا. مباراة العلمة قديمة. مرات تكون في مباراة للهلال والخرطوم الوطني …يجيبوا ليك ميرغني المامون ومبارك حسن جمعة. لا نعرف ميرغني المامون ومبارك حسن جمعة في الهلال لا نعرفهم في الخرطوم الوطني. الوضع دا يشبه (العلمة) تماما. الحمام دا ينفع مع (النيلين). الجماعة ديل يشبهونا. بي ان سبورت شنو البيجيبوا فيها (العلمة والمريخ)؟. ديل مفروض يجيبوهم في ضل العصر. التلفزيون ذاتو كتير عليهم. حمام زي دا تاني ما تجيبوه لينا. بتخربوا لينا سمعة (المجموعات) ساكت. المجموعات انتهت يا رجالة. المجموعات بقت اي كلام يا رجالة. المجموعات بقت كلها (حمام). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. و اسمعوها مني ..الهلال اليوم منتصر ان شاءالله. منتصر عديل كدا. نحن ما بنتكلم ساكت..الدنيا رمضان. التعادل ما بنقبل بيه. الليلة منصورين ..منصورين. لو عاوزين تشوفوا ليكم موضوع تاني امشوا شوفوه. بس بقول ليكم الهلال الليلة منصور. اسمعوا الكلام. واقتنعوا. وما تغالطوا ساكت. لو عندكم اي شك ..نتلاقى بكرة باذن الله. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …….. السيدة (ل)…عاوزين لينا غابة سنط ..نحرقها تعبيرا عن شوقنا. وقرّض على كدا.
