دق الدلجة محمد عبد الماجد المريخ والامل مباراة زي (الاملاء) أعد اكعب (عبارة) ممكن تلاقى الزول في المدرسة …كانت عبارة (أعد) التى تكتب في كراسات (الاملاء) لمن الشغل يكون كعب. نفسك تمرق من الفطور. وترجع البيت زي الحرف المعطش. كلمة (اعد) كانت بتتناسب مع عيون اضناها التعب ..مكلبشة ومشخبطة ..والرهق طالع من سوادها. طلاب زمان الواحد من الغباشة الفيه ..لو ضربتو في اتنين بطلع ليك منو (نمر). بالميت كدا ممكن تطلع منو (فهد). والاردية قديمة ..ومشرطة …وقميص المدرسة فيه (بقع) ..لو بالغت كدا ما بتقول تحتو (طالب دراسي). وشباك الفصل الخامس دائما فاتح. والمدير دائما واقف في نص الحوش بتاع المدرسة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس حصة العربي زمان كانت حصة عربي – ما (واتساب) زي هسع. طلاب زمان الواحد رأسو قوي …الحصة الاخيرة ما بحضرها ..والحصة الاولى نصها بكون نائمو. بتعرفوا (الدك). الواحد فينا بيدك عادي ..ويمشي يتمروح في الاسواق. وبنردف كمان. عبارة (اعد) بتشبه الحالة الطلابية. بتتوفق مع الطالب تماما. الطالب من يكتروا ليه من كلمة (أعد) اقنع منو؟. كلمة (اعد) وقت يكتبوها ليك في نص الصفحة بتبقى ليك زي (ملاح القرع) في الصينية. والشطة والبصلة والموية الباردة. وشباك الصالون فاتح برضو. كراس الاملاء ذاتو وقت تكتر فيه كلمة (اعد) اخلاقو بتبقى كعبة – يقعد (يطنطن) ليك متل (السخل). الكراسة بيبقى ملخبط وحالتو بالبلاء. وما فيه غلاف. ومدفق فيه (حبر). زمان دفيّق (الحبر) في الكراسة ..دليل كد واجتهاد. الكراسة الحبر (عرقو). شفتوا العلم دا كيف؟. هسع العلم انتهى. بقى كلام واتساب ساكت. وافلام اجنبية. العلم زمان تكون بتقرأ لي مظفر النواب …وخالد ابوالروس وجمال الغيطاني ومحمد الماغوط وود الرضي. تلم المدارس كلها. تلم الالون جميعها. العلم هسع ان تعرف ماركات الموبايلات والعربيات والقمصان ..وتقدر تتعامل مع وسائل التكنلوجيا الحديثة. وقادر على التعامل مع البرمجات وتنزيلها. دا علم هسع. الواحد لو بقى عالم شديد كدا – يقول ليك لقيت لي شقة – غرفتين وبرندة. وركبت الطبق. ونزلت التردد. ولو عاوز تبالغ في العلم تقول ليهم (كوفي) عقدو بنتهي متين مع المريخ؟. تكون عارف وعالم بالحاجات الفارغة دي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الزول من يقعد يشكي ليك من (شاحن الموبايل) اعرفو ما عندو موضوع. مباراة المريخ والامل هسع بقت زي (الاملاء). لجنة الاستئنافات قالت (اعد) للمباراة. اعد. واعلام المريخ ..ومنو كدا الشاذلي نزل ليك هجوم في عوض أحمد طه. الشاذلي دا شن قدرو بي عوض أحمد طه. الزول دا ما كان بحضر الرياضيات. ما كان شايل تربية ريفية. الهجوم في شنو؟. هكذا يتعامل اعلام المريخ ومجلسه مع القانون. مفتكرين (الرجالة) في الحاجات دي. وقايلين الموضوع شغل (ضراع). شغل مجابدة ساكت. ناس المريخ لو لقوا ليهم زول شريف وبتاع قانون ..وكلمتو واضحة وما بلف ويدور وما عندو وكالة سفر ..بهاجموه. ما بيستوعبوا زول (شريف) في الزمن دا. قايلين الصوت العالي ممكن يعمل ليه بطولة. قبل ذلك مارس اعلام المريخ ومجلسه (هرادبيسه) مع زكي عباس …عندما هاجموه عقب معاقبة بكري المدينة بعد الاعتداء على حكم مباراة الاهلي شندي والمريخ. نظرية اعلام المريخ والتى لا يجدوا حرج في اعلانها ..ان اي عضو في الاتحاد العام او في اي لجنة (هلالابي) يجيب مهاجمته. اي زول شريف وعاوز يطبق القانون …يفترض ان يهاجمه اعلام المريخ …ومجلسه. اسامة عطا المنان ومجدي شمس الدين شوهوا صورة الزول الممكن يطبق القانون. افتكروا كل الناس اسامة عطا المنان. قايلنهم كلهم مجدي شمس الدين. ناس زكي عباس. ناس عوض احمد طه..ما كدا. ولا بقيفوا في البتعملوا فيه دا. ولا عندهم شغلة. حاجاتكم دي ما بتخوف ليها زول بطبق القانون. الزول البطبق القانون غير قابل للخوف. وغير قابل للانكسار. اعملوها مع زول بيحبث عن مصلحة. بيبحث عن مصب. عن الدخول للبرلمان. عن (ركاب) لوكالة سفره. ناس زكي عباس وعوض احمد طه ..لا عندهم نية يدخلوا البرلمان ..ولا فاتحين ليهم وكالة سفر. ولا اصاحب لجمال الوالي. عشان كدا الكلام البتعملوا فيه دا ..احسن توجهه لغارزيتو. قولوه لي تراوري. فلاحتكم بس في عوض احمد طه. هسع جمال الوالي (13) سنة في المريخ – في واحد من اعلام المريخ قدر يقول فيه كلمة واحدة. في زول قدر يهاجم جمال الوالي. البهاجم جمال الوالي يا طلعوه برة البلد. يا فصلوه. يا قفلوا ليه جريدته. عشان كدا ما بقدروا يقولوا اي حاجة في جمال الوالي وفي كل الذين هم تحت مظلة جمال الوالي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس عوض أحمد طه لو بتكسرو حاجات زي دي…كان عمل ليه (وكالة سفر). لجنة الاستئنافات …غصبا عنكم سوف تعيد مباراة المريخ والامل. وسوف تظل لعنة بكري المدينة تلاحق المريخ في كل المباريات. الى ان تأتي الضربة القاضية من (لوزان). في لوزان ح تهاجموا منو؟. ح تفتشوا عن عوض احمد طه (اللوزاني). عن زكي عباس (الفيفي). فلاحتكم بس في ديل. عاوزين الناس يعملوا ليكم قانون براكم. يحسبوا ليكم ضربة جزاء من نص الملعب. وينقضوا ليكم هدف بشه. ويطردوا ليكم سيسيه بدون سبب. ويأجلوا ليكم الدوري الممتاز كمان. انتوا قايلين نفسكم في (ملجة). فاكرين الموضوع (قفة اسود). وشوال عجور. الموضوع اكبر من كدا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس لو فاكرين الحاجات دي بتعمل ليها (بطولات) ..بلاتر ما كان استقال. بعدين انتوا تعالوا هنا – الزعل في شنو؟. الاعادة انتوا فايتكم وين؟. حياتكم كلها (اعادة). بكري المدينة (بيعيد) في تجربتو في الهلال. عمر بخيت (اعادة). المعز محجوب (اعادة). تراوري (اعادة). عبده جابر (اعادة). الباشا (اعادة). علاءالدين يوسف (اعادة). فريقكم كلو (اعادة). غارزيتو ذاتو (اعادة). غارزيتو من (الاعادة) الفيه – جاكم بي (ولدو) الكان معاه في الهلال. يعني ابنو ذاتو (اعادة). جمال الوالي (اعد). جمال الوالي بعيد في تجربة كل سنة. بعد الاعادات دي …الزعل في شنو لو عادوا ليكم مباراة الامل. على كدا يعني بكري المدينة في دورة كاملة – لم يسجل ولا هدف. ولا كورنر. هدفو الوحيد سجلوا في مباراة غير محسوبة ..مباراة غير قانونية. ناس الامل قالوا عاوزين نقاط المباراة. من حقهم. الامل فريق كبير – وعارف القانون ..وممكن يقدر يشيل النقاط الثلاثة من المريخ من الملعب. ما محتاجين يحولوا ليهم النقاط. الامل قادر يشيل النقاط الثلاثة ..من (الرد كسل). زي ما عمل مريخ الفاشر. الامل قادر. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس اجمعوا الكراسات يا جماعة – الجرس ضرب. و نسأل الله الشفاء والعافية لقلم الهلال واديبه الناصع عبدالمنعم سيد احمد. افتقدنا قلمه الاديب ..وعلمنا مؤخرا انه طريح الفراش. يحتاج عبدالمنعم سيد أحمد الذي كان يقدم حروفه فى احل صورة..يوشك ان يقدمها على باقة ورد..يحتاج الباشمهندس لدعواتكم الآن. بعد هدف جوليام ..المريخ هدد بالانسحاب من الممتاز. نحن عارفنو ما بقدر يثبت بعد هذا الهدف. ما كضبوا قالوا بنسحبوا. تنسحبوا تمشوا وين؟. لو الكبار مرقوا …(الرديف) البمرقوا شنو؟. الموضوع دا صعب عليكم. نحن عاوزين مباراة قمة. ان شاءالله في استراحة السكة الحديد بي عطبرة. عجلوا لينا بي قمة سريعة كدا قبل رمضان. والله لو في لجنة اعادة لينا مباراة القمة في الدورة الاولى للممتاز – تكون اصلو ما قصرت معانا. …….. السيدة (ل) من تقولي التلفون كان في الشنطة وما سمعت الجرس – عندك رأي في رأسك. وقرّض على كدا.