دق الدلجة محمد عبد الماجد يا امير كمال ما تستعجل على (الازرق) كلو شيء بي وقتو بكري المدينة قاعد (8) شهور …اول مرة نشوفو فرحان لمن لبس اللون (الازرق). جابوه ليك في (سلم الطيارة) عاوز يطير من الفرح. اول انت من البداية الجابرك على اللون (الاصفر) شنو؟. الغريبة – حالة الفرح برضو كانت ظاهرة على علاءالدين يوسف …(العودة الى الجذور). وما عاوزين نجيب سيرة عبده جابر. خلوها مستورة. نحن ما عندنا مانع تلبسو (الازرق) كلكم …عدا (ايمن سعيد). بعدين انتوا لو ما مسافرين بي طيارة خاصة …الازرق دا كان برجعوكم بيه من البوابة الرئيسية لمطار الخرطوم. عشان طيارتكم الخاصة الدفعتو فيها 200 الف دولار ..خلناكم لبستو (الازرق). الازرق فرق طبعا. السماوي ..ما فيه اي كلام. الازرق الذي ارتداه فريق المريخ عندما غادر الى الجزائر ..كان يبدو لائقا مع (امير كمال). ح تقول لي ليه امير كمال؟. واشمعنا. وانت قاصد شنو؟. الموضوع واضح. امير كمال عقدو مع المريخ باقى ليه (3) شهور فقط. يفصل امير كمال من (المليارات)…ثلاثة شهور فقط. سعر امير كمال طبعا تضاعف ..بعد ما لعب في (المجموعات). رمضان عحب وهو بلعب في (التمهيدي) شال ليه تلاتة مليار جنيه. بكري المدينة بي (بونيتو)..قبض من المريخ تلاتة مليار جنيه وسجل في الدوري الممتاز هدفين فقط. عبده جابر ..ما قاعد يلعب سجل له (9) اهداف. صهيب الثعلب كل الدقائق التى لعبها مع الهلال لا تتجاوز ليها (120) دقيقة عندو تلاتة اهداف. وليد الشعلة في الكشف الافريقي غير موجود – عندو خمسة اهداف. بكري المدينة (لجنة الحكام) واسامة عطا المنان يساعدو فيه ويرفعو ليه في الايقاف والمعنويات مع ذلك عندو هدفين. وفي هدف ملغي – لأن المباراة معادة. يعني عندو هدف وحيد. الحاجات دي كلها بتخلي سعر امير كمال ..حسب مرحلة المجموعات ..والدولار ابوصلعة يصل الى (11) مليار جنيه. طبعا ال (11) مليار عند الكاردينال ولا حاجة. ممكن يجيبها (طوب احمر). الكاردينال بلعب كمان. يا امير كمال باقى ليك (3) شهور فقط ..فتح عينك واحسبها صاح. الجماعة ديل ما يقولوا ليك القروش دفعناها في (الطيارة) – انت مالك ومال الطيارة. لو جابو ليك سيرة الطيارة يا امير كمال ..ما عندك قضية بيها..ولا تجامل في الموضوع دا. الموضوع واضح. والواضح ما فاضح. سعرك الآن عمل (11) مليار. بعدين انت ما عارف الكاردينال دا زول بتاع سوق ..الكاردنيال دا فضي ليك السوق عديل كدا ..عشان تأخد راحتك للاخر. الكاردينال اصلو ما قصر معاك. الكاردينال اعاد تسجيل نزار حامد ..عشان يتفرغ لي تلفوناتك الكتيرة دي. واعاد الكاردنيال تسجيل الشغيل ..وبقى ما عندو اي شغلة في التسجيلات القادمة غيرك. مساوي ذاتو قائد الهلال ..اعاد تسجيله ..بقيت براك في السوق يا امير كمال. اخد راحتك ..براك. ال (11) مليار ما تنقص قرش. جماعتكم ديل اذا كان القروش بيكبوها في حاجة فارغة ساكت ..بدفعوها في طيارة ..ما يدفعوها فيك انت. فتح عينك. انت بعد كدا وصلت المجموعات ..والمجموعات دي ناس المريخ في 10 سنوات بصلوها مرة. الهلال كل سنة بلعب في المجموعات. بي عمر بخيت. بي المعز محجوب. بالصيني. بي يونس الطيب ..بنصل المجموعات بنصل المجموعات. واظن انت بعد العمر دا تاني ما بتلعب في (التمهيدي). ولا بغشوك بي (سيكافا). هسع في زول يا جماعة في المريخ يجيب سيرة سيكافا. بالغلط كدا سمعتوا ليكم سيرة لي سيكافا. عشان تعرفوا الفرق. الفرق ظاهر في (الطيارات). امير كمال ابقى سامع …الجماعة ديل دفعوا ليك زي ما بدفعوا في بكري المدينة …اتسجل. ما دفعوا ليك …والله انت مساوي تشكلوا ليكم (دفاع)…ضوء ما بمرق منو. ولا نسمة. واتير توماس. مالك ومال ناس ايمن سعيد …ترابيزهم مدورة من مغرب بدري. تعال شوف ناس الشغيل ..ناس بشه ..الكورة عندهم تعجب. ألعب مع دفعتك نزار حامد. انت ما قاعد تشوف نزار حامد بعمل في شنو؟. بتحرق دمك مالك مع ناس ضفر. ناس ضفر ديل لا بلعبوا معاهم …ولا تغش نفسك ساكت. انت سعرك الآن (11) مليار ..ناس المريخ ديل لو ادوك تسعة ..عيد تسجلك. لكن دون التسعة مليار ..ولا تجامل. دا مستقبلك. ودي حياتك. وبعد تلات سنوات ..لا بتلقى جمال الوالي ..ولا بتلقى صلاح ادريس. بعد تلات سنوات ما بتلقى زول قدامك غير الكاردينال دا. ألعب في المضمون..مالك ومال التلتلة …وكلام ابوجريشة الكتير..وعبدالصمد البزعل ويرجع براهو. ديل ما ناس كورة. ديل (الطيارة) ما قادرين عليها – تفتكروا بقدروا على امير كمال. شوف مستقبلك. لو دفعوا ليك التسعة ..اتسجل. لو ما دفعوا ليك كمان ما تبقى عليك لا كورة ولا قروش. تعال الهلال ..بتلقى القروش وبتلقى الكورة. ناس بفهموا كورة ..واولاد صغار …مستقبل مشرق عشر سنوات لي قدام ما في مشكلة. ناس المريخ ديل في نوفمبر ..ح تكون عندهم مية مشكلة. بلة جابر ..مفكوك. وبلة جابر مع الفكة ..عندو زعلة. واحمد الباشا ..(وهو افضل لاعب في المريخ الآن)..تلعبوه او تحاربوه ..ما في افضل من الباشا في المريخ الآن. في نوفمبر ..راجي عبدالعاطي برضو مفكوك…كابتن المريخ وقائده. يا امير ابقى مفتح ..مع الكمية دي ناس المريخ ما بزيدوك فوق المليار ..لو بالغو كدا بقولوا ليك اتنين. وح يقولوا ليك نحن قائد المريخ وكابتنه راجي عبدالعاطي اديناه اتنين مليار ونص. الكلام دا اوعى يقولوا ليك. المريخ مع طيارتو الخاصة دي ..واربعة لاعبين مفكوكين ..طبيعي ما يرفعوا السعر فوق الاتنين مليار. تعال الهلال ..ما عندو اي لاعب مفكوك ..يعني ما عندو اي مشكلة. ولا عندنا خطوط طيران عاوزة مننا قروش. يا كاردينال التسجيلات القادمة اكتفى محليا بي امير كمال والباشا وعماري وقفل القزاز على كدا. والله تعمل كدا. لا جمال ولا صلاح ..يشربوا ما يروا. الهلال فيه اولاد صغار ..محتاجين لي عناصر خبرة. جيبوا ليهم اتنين تلاتة لاعبين خبرة كدا ..وفكوهم مع ناس بشه وكاريكا ونزار والثعلب وبشه الصغير والصيني والشغيل …والله تعملوا تيم ..يقيف قدام برشلونة عادي. مانشيتسر سيتي ذاتو ما سائلين فيه. اتحرك من الآن يا كاردينال وامس ملفاتك ..واستفيد من تجربة (بكري المدينة). اكيد خبراتك بقت اكبر. وعندك (حساب) عاوز تخلصه مع جمال الوالي. مع جمال الوالي وصلاح ادريس. ما مشيت لوزان ..جيب امير كمال. افضل رد على الجماعة ديل ..(التسجيلات). والتسجيلات باقي ليها (3) شهور. ابقوا عارفين. وزي ما كان بعملوا المريخاب ويزعزعوا لينا استقرار (ولادنا) ونحن في نهاية الموسم …زعزعوا الجماعة. بالقانون واللوائح ..الهلال يمكن ان يفاوض الآن امير كمال ..وممكن يوقع معاه عديل كدا. المريخاب ديل ..ح يحاولوا يعملوا ليكم (اتفاقية)..عشان يعيدوا اولادهم ديل بي اقل سعر. اوعكم يدخلوا ليكم الحس الوطني ..واتفاقية الجنتل مان. كلام زي دا تاني ما بمشي علينا. بعدين الهلال ذاتو ما عندو اي لاعب مفكوك. فاضيين ومتفرغين لي امير كمال. عندكم تسعة ..مبروك عليكم. ما عندكم تسعة ..خلوا الولد يشوف مستقبله. بس انت يا امير ما تستعجل كمان. ما تلبس الازرق من الآن. اصبر شوية على ناس ضفر ديل. ……….. و امير كمال من التسجيلات الماضية رفض اعادة قيده. امير كمال عاوز الهلال. يا الكاردنيال لو في رقم غريب ضرب ليك ..دا يكون امير كمال. احمد الباشا ظلموه ظلم الحسن والحسين في المريخ. على قناعة تامة ..ان الباشا افضل لاعب في المريخ. امكانيات الباشا ..(مجمدة). اتخيلوا الباشا مع بشه وكاريكا ونزار والشغيل. والله قطر ما يقيف قدامهم تاني. اتخيلوا امير كمال واتير توماس في الدفاع. او امير كمال ومساوي. او مساوي واتير توماس. نملة ما بتفوت. الرد الرد …امير السد. ويجب ان يرد الهلال الآن. الكاردنيال فريقه متصدر الممتاز الان. والكاردينال سوف يتأهل فريقه لدور الاربعة. وان نشاءالله الهلال يجيب الكاس. باقى للكاردينال ان يرد الصاع صاعين في التسجيلات. ….. السيدة (ل) ما تدخلي (المطرة) بيناتنا. وقرَض على كدا.
