دق الدلجة محمد عبد الماجد مازيمبي الجابو المناقل شنو كمان؟ وقت (الولد) حول لي (الطبق) ..شفت ليك (التلاتة) مكتوبة فوق الشاشة. قلت يمكن دا فاصل اعلاني. يمكن الاستديو التحليلي. لكني لقيتهم مصرين على (التلاتة). التلاتة تلاتة مازيمبي..والشاشة شاشة (النيلين). دا شنو؟. في (لخبطة) حصلت. والشعار نفس الشعار. مع تصويركم الملخبط دا – عاوزني افرز ليكم الاهلي مدني من مازيمبي كيف؟. ناس (النيلين) ديل جنوا؟. قلت للولد انت حولت (الطبق) وإلّا ركبت (كرت) بي ان سبورت. الطبق دا يا ولد انت لفيتو على وين؟. مالك انت عاوز تقوم على الضغط؟. مالك عاوز تجيب لي المصران. ناس بي ان سبورت تصويرهم مالو بقى كعب كدا؟. الناس ديل خلوا الكورة وبقوا ينقلوا ليك (الحوار الوطني). تلاتة!!. التلاتة دي اصلو ما غريبة عليّ. التلاتة دي مرت علي قبل كدا. شفتها. مالوا غارزيتو بقى يعمل في حركات (مازدا). تلاتة جو وتلاتة برة. تلاتة امام مازيمبي. وتلاتة قدام الاهلي مدنى. مازدا ما كان بكرر (الثلاثيات) بهذا السرعة. وفي المناقل كمان!!. الفرنسي دا خربتو طبعو…قعد كتير في البلد. بقى (مازدا) عديل. قالوا اليوم كلو بقى حايم في السوق الشعبي. وبضرب في (الزلابية) كمان. يا محسن سيد ..فرقك ظهر. شلتوها ساكت مع (رزاق) في عطبرة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). قالوا ليك بعد تلاتة المناقل – لجنة الاستئنافات اجتمعت طوالي ..وقررت تحسم الشكوى في ليلها. ما تصبحها. يحسموها قبلها. النتيجة دي لو لموا فيها ناس خالد عزالدين والرشيد علي عمر ..ما بريحو المريخاب. بشيلوا حالهم. بياكلو لحمهم. عشان كدا ألحقوها سريع. لجنة الاستئنافات اجتمعت في ليلتها. ح تقولوا لي اول المريخ اشتكى؟. ح اقول ليكم اول لجنة الاستئنافات دي بتنتظر المريخ لمن يشتكي. شكوة شنو؟. الجماعة ديل ما بيناتهم (شكوى). بعدين التلاتة دي كتيرة – ما عاوزة ليها (شكوى). زلابية ساكت بتحسم ليكم الموضوع. لجنة الاستئنافات اول حاجة قالت (البرد) دا ما برد كورة. هو وينو (البرد)؟. يا جماعة لجنة الاستئنافات دي كمان عاوزة ليها (برد). نسمة ساكت ممكن تعيد بيها المباراة. ونجيلة الملعب ذاتها قالوا ما قانونية ..في (نجيلات) كدا زايدة 4 مليمترات..شوف عيونا ديل. كما نظرت لجنة الاستئنافات في (البص) الذي نقل المريخ من الخرطوم الى المناقل ووجدت ان البص ما كان فيه (صبارة) موية. تتخيلوا. كيف (بص) ما تكون فيها (صبارة) موية. عليه فان هذا الامر من لائحة اسامة عطا المنان بيعيد المباراة. بعيد ابوها كمان. ولو عاوزين ليكم (مستند) بجيبو ليكم. هسع بسافر القضارف واجيب ليكم (مستند) – كمان دي غالبة ليها زول. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الغريبة والشيء الما قادر افهمه لغاية الساعات الاولى من صباح اليوم (بكتب في وقت متأخر شديد). التلاتة دي نفس تلاتة مازيمبي…كنت عاوز اقول ليكم كلها جات في الشوط التاني ..اتذكرت ناس الاهلي مدني عندهم هدف جاء في الشوط الاول – ديل ما عندهم (صبر). اكعب من مازيمبي. الشعار واحد. قالوا ليك علي جعفر المباراة كلها يكورك في الريح علي ..امسك (سماتا) ..ما يفوت منك (سماتا). يا زول سماتا البجيبو (المناقل) شنو في البرد دا؟. سماتا ما بجي (المناقل) – لكن البقنع لينا ناس (امير كمال) شنو؟. ديل لو جبت ليهم كمال شداد يحاضرهم في الحتة دي ما بقتنعوا ليك بيهو. خلاص (الخوفة) الدخلت فيهم لي يوم الدين تاني ما تطلع. قالوا ليك امير كمال جابوه ليك في (النيلين) بعد المباراة – قايل نفسو في بي ان سبورت ..قال ان شاءالله ح نعوض في المباراة (المعيودة). طبعا جماعتكم اي مباراة يخسروها ..عندهم فرصة تانية في (الاعادة). المباراة بلعبوها مرتين. لجنة الاستئنافات قاعدة – لو جبت لي كلام من برة. ولا بنكروها. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). غايتو تلاتة مازيمبي مع تلاتة الاهلي مدني شبه غريب. شبه حتى في الشعار. اهداف مازيمبي اتنين جابها لاعب واحد وهو سماتا …واهداف الاهلي مدني اتنين جابها ايضا لاعب واحد وهو نادر عطا. شبه غريب. اها مع الحاجات دي عاوزني افرز ليكم الاهلي مدني من مازيمبي كيف؟. حتى زرة (غارزيتو) في الخط ..يقعد يقز ليكم ايدو في حنكو زي كرسي النص المطبق. المحنة دي ما محنة تلاتة الاهلي – المحنة دي محنة جمال الوالي فات. قالوا ليك بعد جمال الوالي ما فات ..(التلج) لي غارزيتو بقوا يشتروه ليه من السوق. ما عندو كهربة في الشقة. والسكر بجيبوه ليه بي ربع الرطل. كيلو ذاتو ما في. لكن السؤال العاوز اقوله من صباح الرحمان ..ومتحرج منو. متحسس شوية. متعقد عديل كدا. انتوا المناقل دي مشيتوا ليها ب (بودي قاردات). وإلّا ساكت كدا. طيب التلاتة في شنو؟. الشغل دا فيه (بودي قاردات). اصلو البودي قاردات ما بطلعوا منها. يا حليل ايام البودي قاردات. والسمك بالقفة. والطيارات الخاصة. واللقيمات مدورة اليوم كلو. شاي الغداء بشربوه ب (اللقيمات). خلاص ديك ايام وانتهت. لكن يا جماعة ناس المريخ ديل لو بلعبوا براهم كدا في الممتاز (من غير لجنة الاستئنافات) بحققوا البطولة. ابدا. الهلال انسحب ليه شهر ونص. ولجنة الاستئنافات تشيل وتعيد في اي مباراة خسرها المريخ – مع ذلك (ومع سبق الاصرا والترصد) المريخ ما قادر يحقق البطولة. براهم كدا ما قادرين يحققوا اللقب. فضيحة السواد. لجنة الاستئنافات بعد كدا تعمل ليكم شنو؟. اظن مع (الاعادة) عاوزين ليكم حافز من الاتحاد العام. مفروض اسامة عطا المنان مع (الاعادة) يدخل ليه (مادة) جديدة. يقول مثلا اي مباراة معادة بي (5) نقاط…تلاتة نقاط شوية على الاعادة. ناس امير كمال السنة دي لعبوا عدد قياسي في المباريات. لعبوا الدوري الممتاز (مضاعف). هسع الجماعة ديل لو الموسم ما ضايقهم ..كانوا عادوا مباراة الاهلي مدني. لكن انتوا يا جماعة تاني لو عاوزين تعيدوا ليكم مباراة عيدوها في قاعة الصداقة. او في سينما الحلفايا. ما في داعي للسفر. والتعب دا. والباصات الما فيها صبارات موية. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اقول ليكم حاجة اخيرة. قالوا ليك المريخ سوف يدخل غدا معسكر مقفول للمباراة المعادة امام الاهلي مدني. …………. و يا جماعة اقول ليكم الكلام الف مرة. جيبوا لينا حمدي الامل. عشان بس تبقى ليهم (موعظة). علي جعفر ..ما جهجهو نادر عطا. علي جعفر جهجهو (البرد). الزول دا شوية (برد) بتجيب خبرو. فريق الاهلي مدني هذا الموسم قدم مباريات كبيرة. مباريات تتناسب مع موقف مجلس ادارة نادي الاهلي تمام. شوفوا النادي لمن يكون عندو موقف ..بكون عندو طعم ..وعندو كورة. وين جزيرة الفيل؟. وين النيل الحصاحيصا؟. المسؤول عن هذا التخبط هو جمال الوالي. جمال الوالي ترك المريخ في وقت حرج. ترك المريخ في هذا التوقيت ..عشان الناس بس تقول المريخ بدون جمال الوالي ما بيبقي. ان شاء الله اعلام المريخ يكون عندو الشجاعة الكافية ويهاجم جمال الوالي بدل مهاجمة لجنة التسيير. اسامة ونسي ..ما عندو (زلابية). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………… السيدة (ل) .. لو قالوا ليك (المناقل) في الكنغو ما تصدقي ..المناقل دي تكلة من الخرطوم. وقرّط على كدا.
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore