بالعربي الكسيح محمد الطيب الأمين يفترض اي زول يمد (ناموسيتو) قدر (باعوضو) !! * في العادة (مفتاح الكيلون) ما بفتح (الطبلة) .. * ما حصل شفنا (طبلة فتحوها بمفتاح كيلون) .. * ولا شفنا (مفتاح طبلة فتح كيلون) .. * وبما ان ذلك كذلك فان (عُمر المريخ في الأبطال قصير جدا) .. * المريخ يملك (مفتاح طبلة سيكافا) .. * وقطع شك (مفتاح طبلة سيكافا) ما بفتح (كيلون الأبطال ) .. * عشان كده يفترض الزول (يمد ناموسيتو قدر باعُوضو) .. * حاجة تكسف .. * الأهلي (الليبي) نزل في (برج الفاتح الليبي) .. * يعني (الزيت في البيت) .. * وما مهم الأهلي نزل وين ولكن المهم الأهلي بكرة ينزل من الأبطال عشان الهلال يطلع درجة علي حساب نزلو الاهلي النازل اصلا في برج الفاتح .. * ويا فتاح يا عليم تنصر هلال الملايين .. * حتي وقت قريب كنت أظن ان (زعل) المدرب مازدا هو مثل زعل (أبو العريس) .. * أبو العريس لما يزعل (بيطرشق العرس) .. * ولكن مع الأيام إكتشفت ان زعل مازدا لا يختلف كثيرا عن زعل (أم العروس) .. * والله صحي .. * طبعا (أم العروس) لما تزعل ممكن يرضوها ويسكتوها ب(توب مُشجر) .. * تجيب ليها توب بترفع الزعل زي مازدا ده واااحد .. * لكن علي شرط التوب يكون (مُشجر) .. * عرفنا أم العروس برضوها ب(التوب المُشجر) مازدا ده يا ربي بيرضوهو بشنو ؟؟ * والله إلا يكون بيجيبوا ليهو ركشة ب(3 لساتك) .. * غايتو جنس غايتو !! * إضاءة إستاد الهلال بقيت لينا زي (شارع النيل) .. * الناس من أمس وأول أمس بيمشوا إستاد الهلال بالليل عشان يشوفوا الإضاءة ويشربوا قهوة تحت الكشافات .. * وما شاء الله تبارك الله .. الإضاءة الجديدة (لونها فاااااااتح) وظريفة ونضيفة .. * مش زي إضاءة إستاد المريخ (المُغبشة ووسخانة دي) .. * إضاءة إستاد المريخ أ تقول كانت (مخزنة في بيت عزابة) .. * غباشة شديدة .. * أول مرة في حياتي أشوف لي إضاءة مُغبشة .. * حتي كهربتكم زي مستواكم الأغبش ده .. * إضاءة استاد المريخ بقينا نشوفها زي إضاءة (طبلية الباسطة) .. * والله صحي .. * في اي سوق في الحلة بتلقي طبلية بتاعت باسطة بيكون فيها (لمبة أو لمبتين) لونها مايل علي الأحمر والاصفر .. * تعاين للطبلية كده الباسطة تشوفها لقيمات لقيمات من شدة ما الإضاءة وسخانة .. * ولو داير تعرف الفرق بين كشافاتنا وكشافات المريخ تعال الليلة بالليل شوف استاد الهلال مولع واستاد المريخ مولع .. * بتحس إنو العرضة جنوب فيها (رتينة) .. * بتحس إنو الناس ديلك شغالين ب(شمع) .. * شمع ب(الفا) .. * أخطر ما في مباراة الهلال غدا ان الفوز نفسه يمكن ان لا يؤهل الهلال .. * ودي حاجة خطيرة جدا وتحتاج لتركيز وجهد كبير .. * إذا سجل الهلال هدفين فهذا ايضا لا يكفي لان الفريق الليبي يمكن ان يخطف هدفا تحت اي لحظة .. * يبقي مهم جدا الهلال يلعب من اجل تسجيل هدف كل نصف ساعة .. * والمباراة فيها (3 انصاص ساعة) .. * يعني ساعة ونص .. * يعني بالبلدي كده (3) أهداف تكفي .. * ثلاث أهداف مع المحافظة علي شبكتنا علي ان يكون كل ذلك مصحوبا بعرض قوي وجاد .. * تواضع الهلال في تونس هو الذي رفع سقف طموحاتنا في مباراة الغد .. * وعلي نجوم الفريق ان يدركوا خطورة اللقاء وأهمية تحقيق الفوز والتأهل لانه سينقذ موسم الهلال من الضياع .. * كل الجهود الإدارية المبذولة ستذهب مع الريح إذا لم يتمكن نجوم الهلال من ابعاد الفريق الليبي .. * حتي الإضاءة دي ما بيكون عندها طعم لو لم يقدم الهلال المطلوب منه .. * الإضاءة هي (حافز) قبل المباراة .. * حافز كبير كمان .. * بمناسبة الحافز .. * إحنا وأولاد حلتنا بنشكر الكاردينال علي هذه الإضاءة عشان تاني لو واحد وقع منو (جنيه) يلقاهو بالليل داك بدل يجي الصباح يفتش .. * كده يا الكاردينال ريحتنا والله .. * قبل الإضاءة دي كنا لو وقع مننا جنيه أثناء المباراة بنجي نفتشو الصباح .. * بنركب ركشة ب(عشرة جنيه) عشان نجي نفتش (الجنيه) .. * إحنا صعبين جدا .. * الجنيه عندنا أهم من العشرة جنيه .. * زي حكاية عمنا الفي النكتة .. * قالوا عمك ده عمل (الغرفة) سراميك عشان لما (الفكة) تقع منو يسمع صوتها .. * والله صحي .. * إتخيل زول يعمل سراميك عشان (الفكة) .. * هسه الإضاءة دي بالنسبة لينا زي السراميك .. * المهم .. * نجوم الهلال عليهم ان يرموا كل (الحمل) علي الجمهور .. * صحيح جمهور الهلال قادر علي هز الأرض ولكن نجوم الهلال يجب ان يسحبوا البساط داخل الميدان .. * الجمهور لن يقصر كعادته واي تقصير من اللاعبين يعني ان موسم الهلال قد انتهى قبل ان يبدأ .. * المريخ ممكن عادي يطير من الدور الأول لانو المريخ (شبع طيران من التمهيدي) .. * العادي عند المريخ الطيران من التمهيدي والما عادي ان يتجاوز (الإصيفر) التمهيدي .. * لكن الهلال غير .. * الهلال مختلف تماما .. * الحياة في الهلال بتقيف لو طرنا من الدور الأول .. * بتقيف عديييل .. * ولذلك نحن نرفض ان نكون مريخ .. * وعمرو الهلال ما كان زي المريخ ولا المريخ زي الهلال .. * إحنا سنويا في المقدمة والمريخ لو ما طار بتقدم (صحبة راكب) .. * والله صحي .. * السنة الفاتت المريخ دخل المربع الذهبي لاول مرة في تاريخه مستفيدا من (مصائب قوما عند قوم فوائد) .. * الفرق الجزائرية فيما بينها (حساسية شديدة) ولذلك إتحاد العاصمة الجزائري أختار المريخ (صحبة راكب) ودخلو معاهو المربع .. * واللقاها المريخ السنة الفاتت علي بالنعمة السنة دي ما بلقاها .. * السنة دي اي زول بيشرب من يدو .. * ما في فريق بيشرب من يد الفريق التاني يا أبوجريشة .. * لا في إتحاد جزائري ولا في (علمة) .. * تأكل نارك بس .. * بمناسبة نارك دي .. * أخونا شيبوب لازم يورينا رأيو في الإضاءة الجديدة دي .. * وجهة نظر شيبوب مهمة في الموضوع كده .. * عشان بعدين لو شيبوب شات كورة نعرفها (عبرت ولا ما عبرت) .. * عشان ما نقعد نتغالط .. * والكويس في الإضاءة دي انها بتحدد ليك الكرة عبرت ولا ما عبرت .. * وممكن تحدد ليك برضو علاء الدين بصم ولا ما بصم .. * غايتو جنس غايتو !! * و..و.. * وصعيب وصفك لانك هالة كلك ضئ فوقك هيبة وأجمل قامة و….(وعيون زي حوش بيتنا) ..