دق الدلجة محمد عبد الماجد بعد هدف (نزار) في ناس (عيّدوا) من هسع عشان الموضوع يبقى ليكم واضح. جيبوا ليكم (علبة هندسة). وجركانة (موية). موية عادية ..(اول انتوا عاوزين تجيبوها جركانة شنو؟). تفكيركم مشى بعيد. وافتحوا ليكم قوس. وطلّعوا (الكراسي) برة الحوش. عشان عاوزين نشوف هدف (نزار حامد) دا. عاوز اطلع ليه في (بعثة) عديل كدا. امرق ..اهاجر ليه عديل كدا. سمّوها بعثة دراسية. بعثة سياحية. على كيفكم. ح اشوف موضوع الهدف دا شنو؟. افتحوا التلفونات. وادخلوا (الواتساب). الشغل دا صعب عليكم. القون الجابو (نزار حامد) دا ..شوف عيني ..(ضفر) في (جزائرو) ادوها (كرت اصفر). وامير كمال …طالب بالتغيير. يا زول انت لاعب؟..تغيير شنو؟. انت الموضوع دا ما عندك فيه دخل. ما تتحرج ساكت. ما تخجل. ما يعقدوك. الموضوع عادي. العندو (جلابية) جديدة يطلعها. العندو (عمة) داسيها للعيد. يطلعها. ما في فرحة اكتر من كدا. اقول ليكم. جيبوا ليكم (لوح تلج)..عشان ما تقولوا لي (عطشنا). عشان اخد راحتي في الكلام. شوفوا ليكم اختصاصي (تخدير). البعمل فيه نزار حامد دا – شغل بتاع اختصاصي (تخدير). يجيب الكورة. يجمعها. يطرحها. يطلع منها جذرها. يفتح ليه زاوية منفرجة. يجمعها تاني. يدقلها. يكحلها. يشوغلوي. يشوغلوي دي ..انا ذاتي ما عارفها. الشغل دا كبير. الشغل دا صعب. نزار حامد يلملم الحاجات كلها ..ويشيل الجلد والرأس ويتخارج على كدا. الكلام بجيب الكلام. نزار حامد قبل كدا عمل ليه عملية في علاءالدين يوسف ..قالوا ليك علاءالدين يوسف لي وقتنا دا بفتش في (ساعتو). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). انتوا في (مطرة)..وإلّا بتخيل ساكت. في احساس مطرة من غير مطر. احساس (سمك) مع الفول. احساس (باريس) في السوق العربي. احساس موية …مع العطش. نزار حامد وقت يستلم كورتو ..ويمشي لي قدام ..اول حاجة بعملها بشيل (الطوحال) من اول مدافع يقابلو. ببقى شنو يا جماعة. المدافع ببقى بدون (طوحال). وبتقدم. بخش عليه واحد تاني ..بقوم يشيل ليه (اللوز). ببقى شنو يا جماعة؟. ببقى بدون (لوز). يا جماعة ما تسرحوا – تابعوا معاي. بتقدم ..بخش عليه مدافع ثالث ..بشيل منو (المرارة). ببقى شنو؟. ببقى بدون (مرارة). بخش مدافع اخر. بشيل ليه (لغالغو). لغالغ عادل امام بتعرفوها. يا جماعة ..تابعوا معاي ..ما معقول كدا. يعني وقت نزار حامد يصل المرمي ..بكون ما خلى ليه (مرارة). الحلة بتكون بقت (صقيعة). لا المصران الاعور ولا القاولون. الحاجات دي كلها لملمها نزار حامد من علاءالدين يوسف. هسع علاءالدين يوسف من تجيب ليه سيرة نزار حامد بجري على التلاجة. العطش كاتلو. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اصبروا يا جماعة ..لسه الغريق ورا. ما تستعجلوا. العيد جمعة. عشان الامور تبقى ليكم واضحة. نحن امور اللف والدوران دي ما عندنا. الكورة طلعت..وخرجت برة الملعب. ما عندنا. الهجوم على مجدي شمس الدين بهذه (العنترية) الفارغة ما عندنا. ديل قالوا يشتموا ليهم زول يفهمهم…قالوا يشتموا مجدي شمس الدين. عليكم الله في قصور اكتر من كدا. مجدي ذنبو شنو؟. قول الهدف صحيح يعني شنو؟..بتحصل عادي في الكورة. انتوا الكورة دي جديدة عليكم. المجموعات عارفنها جديدة عليكم. شفتوا نحن عشان (الجدل) دا ..والغلاط. والكورة طلعت. وما طلعت. وحكم الراية رافع رايتو قبل القون. والحكم قال شنو؟. عشان الجدل دا ..والغلاط ..قلنا لي نزار حامد ..جيب لينا (قون) بتاع (فلفلة). من نص الملعب. جيبوا لينا من هيا. امسك الكورة واي واحد يقابلك شيل منو اللوحات والرقم الوطني والرخصة. جيب لينا هدف (ماردوني). اي زول يقابلك في الطريق ..علقوا في (المروحة). علقوا في خشم الباب. عشان كلام الناس. عشان الجدل. عشان ما في زول يقول لينا الكورة طلعت. وشنو؟. وناس مزمل ابوالقاسم وبابكر سلك ..يقعدوا ينظروا. يخلوا جمال الوالي. وغارزيتو. وعمر بخيت. ونزار حامد. ويقعدوا يهاجموا في مجدي شمس الدين. منطق التابه. دا منطق شنو؟. شفتوا عشان الحركات دي. وعشان الكلام الكتير دا. والنقة. والتنظير ..نزار حامد ..وراكم الاقوان بسجلوها كيف؟. غايتو لو (الدفترادر) كان عايش ..كان حرك جيشو. كان اعلن الحرب. هدف نزار حامد دا ..مستفز. هدف اثبت لينا ان (حلايب) سودانية. ولا بنجامل. ولا بنكضب. ولا بنغشكم. تاني كدا – نشوف لينا مصري في (حلايب). نزار حامد عمل اي شيء. جابوا ليه (صينية الفطور). قال ليهم وينها سلطة الروب. جابوا ليه سلطة الروب ..قال ليهم عاوز (الملاحة). جابوا ليه الملاحة. قال جيبوا (الموية). نزار حامد امس في قونو ..فتح الصالون ..وشغل المروحة …وركب التلفون في الشاحن. العندو (ربيكا)..شعر ليك بي نفسو عندو (جلاكسي). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اخش ليكم في حتة حساسة شوية. قبل ما اطلع. واتخارج. واقفل المروحة. المريخاب في هدف شيبون الغير صحيح. هدف ما حسبوه ..عملوا الجوطة دي كلها. طيب لو شافوا هدف نزار حامد يعملوا شنو؟. دا لا بستوعبوها لينا ولا حاجة. ح يرجعوا يهاجموا تاني مجدي شمس الدين. منطقهم كدا. اعمل ليهم شنو يا جماعة؟. والله لو ناس المريخ جابوا ليهم هدف زي هدف نزار حامد دا..كان اجزوا ليهم عديل كدا. كانوا عيدوا من يوم 26 رمضان. هدف شيبون غير الشرعي …عملوا فيه كل هذه الضجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لكن العيد عندكم يا هلالاب. انت يا الكاردينال …نزار حامد دفعت ليه حافز تسجيلو شنو؟. الشغل دا ما شغل شيكات. ما شغل قروش كاش. نزار دا إلّا تكونوا دفعتوا ليه حافز تسجيلوا (كمانات). ………. و تاني ما اي كلام. نعيد على راحتنا. مرتاحين جنس راحة. العاوز يسافر ..يسافر. ما عندنا مشكلة. السنة دي ما في زول يشتري ليه حلاوة. ما في زول يخبز. الحلاوة جابها كلها نزار حامد. ………. السيدة (ل)..تفتكري الزول ممكن بعد كدا يقول شنو؟. ولا حاجة. وقرّض على كدا.
