(9) باسطة المريخ يا عوض شكسبير بنقول ليك (الباسطة) عملت فيكم عمايل ما كويسة – ارتكبت فيكم جريمة عديل كدا – لمن خلتكم تشجعوا المريخ ناس بله جابر ديل يجروا جري الوحوش وفي النهاية يعملوا ليهم اتفاقية جنتل مان يعيدوا توقيعهم في المريخ ب (100) ألف جنيه فقط وناس بكري المدينة يدفعوا فيهم (3) مليار الباسطة لو دامت لي ناس موسى الزومة وبله جابر ما كانت جات لي (بكري المدينة) يا صديق علي صالح عليك الله لمن تتكلم عن الهلال أبقى اتكلم عن الهلال بأدب – أنت لم تتجاوز بعد حتة تشيل الجوازات وترجعها...تحجز للمريخ وتطلِّع كروت الحمى الصفراء علاقة الانتماء للمريخ مبنية دائماً على (المصلحة) – نادراً ما تجد مريخابي أصبح (مريخابي) كدا بالفطرة أو عن طريق الإعجاب. أي واحد فيهم بقى مريخابي بعد ما كروه...(يعني حفزوه). ما في مريخابي ساكت كدا. الهلالاب الواحد فيهم بقول ليك قمت لقيت نفسي (هلالابي)...وأنا لو من قمت لقيت نفسي مريخابي كان ممكن أعمل لي (كارثة). ممكن أعمل لي (جريمة). الزول ببقى مريخابي كيف؟..(الكلام دا أحسن منو حادث في شارع التحدي). وممكن الهلالابي يقول ليك بقيت (هلالابي) بعد ما شفت جكسا أو شفت تنقا أو شفت طارق أو كاريكا بقيت هلالابي. انتوا بتقولوا شفتوا منو؟. والهلالابي بقول ليك لقيت محمد وردي بغني في (وكانت ساعة النصر في اكتمال الهلال) – الموضوع كبر في رأسي. أو اللون الأبيض والأزرق دا عليك الله بخلوه. زول يشوف (الهلال) في السما – البخليه يشجع (النجمة) شنو؟. عينكم في (الفيل) تشجعوا لي في (الضل). تعالوا شوفوا المريخاب – ببقوا مريخاب كيف؟. الممثل الرائع والكوميديان (عوض شكسبير) قبل أيام قدمت قناة النيل الأزرق معهم سهرة قبل مباراة القمة في الممتاز. عوض شكسبير حكى براهو كدا كيف بقى مريخابي ؟. تعالوا شوفوا. قال عوض شكسبير عندما كان صغيراً كان والدهم عندما ينتصر المريخ بجيب ليهم (باسطة). عشان كدا ارتبطت عندهم (الباسطة) بي انتصار المريخ. وأصبح عوض شكسبير مريخابي ما عشان المريخ. (المريخ) ما فيه حاجة – الزول دا بقى مريخابي عشان (الباسطة) البجيبها ليهم والدهم. أها يا جماعة أنا جبت شيء من عندي. الكلام دا قالوا عوض شكسبير في قناة النيل الأزرق – واعترف بيه قدام كل الناس. لذلك نحن يا عوض شكسبير بنقول ليك (الباسطة) عملت فيكم عمايل ما كويسة – ارتكبت فيكم جريمة عديل كدا – لمن خلتكم تشجعوا المريخ. بقيتوا تشجعوا المريخ بالباسطة. يعني لو الوقت داك يا عوض شكسبير جابوا ليكم (جاتو) ح تشجعوا الهلال. الباسطة (البلدية) ما بتنافس مع (الجاتو). هذا اثبات وتأكيد أنو ما في مريخابي ببقى مريخابي ساكت. موش الزول وقت يجيبوا ليه حاجة (مُرة) بكون محتاج ليه لي حاجة (حلوة). مرارة المريخ دا عاوزة ليها (باسطة). وجمال الوالي الآن اتفنن في تقديم (الباسطة). جمال الوالي مفتكر الحكاية ح تمشي معاهم (باسطة) كدا. صاحبكم ما عارف أنو الموضوع دا عندو نهاية. جمال الوالي أصبح يستغل المواقف – ويتقدم من خلالها بحثاً من أن يجمل صورته وأن يفرض وجوده في الساحة. فقد فشل جمال الوالي في أن يجد له مكانة في البطولات والمسابقات فهو على نطاق كرة القدم خارجياً بطلع من دور ال (64). ومحلياً – لو عمل شنو داك ما بتجاوز أن يكون (وصيف) للهلال. يعمل ليه طابق تاني. يجيبوا ليه مقصورة طائرة. يسجل عصام الحضري. كلتشي. هيثم مصطفى. ما عندو غير أن يكون (وصيفاً) للهلال. الوصافة دي أصلو ما بتفوتو. لذا يبحث جمال الوالي عن نجومية له في فترة التسجيلات – عسى ولعل تهتف له بعض الجماهير أو يكتب عنو أو يحمل لاعب صورته. هذا يرضى جمال الوالي. والثابت والواضح أنه ما في أي لاعب بمشي المريخ عشان المريخ. كلهم بمشوا المريخ عشان جمال الوالي. عشان كدا بشيلوا صورة جمال الوالي. وناس صديق علي صالح ومتوكل أحمد علي ما عندهم أكتر من أن يقعدوا يتصوروا ويفتحوا خشومهم. زي كأنو (فتح الخشم) دا فيه بطولة ليهم. يا صديق علي صالح عليك الله لمن تتكلم عن الهلال أبقى اتكلم عن الهلال بأدب – أنت لم تتجاوز بعد حتة تشيل الجوازات وترجعها...تحجز للمريخ وتطلِّع كروت الحمي الصفراء. يا صديق علي صالح أنت ما وصلت مرحلة (مناطحة) الهلال. وإلى الان أنت في المريخ لك فقط أجر (المناولة). وأجر المناولة ذاتو بتقسمو معاك متوكل أحمد علي. ما تزعجونا ساكت. ما في فلاحة في أنك تعطي لاعب من الهلال (5) مليار جنيه أو قل (3) مليار جنيه وتكون فرحان بذلك. يعني شنو؟. بكري المدينة دا لو في فريق من الدرجة الثالثة دفع ليه (3) مليار بلعب معاهم. ما عندو أي مشكلة. لذلك بنقول ليكم بكري المدينة الجابتو (الباسطة) للمريخ. لكن الباسطة لو دامت لي ناس موسى الزومة وبله جابر ما كانت جات لي (بكري المدينة). إذا كان انتماء اللاعب بشترى بالمال في المريخ فإن تقدير جمال الوالي وإعلام المريخ وجماهيرهم لا يكون للاعب إلا إذا جاء من الهلال. ناس بله جابر ديل يجروا جري الوحوش وفي النهاية يعملوا ليهم اتفاقية جنتل مان يعيدوا توقيعهم في المريخ ب (100) ألف جنيه فقط وناس بكري المدينة يدفعوا فيهم (3) مليار. موسى الزومة أعادوا توقيعه في كشوفات المريخ ب (100) ألف جنيه. وناس بكري المدينة ب (3) مليار جنيه. وقالوا كمان خمسة. ناس قلق والباشا كلهم لم يدفعوا لهم أكتر من (100) ألف جنيه عشان بس ما جوا من الهلال. عشان كدا الباشا الموسم كلو زعلان. واسمو ذاتو بقوا ينسوه في (الكشف). هسع اسم بكري المدينة بتنسوه. تلقاهم كانوا مركزين في بكري المدينة عشان كدا أهملوا أحمد الباشا. طبعاً في المريخ دا كلو في تلاتة لاعبين فقط ممكن يلعبوا في الهلال. أحمد الباشا ورمضان عجب وأمير كمال – تاني ما في أي لاعب بستحق يلعب في الهلال. ضفر لو اديتونا معاه (طابق تاني) ما عاوزنو. فيصل موسى لو جبتو لينا معاه (المدينة) الرياضية ما عاوزنو. عليكم الله شوفوا الفرق. اللاعب وقت يكون بلعب في الهلال يقيَّم ب (5) مليار جنيه..ويكون حديث الناس والموسم. ووقت اللاعب يكون بلعب في المريخ زي (فيصل موسى) كدا ما في زول بشعر بيه. هسع فيصل موسى دا بكون أعاد تسجيلو في المريخ بي صندوق بيبسي ما أكتر من كدا. جمال الوالي اللاعب وقت يرتدي شعار المريخ ما بقيِّمو ولا بعطيه اعتبار. اللاعب ما بعمل ليه قيمة إلّا إذا ارتدى شعار الهلال. تجي المريخ من الهلال – تعمل أي حاجة ، ما في زول بسألك. بكري المدينة الآن (3) مليار جنيه ح يلعب كيف مع بله جابر والباشا (100) ألف جنيه. يعني تاني وقت بخيت خميس يعكس ليه كورة في (الكشافات) وبكري المدينة يقوم يكورك فيه بقوم بخيت خميس بقول ليه: والله أنا لو سجلوني ب (3) مليار الكورة لو عكسوها في (القلابات) أجيبها – خلي (الكشافات). بكري المدينة ح يتعب تعب شديد مع عكسيات المريخ البتمشي كلها (الكشافات). زمان يا بكري المدينة كنت مرتاح – الكورة يجبوها ليك معاها عصير ليمون. تشرب عصيرك وتجيب قونك – هسع مع ناس بخيت خميس ديل – ح تقول والله الأهلي شندي أرحم. ح تفهم حاجة. وعشان المليارات الدفعوها ليك دي – ناس بله جابر ح يركزوا بصورة قاطعة مع (الكشافات). تقالع براك يا بكري (دافعين ليك 3 مليار جنيه). والكورة كمان تعكسها وتجري تلحقها قدام المرمى – ما في زول بيعكس ليك (موش قبضت 3 مليار جنيه). ناس بخيت خميس والباشا ديل تاني ما بتعبوا للمريخ ولا حاجة..خلوا الناس القبضت المليارات تتعب براها. والله نحن ح نتفرغ للموضوع دا .. وح نخلص قروش الشعب السوداني دا من مليارات بكري المدينة دا قرش – قرش. ......... ملحوظة : بكري دا لو فكر بي قروشو دي يبقى (رجل أعمال) كورة تاني ما بلعبها ليكم. هوامش الناشر الهلالي الكبير عبدالله دفع الله اعتبر كتابتنا عن الكاردينال فيها قسوة عليه. عبدالله دفع الله متفق مع الكاردينال في خطوته – فقط ينتظر أن يكون البدلاء في مستوى عال. نحن ما عندنا مشكلة لا مع الكاردينال لا مع البرير لا مع صلاح إدريس – المهم يكون الهلال في العلالي. وإذا نجح الكاردينال في بناء هلال قوى وسجل صاح ونجح في الموسم القادم – يبقى هذا ما نطلبه وما نتمناه. مطلوب من الكاردينال أن يسجل صاح وأن يأتي ببدلاء على وزن عالي لأنه الآن وضع نفسه في مطب صعب. خلي الآراء الناقدة لخطوات الكاردينال كلها تطلع غلط نتمنى ذلك – وإن شاء الله مجلس الهلال ينجح في التسجيلات. الهلال سعى سعياً جاداً في مواسم سابقة من أجل أن يطلق الأهلي شندي سراح أحد لاعبيه للهلال. وسعى الهلال نحو فارس عبدالله – ورفض صلاح إدريس. صلاح إدريس الآن يقدم فارس للمريخ. ومن قبل قدم فيصل موسى وباسيرو ومالك. يبدو أن جمال الوالي وصلاح إدريس اتفقا. الأهلي شندي أصبح أحد روافد المريخ. يا الكاردينال شد حيلك أنت بتنازل جمال الوالي وصلاح إدريس في آنٍ واحد. فتح عينك. ....... عاجل : ناس المريخ محتاجين يجيبوا ليكم (كشافة) جديدة – الموضوع دا (4) كشافات ما كفاية عليه. وإن طال السفر - محمد عبد الماجد صحيفة قوون
