دق الدلجة محمد عبد الماجد اتحاد الجزائر انتوا قايلنو اتحاد اسامة عطا المنان؟ الناس ديل عاوزين شنو؟. تفتح (المروحة) يقولوا ليك ما تفتحها. في (ترتيبات). ولا بنعرف الترتيبات. تقفلها – يقولوا ليك مالك ومالها؟ – قافلها ليها. دا تعدي على اللوائح. يدوك محاضرة عن الروح الرياضية. وعن الحس الوطني. وحكومة عبود. رغم ان حكومة عبود ما عندها اي علاقة بالموضوع. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس العطش كتلنا – ما من الصيام ..من قطوعات المويه. تمشي الدكان – عشان تشتري ليك رطل سكر او (كيلو سكر) حسب فهم الايامات دي. ما فارقة – كان رطل او كان كيلو. تقيف ساعة – بتاع الدكان ما يشتغل بيك. يمرر الحلة كلها – وانت واقف ، لمن تطلع الموبايل تعاين للساعة. ولا بحس. ولا بتحرج. ولا بيشعر. ولا بقول ليك بتعمل في شنو؟. بتاع الدكان يقول ليك عندنا (شاي) عجيب ..شيل ليك منو كيلو. شاي جبناهو امس – شاي جديد. تخلي السكر. تجي راجع بالشاي. ناس البيت يقولوا ليك جبت الشاي ليه؟…نحن عاوزين سكر ..الشاي عندنا منو (كرتونة). تقول ليهم بتاع الدكان عاوز كدا. نحن شغالين بي مزاج بتاع الدكان. تمشي عشان تجيب ليك (جنبة) من بتاع الدكان. يلم فيك بتاع دكان (حنكو سنين) ومنطقو قوي..يقول ليك الجبنة ما كويسة – احسن تشيل (التونة) دي. جبنة شنو في الوقت دا. يا زول انت جنيت. لو قبضوك بالجبنة ما بخلوك. تقول ليه (الجبنة) منعوها. يقول ليك ما منعوها ..لكن الظروف ما معروفة. يمكن يمنعوها في اي لحظة. يطلع ليك الجبنة من نفسك…ترجع عشان تقنع ناس البيت كلاهم بي سلامة (التونة). تقنعهم واحد – واحد. تكلمهم عن جمال التونة. وروعة (التونة). تجيب ليهم (افراح عصام) ذاتها عشان تقنعهم. افراح عصام ما تخلي ليهم شيء..تغني ليهم (امير الحسن). واحد من الجماعة يقول الكلام دا كلو في (التونة). وانت ولا ما مقتنع. لكن تعمل فيها مقتنع. تعمل شنو؟. عاوزين كدا. تكون نفسك في شوربة عدس. شوربة عدس عادية ما فيها اي كلفة. شفتها في مسلسل تركي – عجبتك قلت تطبق النظرية. تجيب العدس. وتعمل الشوربة. قبل ما تشربها – يضربوا ليك تلفون – يقولوا ليك الشوربة بتعمل (تصلب) في الاوردة. الكلام ما علمي. ولا مقنع. ولا في علاقة بين الاوردة والعدس. لكن بتخلي (الشوربة) – اصلك انت عاوز ليك سبب. عاوز ليك زول يقنعك ويقول ليك العدس بعمل (تصلب). اصلو الكلام دا ما كعب معانا. تجيب ليك (قرع) قبل ما تخش فيه. تضرب تلفون عشان تطمئن على سلامة موقفك. الزول الضارب ليه تلفون – بقول ليك اوعك من (القرع). القرع دا كمان بسبب السكتة الدماغية. تقول ليه والله قرع الزمن دا بعملها – ما فيه اي طعم ..وكلو (اسمدة). القرعة من (السماد) يجيبوها ليك بي (كاتلوج) ما تقدر تاكلها. بي مفك وزردية ما تعرف تخلص عليها. قرع اخر زمن. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس يا فخري الدين مضوي ..العمود تتخيل بقينا نكتبو في اربعة حارات. تقول بنكتب في (باب الحارة). كل حارة نمشي ليها ..الكهربة تقطع. نشيل (اللاب توب) ونتخارج. الكهربة تقطع. نمشي الحارة التانية. ناس الكهربة ديل عندهم علاقة بالمريخاب. الحركات البعملوا فيها دي حركات مريخاب. حركات ناس بلة جابر ذاتهم. تصور يا فخري امس وصلنا للحاج يوسف عشان نكتب لينا عمود من قطوعات الكهرباء. ويقولوا ليك ما في قطوعات كهربة. اول في زول قال في قطوعات. اصلو ما في قطوعات. دا (وهم) منكم ساكت. تلاقى ليك مجموعة جات من البلد. المجموعة مقسومة على اتنين. مجموعة يقولوا ليك العيد جمعة. ومجموعة يقولوا ليك العيد سبت. تقول ليهم يا جماعة ما مشكلة ..جمعة وسبت الاتنين بلعبوا في الهلال. اصلو ما عندنا مشكلة. العيد السنة دي عيدنا. جمعة جينارو. وسبت دودو. الحمدلله بس العيد ما احد. ولا بكري المدينة. قالوا ليك الجماعة ح يعيدوا مع (الهزائم) دي في العيد. ح يقعدوا في الجزائر تلاتة اسابيع ..مع ذلك (نقطة) ما بجيبوها. بعيدوا برة البلد ..وبرجعوا لا هدف ولا نقطة. طيب العيد لزومو شنو برة البلد. كان ترجعو. بكري المدينة ما بقعد ليكم بدون (خبيز). ومصعب عمر عاوز يحوم في الشارع. الجابرهم على (الصمصمة) دي شنو؟. السنة دي الحلاوة ح ترخص. ح تنزل. ح تدق (الدلجة). ارتحنا من ناس (ضفر). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس يا زول لو العيد كمان بقى (خميس) بكونوا ريحونا شديد. وجماعتكم صدقوا. صدقوا ان (القرع) ممكن يبقى (سمك). وان العدس ب (كلام الجرايد) ممكن يبقى (شية جمر). اتوهموا. وصدقوا اوهامهم. افتكروا الموضوع في (ايدهم) ..زي ما سطيروا على الاتحاد ىالسوداني عاوزين يسطيروا على الاتحاد الافريقي. طبلية. فاكرنها (طبلية). او (ركشة) يحولوها شمال ويمين. ما بعيد يكون مجدي شمس الدين ذاتو وصلوه هناك عشان يسطيروا على الوضع. عشان يختار ليهم حكام بالاسم زي ما بعمل في الدوري السوداني. ويوم تحصل حاجة ما ترضيهم في المباراة ..يقوموا ليك في (مجدي شمس الدين). لقوا ليك زول يهاجموه. زمان الاتحاد الافريقي كان ما شغال بيهم. هسع جابوا مجدي شمس الدين عشان ينفذ ليهم اجندتهم. برهبوا في مجدي. مجدي يعمل ليكم شنو؟. يقعد يحرس ليك حكم الراية. يجيب ليكم الكورة من برة الملعب. مجدي يسوي شنو اكتر من كدا..يعين ليكم حكام من (دار فلاح). عشان تنبسطوا. يجيب ليكم طاقم من (السكة حديد) عطبرة. عشان يتم ليكم مرادكم. قايلنها فوضى انتوا. يقولوا ليكم ألعبوا مباراة معادة امام الامل ..تقولوا ما بنلعب. القرار يقعد في مكاتب الاتحاد – ولا بقدروا يسلموه حتى للنادي. يوقفوا ليكم الدوري. تسافروا تشاركوا في سيكافا. تمشوا تقعدوا في الجزائر. تعيدوا برة البلد. ولا في زول بيسألكم. لكن الاتحاد الافريقي الفوضى دي ما بتنفع معاهو. دا لعب عيال ساكت. فاكرين البطولات بتتحقق بالهرش. وطولة اللسان. لقوا الموضوع دا نافع مع اسامة عطا المنان. يقولوا ليه ارفع الايقاف من بكري المدينة ..اسامة عطا المنان يرفع الايقاف. يقولوا ليه ارفض شكوى لاهلي الخرطوم. اسامة عطا المنان يرفض شكوى الاهلي الخرطوم. زول قاعد ساكت. شغال بالريموت كنترول. خربوا ليكم طبعكم. ولسانكم بقى اطول من اللازم. بقيتوا ما بتصدقوا. ما بتستحملوا. عاوزين تشيلوها (قلع) ساكت. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). تعالوا الليلة شوفوا الكورة. لو نقضوا لينا عشرة. بنجيب عشرة. ولا بنشتغل بالموضوع. ولا بهمنا. الحاجات دي نحن بتحصل عندنا عادي. في الاهلي شندي دا ..ناس مجدي نقضوا لينا هدفين. في فيتا كلوب. عادي عندنا. الليلة ح تشوفوا الكورة الجد. ناس نزار وبشه. ناس الشغيل ونيسلون. ناس اندرزينهو. شوفوها – وارجعوا لي. اصلو ما بتندموا. …….. و ألعبوا كورتكم. شجعوا بس. ما عندكم قضية لا بالحكم. ولا بي مجدي. ولا بالمجانين البجيبهم لينا ديل. شجعوا بس. خليكم مع بشه واخوانه 90 دقيقة. استمتعوا في البعمل فيه نزار حامد. اتمخمخوا مع الشغيل. شوفوا كاريكا. وابقوا ليهم السند والعون. ماتقصروا. الليلة نحن عندنا حفلة عديل كدا. ……….. السيدة (ل) – وقت الهلال يكون لاعب برسل ليك رسالة فاضية ..وانتي بتفهمي الحاصل. ولا محتاجين لي كلمات. وقرّض على كدا.
