في ال18 عمر الطيب الامين كنا معاك في (الردمية) وحاليا ما بنمشي معاك في (المسفلت) ….!!!! # قدر ما حاولنا نرفع الكاردينال درجة درجتين في نظرنا تجده يصر على السقوط تلاتة درجات .. # يسقط ليؤكد انه بالفعل لا يستحق الجلوس على كرسي الرئاسة بالهلال … # انا وغيري كثيرون جلسوا امام التلفاز بالامس في انتظار من هو صاحب القرار بالهلال بعد الخروج المر للفريق من الدور الاول وهو الامر الذي لم يعتاد عليه الازرق الا في عهد الكاردينال … # توقعنا ان يضع الكاردينال النقاط على الحروف ولكنه يبدو لا يفرز الحروف من النقاط … # جلسنا وياريت لو ما جلسنا … # ياخسارة الشاي باللبن واللقيمات … # ضياع زمن ساكت . # جر هواء … # لفينا الطبق من الساعة ستة عشان نزبط النيل الازرق …في انتظار الكاردينال وياريت لو لم يظهر الكاردينال .. # ظهر الكاردينال عبر البحث عن هدف بذات ظهور الهلال الباهت امام الفريق الليبي … # الكاردينال الذي هلل لمعسكر الفريق في الفترة الماضية عاد واكد في حلقة " عدم البحث عن هدف" بالنسبة له فشل معسكر الفريق . # اكد فشل المعسكر رغم انه اشاد به في فترة لم تتجاوز ال "30" يوما . # في اقل من شهر وبدل الامتياز منح الكاردينال المعسكر رسوب … # المدهش في حديث الكاردينال .. قال اقالة كافالي تأخرت كثيرا مؤكدا انهم قررو الاستغناء عن الفرنسي منذ خسارة الفريق الاعدادية امام قورماهيا … # اتخيل … # هذا هو رئيس الهلال ..! #كافالي الذي خسر وديا تمت اقالته والعشري الذي اطاح بالفريق من البطولة الافريقية الان يواصل الاستمرارية . # كافالي اللعب مباراة ودية استعدادا للبطولة الافريقية أقالوا … والعشري الطير الهلال خلوا …. # مافي تخبط اكتر من كدا # نفس نظرية الزول البتقول ليهو أضانك وينها .يقول ليك " ديك" # حاليا القصة دي بتنطبق على الكاردينال … # بعاين في العشري وبطعن في كافالي … # بعاين في هيثم وبطعن في اللاعبين … # بعاين في الانقسامات التي تسبب فيها بالفريق وبطعن في الكشافات . # بعدين يا سيدي الرئيس هي الجوهرة وينها عشان تقول لينا أكاديمية الهلال .. # الهلال زاتو وينو . # فكونا ياخي … # شوف يا الكاردينال لو فريق الكرة دا ما رجع زي ما بنعرفوا لو الكشافات دي ولعت براها ما بنرحمك … # الهلال موجود انت موجود يا مولانا .. الهلال مافي لا تقول لينا الجوهرة ولا الصدى … # جوهرة شنو … وعدد المدربين في الهلال اكتر من المهاجمين . # جوهرة شنو والناس في البيت الواحد نفوسها ما نضيفة . . # نحنا مشينا معاك في الردمية " الجوهرة" وحاليا الا تجيب ليك ناس اعارة عشان تمشي معاك في " المسفلت" …زي ما بتقول يا سيدي الرئيس … # بطريقتك دي دا طرفنا منك … # والله انا ما حزين لمغادرة الهلال بقدر حزني الكبير على " الموت السريري " القادم على الهلال … # حاليا الهلال "ميت سريريا" واعتقد شهر ستة عندما ينزل هيثم الملعب سيكون التشيع رسميا … # البكاء شهر اربعة والدفن شهر ستة … # يجب ان يعلم الكاردينال اننا ليس لدينا مشكلة شخصيه معه وكل همنا الهلال الكيان … # يجمعنا الهلال سيدي الرئيس فقط. لذلك وبذات القدر الذي اشدنا به بفكره الجوهرة سننتقد تدهور فريق الكرة الذي يمثل الهم الاول والاخير للجمهور … # اذا عاد الهلال لمستواه وتوقفت المنشأت بالهلال لقلنا مبرووووك لان البطولات لا تأتي بالسيخ والاسمنت .. # جوهرة بدون كورة لشنو يعني … # فريق.. كورة ما عندو الجوهرة لزومها شنو … # فكونا ياخي … # هي وينها الجوهرة زاتها.. # ياها المساطب بتاعت الاسمنت دي ولا حاجة تانية .. # جوهرة شنو .. والهلال .. جوه .. كل زول شأيل همو في "كيس براهو" .. زي "سندوتشات شفع الروضة" # كلو زول بيأكل في صحن براهو … # شوف يا الكاردينال لو ما الناس دي أكلت في صحن واحد كأس "برنجي " الهلال ما بشيلوا .. اسمعها مني … # قبل الطبع : اطرد الاحلام يا جميل واصحى ………!!!!