حوار محمد جمال قندول يعد الممثل جمال عبد الرحمن من الذين اثرو الساحة الدراما بقوالب من الاعمال التي خلدت في الوجدان السوداني ابرزها بطولته في سلسلة (متاعب) في التسعينات ، جمال رغم انتاجه المسرحي والدرامي الغزير مقارنة بعدد من الممثلين الا انه حزين لحالة الدراما بشكل عام وله مأخذ كثيرة ،التقيناه به في دردشة شيقة والي مضابطها *جديد اعمالك بالفترة المقبلة ؟ الاستعداد لاعادة مسرحية (النظام يريد) بداية الشهر المقبل *وعلي صعيد الدراما وموسم رمضان المقبل ؟ يا زول انت مالك مستعجل كدا ، رمضان لسي ياخ الله يحيينا *تعليقك علي المنتوج الدرامي الذي قدم في رمضان الماضي ؟ كان ضعيفا جدا رغم انني قدمت فيه عمل (حوش النور) وهيتعرض مرة اخري في قناة النيل الازرق في غضون الايام المقبلة *مشاكل الدراما ، سؤال متكرر واستفاهمات كثيرة ؟ باختصار شديد الدولة ما مهتمة بالدراما *اجابتك مكررة في حين ان البعض يذهب الي تصنيف الممثل السوداني ب(الكسول) ؟ يعني كدا بالعربي انا لو اكسر رقبتي من النشاط اشتغل وين اذا كان في البلد مسرح واحد وقنوات التلفزيون ما بتعرض دراما *تعليقك علي معرض الطرح ضعيف ؟ كدا يا استاذ يا صحفي خلي الناس انت رايك شنو .! *انا صحفي يعني محايد ما بقدر احكم ؟ خليك من انك صحفي انت كمشاهد هي شايف البلد فيها امكانيات *وطيب بدل البكا دا الحلول شنو ؟ الحل الدولة ثم الدولة ثم الدولة *توقعاتك هل ينصلح حال الدراما قريبا ؟ لا اظن ذلك علي الاقل في الوقت القريب *وانطباعك عن وضع المسرح في الاونة الاخيرة ؟ العروض التي تعرض حاليا ضعيفة والموسم المسرحي اصبح شحيح الوضع بالمسرح مأزم جدا حيث لا عروض مقارنة بالماضي بالاضافة الي غياب الانتاج حاله كحال الدراما *ماذ تذكر من رحيق البدايات ؟ ايام دراستي كطالب للموسيقا والدراما *افضل عمل درامي قدمته في مسيرتك ؟ المبدع لا يقيم عمله ولكن علي الصعيد الشخصي اعتز بعمل (الحاج متذكر) بالاذاعة وسلسلة (متاعب بالتلفزيون) *افضل مخرج تعاملت معه ؟ محمد نعيم سعد *فرقة (الاصدقاء) ما بين الامس واليوم ؟ اكيد ما زي زمان كل شي تبدل الزمن والظروف في الماضي كانت العروض مكثقفة والمناخ افضل والاعضاء انفضو ما بين باحثين عن الرزق واخرين هاجرو .. والفنون في البلد دي بقت ما بتاكل عيش زي ما عارف *افضل قرار اتخذته ؟ ان اكون ممثل *لو ما كنت ممثل ؟ كنت هكون دكتور *مدينة في الخاطر ؟ بورتسودان * لونك السياسي ؟ ما عندي اي انتماء سياسي *لو اصبحت وزيرا للثقافة اول قرار تتخذه ؟ يا سيدي ما عايز ابقي وزير *ليه في زول برفض المناصب ؟ انا برفضا انا طيلة عمري ما اشتغلت بالحكومة لمن اشتغل وزير *ليه زعلان من الحكومة ؟ لا ما زعلان بس ما بحب السياسة واعتبرها (لعبة ما كويسة)
