في السلك بابكر سلك البنسلين يا تمرجي *قاموا اتغطوا بالكراسي من المطره عشان ما يترشوا *وبرضو اترشوا *والكورة منقوله عبر البي ان سبورت *العالم كلو شايفها *اسي ناس العالم لو قالوا السودانيين بختوا الكرسي في راسهم وما بقعدوا فيهو *نقول ليهم شنو ؟؟؟ *غايتو كان يوم عجيب *يوم الرشاشات *المطره ترش *اتحاد الجزائر يرش *اعلام الهلال يغش *ايها الناس *البرازيلي ده حيرنا *ضيع البلنت *وختفوا منو الكورة دخلوها قون *القون التاني *البرازيلي ده يكون باولينو حرشو ؟؟؟ *اصلوا اعلام الهلال طوالي عندو مكنه *يجي مازيمبي يقولوا ليك غارزيتو وراهو الخطه *يجي الصفاقسي يقولوا ليك النفطي كشف ليهم الهلال *يجي الاسماعيلي يقولوا ليك الحضري كلمهم *وقال ليهو ايسكوتي ايسكوتي *اسي بكون باولينو كلم البرازيلي ده قال ليهو ضيعها يا فرده *المهم *هل هذا البرازيلي برازيلي ؟؟؟ *الزول ده احتمال تايواني *احتمال صيني *لكن برازيلي ( اسلي ما ازن ) *لو ماقادريم تجيبوا برازيلي اصلي يا كردنه *كان تجيبوا برازيلي تجميع جياد *كان بكون احسن من ده *جياد تجميعها في السلك *صناعتها ما شفنا عليها شئ *لكن زي ده *اصلو ما شفنا *اندريا *امس وصلتني قصيده في الواتس يجاري فيها كاتبها اغنية اندريا *روعه شديد *قال الشاعر *ماسورة خمسه بوصه اندريا ***** جاب معاه العروسه اندريا *كان ما كلام ناس روشا اندريا **** راكوبتا معروشه اندريا *برازيلي بتاع رجيع اندريا ***** اندونيسي يا تجميع اندريا *حلاوة اللكوم اندريا ****** الراقده في الخرتوم اندريا *كان ما كلام فطوم اندريا ***** بسفرك اليوم اندريا *حمام خلعوهوا وطار اندريا **** شايل معاو دولار اندريا *كردنه فيك احتار اندريا ****** كمل باكو سجار اندريا *كرهت الاهله الشرفاء نانسي عجرم زاتها يا اندريا *المهم *اتحاد الجزائر دقس *سافروا طوالي بعد الكورة *كان يسوقوا الهلال في يدهم *الهلال ده ببرمها و ما بمشي الجزائر *بكبرها يا حبيب *كان تسوقوهوا في ايدكم وتمشوا بيهو *كلمناكم يا روشا *قلنا ليكم المثل قال *ام جقلو ولا مشي عرجان *اها جقللت *المهم *قون بكري التالت في مازيمبي لم يجد له عمك قوقل سببا للالغاء *وده حال التحكيم الافريقي *لكن ان تصل الحقاره بينا داخل استادنا *يبقي الموضوع داير شفتنه من المجلس *والكاف داير العين الحمراء يا جمال *لبنت وما تتهاون فيها *فهو انجاز يحسب لك وتتويجا لجهودك *اتشفتن يا جيمي عشان ما نتبشتن *فنيا وتكتيكيا مازيمبي اقل مننا *ويمكننا تخطيه بسهوله في معقله *بس نضمن حماية لي اولادنا ولي مجهودهم في الملعب *اتشفتن يا جيمي *ايها الناس *فائدة مجدي شنو علي رأس لجنة الحكام الافريقيه *والمريخ يظلم عيانا بيانا علي ارضه *يا مجدي احترنا فيك *قلنا ما ليك دخل في اختيار الحكام *ماليك شخصية داخل لجنتك ؟؟؟ *ما بتصر ليهم سااااي ؟؟؟ *ما بتسأل ليه حصل كده ؟؟؟ *وهل الكاف مريسك علي لجنة ومتيسك لا سمح الله يا مجدي ؟؟؟؟ *هووووووي يا مجدي *جماهير المريخ لاتقتنع بجميع مبررات الظلم حتي ولو كانت منطقيه *جماهير المريخ سمعتهم بي اضاني دي محمنك الظلم الواقع من حكام لجنتك علي المريخ *ورينا الوطنيه يا النائب المحترم في المجلس الوطني *ورينا تصديك ودفاعك عن حقوق مواطن المريخ *اليس مواطن المريخ من ضمن مواطني السودان ؟؟؟ *القسم لخدمة المواطنين بعداله الا يشمل شعب المريخ يا مجدي ؟؟؟ *ورينا يا مجدي *وسيجل التاريخ للرجال مواقفهم *نتمني ان يسجل لك التاريخ مايجعلك تفخر بانك علي الاقل انصفت شعب المريخ *اها *العقرب بالغ *الغريبه الاهله هتفوا بعد المباراه *عائد عائد يا ارباب *عائد عائد يا عقرب *وسبحان الله *كردنه اتمقلب *بكري في المريخ يتشقلب *والكراسي في الهلال تتشقلب *جنس رش *لكن فيكم زول عارف ليه كديابا ما رقص ؟؟؟؟ *لانو بكري اداهو حقنه *الحقنه حاااااره *بنسلين اظنها *وشدة ما حاره *لمن بكري ضرب الراسيه فوق *كديابا وقع تحت *بنسلين يا عمك *البنسلين يا تمرجي *من الليله سميتو التمرجي *ولانو ربنا في *قون بكري الماحسبوهوا ده *ربنا بعوضو ليهو في الكنغو ان شاء الله *كورس الحقن بتاع كديابا فيهو حقنه في الكنغو ان شاء الله *التمرجي هداف البطوله *وبرضك يقولوا ليك بكري ما نفع المريخ *جنينتنا ياخ *وعندنا شتلتين صغااااااار *ما بنستناهم يكبروا *بنشتلهم من اسي *عشان اندريا ده ما يخرب كورتهم *ايها الناس *ريحة المطار فاحت شديد *بالنسبه لينا عطر *وبالنسبه لغيرنا مبيد *وبنتعطر بنتعطر *والعندو حساسيه *من اسي يطلع الجواز الممغنط ويتخارج *سودان المريخ سيتعطر بعطر المريخ *ريحة المطار في عبوات مناسبه للجميع *ايها الناس *جمهور المريخ معلم *كلو يوم يبدع اكثر *ولكن مافعله اولتراس الجوارح ادهشنا شديد *سنعود لدور الجماهير وابداعاتهم غدا ان شاء الله *شكرا جمهورنا *شكرا جوارحنا *شكرا كل راوبطنا واولتراساتنا *بل بدون بلايلي *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *قالوا في اللبن بطحنوا لينا الرز يا والينا *ويدوهوا البنسلين خدعة لينا *نشوف الجماده صفراء يا والينا *نقول لبن من امو محلوب لينا *لكن تفتيحه نحنا يا والينا *اللبن لمن نفوروا طبعا بقوم يا والينا *والرز بالبنسلين بغلي في محلو ومابقوم لينا *تفتيحه نحنا يا والينا سلك كهربا ننساك كيف والكلب يضحك ساي قال بقيتو زي اللبن بتفوروا في محلكم وما بتقوموا زادوكم بنسلين يا حلوين !!!! والي لقاء سلك
