دق الدلجة محمد عبد الماجد قون اندرزينهو بحل مشكلة الكهربة والموية والمواصلات والغاز اندرزينهو ..نحن عارفنو (برازيلي). دي حاجة متأكدين منها. وما قاعدين نغالط فيه – ولا عندنا في الموضوع دا (رأي). هو عليكم الله (الرأي) مع قطوعات الكهرباء والموية دي نعمل بيه شنو؟. اندرزينهو – نحن عارفنو برازيلي…لكن كمان ما قايلنو من (ولاد ام درمان). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). دقيقة يا عالم اكمل ليكم. اول مرة اشوف لي برازيلي (شفت). الزول دا يا فوزي المرضي امسكوه شلخوه لينا. شلخو ..(جعلي) ..(شايقي)..(رباطبي) ..(فورابي)..(هدندوي). ما بنختلف. شلخوه اي حاجة بس ما تمرقو منك. اندرزينهو قلبو طلع حار اكتر من (الشغيل). شفت ليك (اندرزينهو) يلعب بي حماس ..وبى روح قتالية ..قلت (الشغيل) دا مالو بقى قصيّر كدا. اطلع نضارة. وألبس نضارة. كبرنا – وبقينا ما بنشوف سمح. الكلام ذاتو – بقينا شيء نسمعو – وشيء ما نسمعو. في ناس بفتكروها (غتاتة) مننا. والموضوع ما كدا. الموضوع (كبر) ساكت. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اكمل يا عالم. عبدالماجد حايم تحتي زي (الحكم الرابع)..قلت ليه انت يا جنا (الشغيل) دا مالو لونو فتح كدا؟. الناس ديل في المغرب قاعدين يعملوا في شنو؟. عبدالماجد (شفت) وناقش اي حاجة ..قال لي دا ما (الشغيل)..دا (اندرزينهو)…انت قاعد تتابع في المباراة في (النيلين). اقول ليكم شيء. اول حاجة ما سمعت شيء. لكن عملت فيها سامع. مرات بتتحرج وقت ما تسمع ..تقوم تدخل ليك (جملة مفيدة) كدا – بين – بين. جملة تركب في اي حتة..عشان ما تتحرج. الكهربة اليوم كلو قاطعة. الليلة جايبة ليها مطرة. قعدت اقول في الكلمات دي – عشان اطلع من الحرج. لمن الموضوع وقع لي ..وعرفت ليك الزول القلبو حار دا. تتخيلوا الزول القلبو حار طلع (برازيلي). طلع اندرزينهو. غايتو يا اندرزينهو ما خليت شيء لي ناس الشغيل ومعاوية فداسي..وموسى الزومة. موسى الزومة كمان الدخلو في الموضوع دا شنو؟. اوعك تدخل لينا موسى الزومة في عمود (فرايحي) كدا. خلينا في (شغيلنا). ناس الكهربة – يجيبوا الكهربة ويقطعوها. شغالين معانا زي الخبيز. ندخل صينية. ونطلع صينية. والكهربة تمشي وتجي. قالوا عاوزين يزيدوا تعريفة الكهربة. عليك الله لو ما حركات منك – هسع موضوع الكهربة بدخلو في العمود دا مالك؟. عليك الله ما دخل لينا حاجات زي دي في العمود دا. زي خليفة ود الجلو. خليفة ود الجلو مالو؟. خليفة ود الجلو كان عندهم (كديسة). كديسة حنكوشة شديد. الفورة يمشن قدامها وينططن ما بتعمل ليهن اي حاجة. كديسة مسكينة شديد. تقول مرخصنها في حدايق عبود. اصلو ما كديسة مستشفيات. حليل كدايس زمان. خليفة ود الجلو ..عندو عمو صعب. العم الما بتفاهم داك. العم البقول ليك اي حاجة تعملها – (البتعمل فيه دا غلط). دا كلامو. اي حاجة عندو غلط. عم صعب شديد – كل ما يكون مارق – بقيف يعاين في عداد الكهربة. تقول الكهربة عاوزين يرسلوها رصيد. عمكم شاف الكديسة متحنكشة – الكلام ما عجبو. كيف يعني؟. كديسة (الفورة) ينططن قدام عيونها وما تعمل ليهن حاجة. عمكم قال لي ود اخوه خليفة ود الجلو ..اسمع الكديسة دي اعمل ليها دورة تدربية. دخلها دورة تدريبية عشان تعرف تفترس (الفيران). الكديسة دخلوها دورة تدربية. تتخيلو حصل شنو بعد الدورة التدريبية. الكديسة طلعت زي (الترتيب). هسع الترتيب الدخلو هنا شنو؟. الكديسة بعد الدورة التدريبية بقت وقت تشوف ليها (فار) بتضرب تلاتة تسعات. المهم هسع دا ما موضوعنا. موضوعنا (اندرزينهو). شنو عاوز تعملها لينا كلها (كدايس). نحن الكدايس في البيت ما قاعدين نريدها ..تقوم تجيبها لينا في (العمود). والله يا جماعة الزول وقت يكون بيكتب ليه في عمود الساعة اتنين صباحا ..(الكدايس) بدون ما تشعر بتلقاهن دخلن في العمود. تكون بتتكلم عن (الكهربة) تلقى نفسك فجأة كدا خشيت في (كديس). بتتكلم عن برمجة قناة النيل الازرق في العيد ..ومساختها زي (موية البليلة)..تقوم تخش ليك في (كديسة). دي كدايس غير شعورية. لكن انتوا ما سألتوني. ما قلتوا لي دخلت (الكهربة) في العمود الفرايحي دا ليه؟. بقول ليكم. ناس الكهربة. العلماء ديل. الخبراء بتاعننا الما عارفين اي شيء. قاعدين ساكت في مكاتب (مكيفة). وراكبين عربيات فارهة. الجماعة العلماء ديل – لو جابوا هدف اندرزينهو دا بحل ليهم مشكلة الكهربة. وبحل ليهم مشكلة الموية. بدل ما تعملوها لينا زيادات. العلماء ديل. الخبراء بتاعننا ما عندهم حاجة غير يزيدوا التعريفة. بس دي البعرفوا ليها. هسع عليكم الله لو جابوا هدف اندزرينهو دا وفكوا عليه طلاب جامعة السودان ..ما بحلوا مشكلة الكهربة. ما بشيلوا لينا قطوعات الموية دي. الهدف دا ازمة المواصلات ذاتها بحلها. الغاز. كوبري المنشية. كوبري المنشية مالو؟. تفتكروا انا من قبيل بقول ليكم في (الكدايس) دي لعب. انا قاعد العب معاكم يا جماعة. انا قاعد اتكلم ساكت. يا جماعة الموضوع دا مقصود. اي كديسة دخلت في العمود دا – دخلت بي بفهم. هدف اندرزينهو دا بحل مشاكلنا كلها. والله بعد السخانة دي ما بنشكي فيها. نترس فيها زي (تريس) الشيرية. عليك الله – وامانة فيك تريس الشيرية الدخلو في الموضوع شنو؟. انا عارف. قلت ليكم الزول وقت يكون فرحان بقوم يتلخبط. بدون ما تشعر بتلقى نفسك مشغل نغمات الموبايل. موش زمان وقت الموبايلات دي ظهرت يا دوب كان في موضة (نغمات). الواحد تلقاه ماشي في شارع الله دا مشغل نغمات الموبايل. شيء عثمان حسين. وشيء النعام آدم. وشيء صديق أحمد. هسع انا رجعت للزمن داك. شغلت النغمات. الناس ح يقولوا شنو؟. ح يقولوا دي رجعية. ح يقولوا ما معقول زي عايش من العصر الحجري الى الآن قاعد بسمع في نغمات الموبايل. غايتو هدف اندرزينهو دا عمل فينا عمائل. هدف اندرزينهو دا زي (التحلية) البجيبوها ليك في الصالون قبل الغداء. تخش في (التحلية) لمن العراقي اللابسو تحت الجلابية (يقرح). لونو يقلب من (الفرحة). ………… و قالوا ليك مريخابي طقتو كهربة – الدكتور قال ليهم دي ما كهربة دا هدف اندرزينهو. الدكتور من قال ليهم كدا – قنعو منو. اهلو طوالي ودوه احمد شرفي. يا سلك. يا سلك. هل تسمعني. والله يا سلك لو جابوا ليكم هدف زي هدف اندرزينهو دا …حفلاتكم تدور للعيد الكبير. يا سلك هدف زي دا بتمشوا ليه المسرح القومي. او قاعة الصداقة. والزول الفنانو عبدالكريم الكابلي وقت يسألوه فنانك المفضل منو؟. بقول ليهم اندرزينهو. كمان عاوز تضيع لينا كابلي. اوعك. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. السيدة (ل) – تتخيلي في فرحة زي دي تاني ح اجيب ليك سيرة (الكهربة). وقرض على كدا.