دق الدلجة محمد عبد الماجد الزول المستعجل من هسع ح يقول ليك بصمة (الكوكي) ظهرت في ناس الله خلقهم (مستعجلين). طلعوا للدنيا دي في سبعة. التسعة شهور ما كملوها في بطن امهم ..تقول كانوا قاعدين في (بيت ايجار). استعجال شديد. دائما هم جاريين…في سباق المائة متر بصورة مستمرة. لاحقين شنو ما عارف؟. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (التوم ود معزة) جاتو سقطة قلبية من (الترجي) التونسي. الناس ديل ..ديمة تلقى الواحد فيهم شايل ليه (جك) فول وجاري. حاجة غريبة. جك الفول ارتبط بي ملامحهم. تثبّت الزول بي (جكو) ..يقول ليك معليش لاحق فول فضل الله ..لو اتأخرت عليه ما بلقاه تاني. زي كأنو الدنيا دي كلها اختصرت في فول فضل الله. وفول فضل الله عليكم امان الله ..(تفل) لو قلبت فيها (كرتونة تونة) ما بتقدر تبلعو. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (حاتم ود الناس الساكنين ناصية) …الدكتور قال ليه تشيل لي (الطوحال) قبل مباراة (الترجي) التونسي. في ناس كدا الاستعجال ظاهر في (نعليهم). من استعجالهم ..الواحد فيهم بكون شايل (شباشبو) في ايدو. يا عالم انتوا لاحقين شنو؟. الواحد فيهم لو ضربت ليه تلفون..يقول ليك اسمع ..اديني دقيقة بس ..برجع ليك. اللخمة في شنو؟. لو شافك واحد فيهم ..ماشى ليك مع (بنت)..ان شاءالله اختك ..بدون ما يستوثق من المعلومات بقول ليك : (اها العرس متين؟). ويقعد ينظر ليك ويصدر ليك في الحكم والمواعظ. بقول ليك احسن تعرس طوالي ..الخطوبة لو طولت العرس ما بتم. وكلام الناس. الناس ذاتها ما بتريح ليها زول. وما تشيل هم ..(اخوانك) بقيفو معاك..ما عندك اي مشكلة. يا زول نحن معاك. اول ما تعمل ليك خطوة رسمية ..جماعتك يقفولوا تلفوناتهم. ما بتلقى ليك زول. بعد ما خلاص الفأس يقع في الرأس..صاحبكم الذي كان بحرّض فيك على العرس ..بقوم يستهجن الخطوة ويقول ليك دا زمن يعرسو فيه. يا زول انت جنيت. الزمن الصعب دا ..الواحد لو مسك رقبتو ..ما بقدر يمسك رأسو. دا زمن عرس كمان. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (اخلاص بنت الحويكر)..جاتها (نفسيات) عديل كدا بعد ما سمعت بي خبر (الترجي). عالم مستعجلة. وعالم بتنظر بس. عالم ضايقة ضيق شديد. الملاح ياكلو ليك (لحمتو) في النار. يعزلوها عزيل. يلقطوها زي (الدهب). الواحد فيهم ..تقول ليه اسمع ..عمك حسن اتوفى. يقول ليك : تاني. من استعجالو ..كتلو قبل يومو. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (عباس خور السيد) طلع ولدو من المدرسة بعد ما قالوا ليه مباراة المريخ القادمة مع (الترجي). قال لي ولدو البتقرأ ليها شنو كمان؟. انتوا ما بتلاحظوا للاستعجال دا في (المركبات العامة). الاتسعجال ظاهر وواضح وما عاوز ليه (ملامح). ولا عاوز ليه زول يوصف ليك الحاصل. تلقى الواحد قبل ما (الحافلة) تقوم من الموقف ..يقول للكمساري ..اسمع عليك الله بعدين ما تنساني ..نزلني في المحطة الاخيرة. عليكم الله لو ما ساي ..(المحطة الاخيرة) عاوزة ليها (تنبيه). وكل ما الحافلة تتقدم ليها خمس خطوات صاحبكم بيقبض في تلابيب الكمساري وبقول ليه ما تنساني ..انا نازل في المحطة الاخيرة. يا عمنا ..انت قايل المحطة الاخيرة دي (تنظيم سري)..وقت نصل المحطة الاخيرة بنكلمك يا عمك المحطة الاخيرة ظاهرة. لكن (الاستعجال). الاستعجال بعمل اكتر من كدا. الواحد فيهم قبل ما يدي (الكمساري) القروش ..تلقاه بيطالب بالباقي. عاوز حقو. يدق ليك في (الباقي) نقة يوقف ليك الحافلة على فد كراع. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (عثمان التوم ابو نضارات) من جابوا ليه سيرة (الترجي) طفش من البلد. ما معروف مرق وين؟. الزول المستعجل بقول ليك عاوز اعمل لي بيت من خمس طوابق. بعد اسبوع من كلامو دا تلقاه بدأ ليك في الطابق الخامس قبل ما يبدأ في (الاساس). ناس مستعجلة. هسع انا متأكد ..وحاجة واثق منها..الهلالاب (الشفقانين) ديل ..بيقوموا يقولوا ليك (بصمة) الكوكي ظهرت. الهلالاب اصلهم كدا. ما بتلفتوا. وقت يكونوا عاوزين يمنطقوا الحاجات بمنطقوها ليك ..لمن الحاجات هي ذاتها تفرح وتنبسط. ممكن يقولوا ليك بصمة الكوكي ظهرت ..قون (كيبي) دا لو ما (الكوكي) سنة ما بجي. لو كان (كيبي) بيلعب في قيادة باتريك لو لعب (15) سنة ..ما بجيب ليه قون بالشكل دا. مع العلم ان (كيبي) بجيب ليه في اقوان ..نحن في مسلسل (كابتن ماجد) ما قاعدين نشوفها. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (الامين شال الجر) ..طقتو اصلة ..قال طقت الاصلة ما مشكلة ..المشكلة (الترجي). انا لو مرقت من (الاصلة) ما بمرق من (الترجي). لكن (الكوكي) بصمتو ظهرت ..ما شفتوا (نزار حامد) الصاقعة بوزع فيها كيف؟. بقسم فيها زي (حلاوة مولد). الشغل دا شغل (الكوكي). قبل الكوكي نزار حامد كان بمسك الكورة وما بفكها. هسع بقى يجدع فيها ..تقول شغال ليه في مناسبة. واطهر الطاهر ..مع الكوكي بقى يكمل اللاين. زمان اطهر دا كان بدور الكورة من اي حتة .. هسع بقى يمشي ويكمل ويعكس. تقولوا لي (بصمة) الكوكي ما ظهرت. انتوا عاوزين اكتر من كدا شنو؟. المباراة كلها انا بعاين في معاوية فداسي..فاكرو محترف اجنبي. اخر المباراة اكتشفت ليك معاوية فداسي. دا (فداسي) حقنا دا ذاتو. الحصل عليه شنو؟. كورتو مالها بقت راقية كدا. كورتو مالها بقت سليمة كدا. اكيد دا (الكوكي). البصمة في (فداسي) ظهرت …تاني عاوزين اكتر من كدا شنو يا هلالاب. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (الشيخ ود ساتاب) ..قال تاني ما تجيبوا لي (بامية مفروكة) في الغداء ..مع البامية المفروكة دي (الترجي) بيضربنا سبعة. بس يا نبيل الكوكي لو كملت لينا جميلك …وخليت ناس الهلال يعرفوا يستفيدوا من (العكسيات) تكون ما قرصت معانا. التوانسة ديل اي عكسية بجيبوا ليك منها قون. نحن التوانسة ما كانوا بيغلبونا إلّا عن طريق (العكسيات). ورينا السر شنو؟. خلينا نأخد لينا نقلة ..نقلتين. لو عرفنا نتعامل مع (العكسيات)..وبقنيا نسجل منها اهداف ..وما نستقبل منها اهداف علينا ..ح نحقق بطولات. مشكلة الكورة السودانية في (العكسيات). لا بنعرف نستفيد من العكسيات التى بتكون في صالحنا. ولا بنعرف نتعامل مع العكسيات التى تلعب امام مرمانا. يا الكوكي ..عاوزين نعرف السر. خاصة ان الهلال يملك اللاعب الطاير (كيبي). كيبي لاعب (هوائي). ممكن من اي كورة هوائية يجيب ليك قون. وعندنا نزار حامد والشغيل ..اطول ناس في افريقيا. يبقى ما في حاجة بتنقصنا. ولا عاوزين شيء. لكن بالجد ..ومن غير نظريات الناس المستعجلة دي …الهلال امس كانت فيه نقلات تونسية. المعني ايقاع الهلال بقى فيه شوية سرعة. الهلال اصلا ما بحب الكور الطويلة ..واللعب بتاع الخمج. واظن ان نزار حامد وسيدي بيه ووليد علاءالدين ح يلقوا راحتهم مع المدرب التونسي نبيل الكوكي. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (التجاني حرم الكيف)..رسل مرتو البلد قبل مباراة (الترجي) ..قال ليها الايامات دي ما بقدر اسيطر على اعصابي ..اقوم افك لي (طلاق) من غير ما اقصد. بس يا الكاردينال عاوزنك تتم الناقصة. الجوهرة الزرقاء تب ما قصرت فيها. عاوزنك تنجز لينا (التسجيلات). نحن عاوزين نمشي لي قدام. عاوزين نجيب بطولة خارجية. والبطولة الخارجية ..عاوزة ليها اضافات حقيقية واضافات كبيرة. وليد الشعلة ..الاخطر في الساحة. ومعاه رمضان عجب. وماهر مهاجم المنتخب الاولمبي ولاعب ام بدة …هو (المستقبل) الحقيقي للكورة السودانية. وعماريه لاعب الاهلي شندي ..مطلق السراح في ديسمبر القادم. يقولوا ليكم الكلام الف مرة. طبعا لو اراد الهلال اضافة لاعب محترف كبير في مايو القادم يجب ان يكون اللاعب في حجم مرحلة المجموعات. جيبوا ليكم لاعب ..يدخل التشكيلة طوالى ..ويظهر الفرق. …….. و الواحد لو قال ليكم (الحقيقة) بتزعلوا. مزمل ابوالقاسم ح يقفل تلفونو. بابكر سلك ..ح يغير الشريحة. معاوية الجاك ما بشيل ليه موبايل الايامات دي. هيثم كابو ح يفكر يرجع (فنون) تاني. قلنا ليكم. ما بتسمعوا الكلام. كلمناكم. قلنا ليكم بكري المدينة قاصدها. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (الحسن ود الشعبة)..قال ليهم والله (تراوري) دا اعقل زول في المريخ زاغ من بدري. … السيدة (ل)..الايامات دي (العدس) فاكيها في نفسو ..عامل فيها (سمك). وقرّض على كدا.
