دق الدلجة محمد عبد الماجد جركانات ..شوالات ..بودي قاردات..علب مصعب عمر قعدوا معاهو المريخاب في (غرفة مغلقة) وقالوا ليه انت كنت السبب في الخسارة ..مازيمبي عملت دربك ساسق. يجوا ويفوتوا فيك…وانت ولا هنا. الكنغو كلها مرت من خلالك. انت حارس ليك (قنقنر). بوابة عبدالقيوم من ام درمان تشيلها ليموباشي. مصعب عمر (عاين للمروحة) وقال ليهم ..انتوا ناس (ساماتا) ديل …عشرة بودي قاردات ما قدروا يثبتوهم …عاوزني اثبتهم ليكم انا. انتوا جنيتوا؟. جايبين ليكم (10) بودي قاردات ..وبتسألو فينا انا – يعني انا عشان ما عندي (عضلات). فلاحتكم بس فينا. الشيء الجابوه لينا ..وسمعنا بيه في المجالس ان البودي قاردات كانوا حارسين (موية الصحة) في المعسكر. يعملها البودي قاردات ..ويقعوا فيها ناس مصعب عمر. مصعب عمر يعمل ليكم شنو اذا عمر بخيت كل ما يقوم يسخن..مازيمبي بجيب ليه قون. مصعب عمر يمسك ليكم عمر بخيت من (التخسينة). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). المعروف ان غارزيتو الذي اتهمه اعلام المريخ بانه (باع) المباراة نسبة لعلاقته برئيس مازيمبي وحبه للدولار…كان قد وعد المريخاب بكاس البطولة. غارزيتو كان منصة وجه المريخاب عليها كل السهام. (وكان عبدالقادر همد قد شن هجوما على غارزيتو بسبب التبديلات التي اجراها والتي تسببت في خسارة المريخ باخراجه اللاعبين كوفي وديديه وادخاله ل (عمر وضفر) ووصف همت مدرب المريخ بالفاشل الذي لا يجيد قراءة الملعب وقال انه تسبب في خسارة المريخ في شوط المدربين وهو نفس الشيء حينما قبل هدفا في الخرطوم في شوط المدربين واضاف: لم نتوقع هذه التبديلات ولكننا تفاجئنا بانهيار كامل بسبب خطوة غير موفقة). بي صراحة انتوا شوط المدربين ما عندكم…عندكم بس شوط الحكام. دا الفالحين فيه. شفتوا ناس همد براهم بقولوا ادخال (عمر بخيت) كان السبب في الخسارة. ما قلنا ليكم ..بتمشوا وتجوا تقولوها براكم. عملوها في غارزيتو وعمر بخيت ..لو باريتو الهلال تشربو ما بتروا. وتحدث محسن سيد ايضا في اذاعة هوى السودان عن غارزيتو الذي كان قد وصف محسن سيد بانه ما بعرف يرص العلامات. انت يا محسن سيد وقت العلامات ما بتعرف ترصها الفصاحة ليك شنو؟. كدا اتعلم ترصها اول حاجة. محسن سيد دا بذكرني ليك الزول الما بعرف يشك الكوتشينة. وقال محسن سيد عن غارزيتو : (ان المدرب حارب اللاعبين مثل الباشا وتراوري افضل مهاجم مر على تاريخ المريخ والدوري الممتاز بجانب اللاعب اوكرا وبله ومجدي وغيرهم من اللاعبين بجانب الحرب على مساعديه وتم ابعادنا عن مباراة مازيمبي بجانب تعيينه لمدرب حراس لم يمارس كرة القدم ولم يشاهدها الا داخل استاد المريخ). غارزيتو هذا بكل بلاويه تلك كان قد قال ان المريخ هو بطل افريقيا 2015م. ربما لهذا السبب سافر مع المريخ عشرة بودي قاردات ..انتوا عاوزين تشيلوا (الكاس) وإلّا عاوزين تشيلوا (حديد)؟. الكاس ما تقيل كدا. جمال الوالي طالبه غارزيتو بتسجيل مهاجم ومدافع بالاسم – جمال الوالي سجل ليهم عشرة بودي قاردات. خد. الموسم القادم مريخكم دا إلّا يلعب في (رفع الاثقال). ما في كورة محتاجة للبودي قاردات ديل. شفنا اندية عربية بتلعب في (تلب ابيب) معقل اليهود …ما حصل شفنا لينا بودي قارد واحد حايم في المباراة. في مصر حصلت مجزرتين ..مجزرة بورسعيد ومجزرة ملعب الانتاج الحربي …مع ذلك ما شفنا لينا مع كل هذه الاحداث الدامية (كامل الاجسام) واحد. جمال الوالي بشرع ليه في حاجات – نحن عمرنا ما شفناها – ولا سمعنا بيها. (الفاتح النقر كان في برنامج حسن فاروق امس في هلا 96 قد حمل مسئولية خسارة المريخ لمباراته ضد الغربان ل (البودي قاردات) الذين رافقو المريخ للكنغو وقال من اتخذ هذه الخطوة وصل للاعبين انهم في خطر وهو ما اثر نفسيا على اللاعبين خاصة انهم كانو معهم في المعسكر وانهم لم يوفروا الحماية وتم قبضهم وادخالهم للسجن وحمل النقر ما حدث للادارة وقال انهم عرضوا اللاعبين لضغوطات). دا الكلام. الاخطر من هذه ان البودي قاردات ادخلوا المريخ في مشاكل ..واشعلوا الحماس في لاعبي مازيمبي وجماهيرهم. ماشيين تحاربوا ليكم دولة كاملة بي عشرة بودي قاردات. منتهى الاستفزاز. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). مريخابي زعلان – قال لي والله انتوا ما عندكم اي (منطق) – انتوا طيرتو قبالنا …سطر ما جبتوه عن الهلال ..وشابكننا المريخ طار. يعني طيران المريخ غريب عليكم؟. قلت ليه …نحن طرنا ولكن بدون (بودي قاردات). ولا بودي قاردي واحد. يمين (غفير مدرسة) ثانوية بتاعة بنات ما يتبعنا. اللاعب وقت ما يقدر يحمي نفسو ..شن طعمو؟. عملتوا دوشة وسيناريوهات ..وكلام جرايد وبودي قاردات ما في ليهم اي داعي. انتوا يا المريخ ممكن تكسبوا ليكم (شكوى) مدنكلة كدا في كادوقلي. تقولوا مريخاب الجنوب …او رئيس اتحاد القضارف. ما في زول بيسألكم. ممكن تهدنسوا ليكم (طبخة) يخرجها ليكم اسامة عطا المنان ..ويخرج بعدها بتصريح يتحدث عن الامن الاجتماعي. ممكن. اي حاجة جايزة في البلد دي. لكن تكسبوا (مازيمبي) – دي ما بتقدروا عليها. لا بي عشرة بودي قاردات ولا مليون. نحن مازيمبي دا لعبنا معاه خمس مرات في ملعبه …هزمناه وهو في قمة مجده وتعادلنا معه في كل مباريات المجموعات …بي سادومبا .. هيثم مصطفى ..بي بشه ..بي اطهر الطاهر. قدر ما نلاقيه ما بيغلبنا. انتوا يا ناس المريخ بي عشرة بودي قاردات ومضروبين تلاتة. فضيحة السواد. يعني في التسجيلات القادمة – ممكن تسمعوا المريخ يضم لكشفه بودي قاردي (طه سليمان). المريخ يشطب عمر بخيت والمعز محجوب وايهاب زغبير ومصعب عمر واكرا ويسجل خمس بودي قاردات. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). عندنا زول في الحلة شغال في الشوالات. عندو كارو. الساعة واحدة بيجي يكورك شوالات جركانات علب. نسوان الحلة كلهن بطلعن ليه. الايامات دي زولنا دا جاب ليه تقليعة جديدة ..بقى يكورك شوالات ..جركانات ..بودي قاردات …علب. مريخابي ما عندو كرت (الجزيرة) زي ما بقول علاءالدين يوسف ..قالوا ليه المريخ اتغلب تلاتة من مازيمبي. قال ليهم اكيد البودي قاردات ديل طلعوا هلالاب. قاعدين يعملوا شنو للقون التالت. من القون الاول مفروض يدخلو يلخبطوا الكورة. بعدين بدل غارزيتو يدخل البودي قارد ..دخل لينا عمر بخيت. مريخابي تاني شاف صور البودي قاردات بعملوا في الحركات وبيستعرضوا في عضلاتهم ..قال مستوى البودي قارد ما كان كعب …لكن اللاعبين انهاروا في الشوط التاني. الغريبة – نحن شفنا بيكهام. وشفنا زين الدين زيدان. وشفنا فيغو. وشفنا رونالدو. وشفنا ميسي. عمرنا ما شفنا معاهم بودي قاردات. ولا بالغلط. تجوا يا ناس المريخ ..تعملوا ليكم بودي قاردات لبكري المدينة. ضفر تاني ما بلعب ليكم. بعمل ليكم فيها طه سليمان. لو عاوز يرفع ليه كورنر لو ما جبتوا ليه بودي قارد ..ما بعكس الكورة. قالوا ليك في قناة الجزيرة زي ما بقول علاءالدين يوسف ..المحلل الفني انتقد مصعب عمر وقال المريخ عندو مشكلة في (البودي قارد). في مشكلة في الطرف الشمال للبودي قارد. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. و غارزيتو هاجم الحكم وقال مازيمبي بحقق بطولاته بالحكام. الفرنسي ما ورانا الحكم ظلم المريخ في شنو؟. سايق ليك عشرة بودي قاردات وبتتكلم كمان عن (الحكم). وين البودي قاردات؟. بس بعرفوا لي يطردوا عاملات الفندق. الاسياد امس طلعت بعنوان ذكي وظريف عندما اشارت الى ان الكاردنيال في عام حقق ما حققه جمال الوالي في (13) سنة. تبقى (الاسياد) بنكهة خاصة في المانشيتات ..وهو امر تميز فيه الرشيد على عمر ويتخصص. عناوين الاسياد بعد اي نكسة للمريخ تبقى للتاريخ …والزمان. سوف نعود لهذا الموضوع ان شاءالله ..ونقارن بين طيران الهلال وطيران المريخ. بين اطهر وعمر بخيت. مكسيم وجمال. الكاردينال والوالي. الملاحظة تستحق الدراسة. ………….. السيدة (ل) – رياضة التزحلق على الجليد ..عندها علاقة بي البيعمل فيه ابوك الآن. وقرّض على كدا.
