★★نبض الصفوة★★ ★★امير عوض★★ ★بنمسكها من الكوبري★ ★موضوع ولدنا شيبوب ده اصلو ما بنخليهو.. ★حنمسكو كده ستة شهور.. ★لما يجي شهر مايو و التسجيلات تبدأ.. ★بننتظر الكوبري.. ★دي زي بنمسكها من الكبري.. ★الكضب الاتقال الايام الفاتت دي من الصحافة الزرقاء ما ممكن يقع الارض.. ★شينة في حقهم.. ★في بكري المدينة كضبو لمن فترو.. ★مشو لوزان و رجعو.. ★بي خيالهم سافرو.. ★إشتكوا.. ★و وقفو بكري.. و قلعوهو مننا.. ★شهور يكضبو.. ★و المساكين يصفقوا و يصدقوا.. ★بكري تاني ما بدقها.. ★بكري بترجعو لينا لوزان.. ★لمن جاتهم لوز من كترت الكلام عن لوزان.. ★و فجأة.. ★كردنة كب جك الموية.. ★في نص الرؤوس.. ★و قال ليهم موضوع بكري ده انا نسيتو.. ★الغريبة ناس قوون كانو عايزين يشتكو بكري للكاف.. ★مغصة ساكت.. ★جريدة تشتكي لاعب للاتحاد الافريقي.. ★قوون دي آخر مرة كانت لاعبه في الكونفيدرالية.. ★ده بعد شالت الأبطال مرتين.. ★نرجع للكضب.. ★الموسم ده بدهو بي كضبة ألوك.. ★دي جابوها بعد طلعو صفر اليدين من الموسم الفات.. ★عام الرمادة.. كان عبارة عن خلية كضب.. ★حنحل الاتحاد.. ★حننسف الموسم.. ★حنحل لجنة الإستئنافات.. ★حنعيد كورة القمة.. ★حنشتكي اسامه و مجدي للفيفا.. ★كرهو ليك حرف (الحاء) عيشتو.. ★و كلو طلع حجا.. ★هوا.. مالوش دوا.. ★و ما اعتذروا عن الكضبات دي كلها.. ★بلعو لسانهم.. و واصلوا التخدير.. ★لمو كم لاعب من الرديف و بدو يتصورو.. ★مرضة الصور بدت من هنا.. ★هي كانت في ايام صورة بكري.. ★لكن كانت مبادئ.. ★بعد فشل موسم الرماد الكال حماد.. ★المرض إستفحل.. ★الفلاشات فترت بي كترت الصور.. ★و جات اعراض التهابية مع المرض ده.. ★الاعراض دي كانت عبارة عن لقاءات في الاذاعة الرياضية.. ★و إتطورت الإلتهابات لي ورم مزمن.. ★ظهر مع مهرجان طيور الجنة.. ★يوم اللقيمات.. ★بأختصار نهو الموسم مدروخين.. ★و بدو الجديد بي الوك.. ★لاعب ساهل و هاوي و من نادي كلو هواه.. ★و الاهم من كده انو المريخ مفلس.. ★و تكلو الموضوع علي مقبول افندي.. ★مقبول طبعا زول حرفي.. ★النوعية الجنها رسميات و شكليات ديك.. ★شال ليك جواز ولدنا.. و شال معاهو جراب الموبايل.. ★جراب الموبايل ده سر.. ★أول مره نقولو ليكم.. ★عشان ما تكرهو الراجل ساكت.. ★عشان تعرفوهو اجتهد كيف.. ★الزول ده من الاول كان قاصد مصلحتكم.. ★كان حاسي بي مصيبة جايه.. ★بطنو اتقبضت يومو الشاف الوك.. ★حاجبو الشمال رف.. ★عشان كده شال الجراب.. ★براهو قدر و فكر.. ★و قال يا ود يا مقمق.. ألوك لو طار يكون معانا جراب.. ★جراب الحاوي.. ★و الغريبة الوك ما طار.. ★الوك اتمزع.. ★المزع ده يعني قطع اللحمة بدون سكين.. ★الشفاتة مزعو الولد من جرابو.. ★و مقبول اتخلع.. ★جاتو كومه سكري.. ★و خاف يقول للجماعة انو اللاعب راح و فاضل منو جراب.. ★جراب شايل ريحة الغالي.. ★جراب يذكرو بالظاهره.. ★و فكر و قدر و قرر.. ★اتوكل و اشتري كرت هاوي.. ★و بشر الهواه الهنا.. ★و ديل هللو.. ★و شيبونه طلقت الزغاريد.. ★شيبونة طبعا ما بتعرف عن قوانين الانتقالات و لا مادة.. ★و تاني الكضب دور.. ★و التخدير اشتغل.. ★و كل يوم و الحبل يخنق.. ★و الوك كرتو الدولي قرب يجي.. ★و المريخاب حيحققوا انتصارهم.. ★و الجماعه خلاص.. ★حالتهم وصلت الحضيض.. ★و اجتمعت هيئة (البصيرة أم حمد) و قررت.. ★نسجل شيبوب.. ★و كده نكفر عن الذنوب.. ★و الفلاشات دورت.. ★عشرات الصور.. ★بي كل الوضعيات.. ★مره مع القروش.. ★مرة معاهم وريقات فاضيات.. ★مرة يضحكو.. ★مره يصرو لي بعض.. ★و في صالة كده بقت ثابته في أي صورة.. ★ملاياتها ما بتغيرن من زمن بكري.. ★نفس الصالة الرتيبة.. ★معاها الوقفة الكئيبة.. ★و الجماعه اتعازمو علي السيلفي.. ★تصوير و خفة.. ★نشر وقتي.. ★الصور كانت اون لاين.. ★قرب الموبايل يكتب عليها مباشر.. ★شفقة غريبة.. ★الغريبة شيبونة ما اتصورت.. ★و تاني الجماعه مشو لي مقبول باشا.. ★و زولنا ما قصر.. اتبع السيستم الحرفي.. ★شال الجواز.. ★و الشنطة.. ★و الشاحن الخلوي.. ★المره دي نظر للموضوع نظرة اقتصادية بحته.. ★و قارن بين الجراب و الشاحن الخلوي.. ★لقي انو خسارة الهلال في شيبوب حتكون اقل من خسارة الوك بي اتنين دولار.. ★تفكير يستحق عليهو علاوة.. ★مفروض يرقوك والله.. ★الزول ده الخدمة القدمها للهلال ناس الجوهره ما قدموها.. ★الجوهره قالو هي الشليقة.. ★الصحيفة الخفيفة يعني.. ★لو العراب كحة ساكت هم بنشرو خبر التهاب الصدر.. ★لو رجعو هيثم هم بشتلو ليهم لقاء كامل.. ★مفروض يغيرو موقعهم و يفكروا يأجرو في الرياض المشتل.. ★الناس تشتل تصريح صغير.. ★تقرير.. ★انتو تشتلو لقاء كامل.. ★بالجد شليقين.. ★بالمناسبة.. احتمال مقاطعتكم كبير جدا.. ★تستاهلو.. ★و الكضب لسع مدور.. ★المريخاب طبعا للان ما ظهرو اللاعب.. ★موش قلت ليكم حنلعبو دساس.. ★حنخليهو كده في وضع الطيران بس.. ★و نخليكم شغالين هزاز.. ★و نقعد نحن في الصامت.. ★أصلو شيبوب ده ما بنجيبو.. ★و لا بنجيب صوره ليهو.. ★حنخلي اخر ظهور ليهو لما نطه من الفندق.. ★و نكتب علي حالتو.. ★في غفلة رقيبي.. نطيت بي صليبي.. ★و نعلق الحالة دي في الكباري كلها.. ★و نمسكها من الكوبري.. ★و البداية من بري.. ★بري طبعا محل الرشيد.. ★في صديق ظريف قال لي مالو مقالك بقي زي البرش.. ★قلت ليهو نحن في الفراش ده قاعدين في البروش.. ★الناس فارشين لازم نجاملهم.. ★و نكتب في بروش.. ★لا دائم إلا وجه الله.. ★لكن المريخاب ببالغو كمان.. ★سليتو روح الناس ديل.. ★ياخ جيبو ان شاء الله صورة.. ★وضع الصامت ده بجنن ليهو زول.. ★كده حرقتو اعصابهم.. ★فريقهم سافر تونس و ماف زول جايب خبرو.. ★اليوم كلو متابعين مواقع المريخاب.. ★امكن تجي صورة بالغلط.. ★شلاقة ساكت.. ★و الشفاتة شفرو البث.. ★خلو الشليقين بره الشبكة.. ★تاني الا يصرحو عن حالة الطقس.. ★و اشتغلو ليك المساكين ديل كل يوم بانو ولدنا جاي بكره.. ★و بكره يجي.. و الجماعه يقابضوا في الهوا.. ★و الصحف الزرقاء تكضب.. ★و كل واحدة تصدق كضبة التانية.. ★النصيحة تصدق في الشليقة.. ★حنينا عليكم اخيرا.. و الشكية لأب أيدا قوية. ★نبضات أخيرة★ ★جبره تسرب من قيادة الفرقة الحمراء جراء الإهمال و الصمت المطبق.. ★و حتي الآن الفريق بلا جهاز فني.. ★الحال الداخلي عندنا يغني عن السؤال.. ★بوادر فشل المعسكر التحضيري واضحه للعيان.. ★و تصريحات التخدير مللناها و أصبحت بلا طعم.. ★بالأمس انعقد اجتماع المكتب التنفيذي لمريخاب ساس و اساس.. ★و فيه سجلوا صوت شكر للمجلس علي تصديه لإدارة النادي وفقا للظروف الآنية و النجاح المنقطع النظير في التسجيلات.. ★كما تعاهدوا بحض كل عضويتهم للإشتراك في خدمة تحويل الرصيد و أقروا مبدأ التصويت ككتلة واحدة في الإنتخابات القادمة.. ★بالتوفيق لأسود المدرجات في تنظيم ساس و أساس.. و لكل التنظيمات الجماهيرية التي تخدم الكيان. ★نبضة أخيرة★ شيبوب وصل الخرطوم.. ساعدونا بالسكات و المويه الباردة.
