دق الدلجة محمد عبد الماجد شيبوب باقى ليه تلاتة شهور ونص وتشوفوه مع ابوعاقلة وولاء الدين لمن اقرأ لاعلام المريخ كتابات بتهكم فيها من الهلال بعد الخسارة من فريق قورماهيا الكيني – بقول انتوا الناس ديل جاديين؟. بقرب اصدق. دا اعلام برشلونة الاسباني؟. اعلام لستر سيتي؟. الارسنال؟. ديل منو البتهكموا على الهلال؟. معقولة بعد (فسلتكم) دي يا مريخاب – ومبارياتكم الاعدادية التى كانت مع اندية من القسم التاني في قطر – معقولة بتسخروا من الهلال وانتوا في هذه الوضعية. فريق المريخ اتعادل مع فريق الشمال القطري. فريق الشمال القطري بيعادل عندنا فريق بنك الشمال. ما اكتر من كدا. خليكم في حالكم احسن – نحن مع (جوهرتنا الزرقاء) دي ما فاضيين ليكم ولا عندنا ليكم وقت. لو فتحنا (سيرتكم) ح تتعبوا معانا. احسن تخليكم مع الاندية الفى سنكم. ركزوا مع الخرطوم الوطني – الاهلي شندي – هلال الابيض – الاندية دي السنة دي ح تكون منافس حقيقي لكم. المريخ السنة دي لقب (الوصيف) ما بيلم فيه. نحن بعد الجوهرة الزرقاء وولاءالدين ما في حاجة بتلمنا معاكم. ألعبوا مع الاندية القدركم. الفي سنكم. بعدين مفروض بعد ان اصدر الوزير قرار بالتمديد لمجلس المريخ (5) شهور مفروض تشوفوا ليكم بلد. مفروض تفرشوا عديل كدا. على الاقل كدا شوفوا ليكم (صندوق). اعملوا ليكم صندوق – وشيلوا (الصرفة) الاولى. شوفوا ليكم (قرض) بنكي. لو جبنا الورقة والقلم وحسبناها ح نطلع بالكثير. المريخ في هذا الموسم وفى قيادة هذا المجلس لم يستطع ان ينجز اي ملف. تحويل الرصيد فشل. ادخال ادم سوداكال في مجلس المريخ فشلوا فيه. الفادني ما بمشي ليه فريق. مجلس المريخ كل الملفات التى اشرف عليها فشل فيها – بما في ذلك مباراة (الامارات) التى عاد فيها بعثة المريخ من مطار الدوحة. بالمناسبة المريخ في معسكره هذا – عاد من مطار الدوحة مرتين. يصلوا المطار ويرجعوا تاني. بل بركبوا الطيارة عديل كدا – وينزلوهم. مرة عادت البعثة من مطار الدوحة ونزل بعض اعضاء البعثة من الطيارة بعد ان لم تحصل البعثة على التأشيرات الكاملة لزيارة الامارات. امس قالوا ليك بعثة المريخ بعد ما ركبوا الطيارة في طريقهم الى الخرطوم – عادوا مرة اخرى للدوحة. قالوا الاجواء في الخرطوم لن تسمح بهبوط طايرة المريخ. شفتوا عدم القروش بعمل شنو؟. الزول بعد ما يركب الطيارة برجعوه تاني. البهدلة دي كلها حصلت في عهد وفترة مجلس المريخ الحالي. للامانة في فترة جمال الوالي – ما كان في كلام بالشكل دا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اذا تتبعنا سيرة هذا المجلس في الفترة الاخيرة سوف نجد عدد من الاخفاقات والملفات التى فشل فيها مجلس اسامة ونسى. خلونا نمسك ملف – ملف. نمشي معاهم خطوة – خطوة. مجلس المريخ في بداية عهده كان قد اعلن انه توصل لاتفاق مع المدير الفني السابق للمريخ الفرنسي غارزيتو. طلع صور وأكدوا التعاقد مع غارزيتو – لنكتشف بعد فترة غير ذلك – ليطير غارزيتو ويتم التعاقد مع مدرب مبتدئي. بعد ملف غارزيتو الذي فشل فيه مجلس المريخ – جاء مجلس المريخ وحقق فشل اخر في ملف الوك. الوك لاعب الملكية جوبا – احضره مجلس المريخ من جنوب السودان من غير جواز سفر. زي شيبوب. واتصوروا معاه. ومشوا بيه (صاج السمك). مجلس المريخ اعلن تسجيل الوك في كشوفات المريخ واكد سلامة الخطوات واعتبروا الوك لاعبا في المريخ. وتم منح اللاعب (قطعة ارض). بعد ذلك – جاء اتحاد كورة القدم السوداني وابطل تسجيل اللاعب في المريخ وتم تحويل ملف اللاعب الى الفيفا. الوك – هسع قاعد يتمرن ويضرب في (السمك) – دون ان يستفيد منه المريخ. هذا فشل كبير لمجلس المريخ. وجماعتكم بتكلموا عن خسارة الهلال امام قورماهيا. في عدم موضوع – وقلة شغلة اكتر من البعمل فيه اعلام المريخ دي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الوك خلوه. الاكيد انكم كلكم تابعتوا موضوع شيبوب. شيبوب المريخ خطفه من جنوب السودان. حكاية التسلق. والقفز من الطابق الرابع. الكلام دا كلو (شتل). ما في حاجة من الكلام دا حصل. شيبوب زي (الوك) رجع من جنوب السودان من غير جواز. وتم تصوير شيبوب في وجود عبدالتام وابوجريشة ..واعتبر اعلام المريخ ان مجلس المريخ وجه ضربة قاضية للهلال. واعلنوا عن مهرجان لعودة شيبوب. بعد هذه الخطوات والعنتريات – عاد شيبوب الى الهلال ليلبس شيبوب (الكسكتة) ويظهر مع الكاردينال. ليكون شيبوب اوضح علامات فشل مجلس المريخ – الذي تركه هاويا في كشف المريخ. ثم جاء وفرط في اللاعب بعد ان اعاده من جنوب السودان من غير جواز سفر. انتوا وقت بتفرطوا في اللاعب بالسهولة دي – جايبنو من غير جواز سفر من جنوب السودان ليه؟. الهلال عندو لاعبين اتنين الآن بتمرنوا مع اندية تانية. عندنا شيبوب بتمرن مع شبيبة القيروان (كتر خيرهم). وعندنا الوك بتمرن مع المريخ …(الله لا يحرمنا منهم). شيبوب والوك ان شاءالله نستردهم الاتنين في مايو القادم. بالمناسبة التسجيلات يوم 11 مايو. يعني بعد تلاتة شهور ونص. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). في خلال 40 يوم يمكن نحسب فشل مجلس المريخ في عدد من الملفات الجوهرية. ولكي نرتب (الفشل) فاننا يمكن ان نقدم فشل المجلس في عدد من النقاط – عشان الموضوع يبقى ليكم واضح. وعشان ما تنسوا. أ – فشل في التعاقد مع غارزيتو. ب – فشل في التعاقد مع الوك. د – فشل في اعادة شيبوب بعد ان ارجعوه من الملكية جوبا. ج – فشل المهرجان. ح – فشل في السفر الى الامارات. ه – بل ان الفشل امتد حتى في العودة الى الخرطوم. ويمكن ان (نمدد) للفشل مع التمديد للمجلس ونقول ان مجلس المريخ لن يستطيع ان يعيد اصدار صحيفة المريخ. ويمكن ان ندخل في تحدي ونقول ان صحيفة المريخ لن تصدر في عهد هذا المجلس. مجلس المريخ اتخذ قرار بتعين الكابتن محمد موسي كمدير كورة في المريخ مع ذلك مجلس المريخ فشل في تنفيذ القرار الذي اتخذه. اي قرار اتخذه مجلس المريخ فشل فيه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……………. و اتخيلوا شيبوب مع ابوعاقلة. والله دا (وسط) – برشلونة ما يحلم بيه. وولاءالدين قدام. والثعلب. انتوا الاولاد الصغار ديل بتيجبوهم من وين؟. امام قورماهيا الهلال افتقد شيبوب. هي عرفت من متين؟. الهلال امام هلال كادوقلي – يحتاج الى الاستقرار. الاعلام رفع الهلال السماء. وجاء الاعلام ونزل الهلال بسبب خسارة امام قورماهيا. المهم ينتصر الهلال بكرة. والاهم من ذلك ينتصر الهلال في الابيض. التركيز مهم. وتوفير الاجواء المثالية لهذه المباريات – فرض عين على كل هلالابي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. السيدة (ل) – تفتركوا كافالي دا سبب الازمة الحاصلة في الغاز. وقرّط على كدا.
