دق الدلجة محمد عبد الماجد رسميا (الاممالمتحدة) تعلن (التبلدي) مشروب (مُسكر) قبل ما ندخل لي جوه شوية. الوالي أحمد هارون بعد كدا لو سمع كلامنا (نفير نهضة شمال كردفان) لا يجيب ليه للترويج عنه (محمد مهدي الفادني). ولا يجيب ليه محمد عبدالله. ولا سامية عبدالله. ولا يجيب ليه جمال حسن سعيد. اصلو ما يتعب. أحمد هارون ما عاوز ليه نفير..ولا نهضة اكتر من البعمل فيه (هلال الابيض) دا. منتهى النفير. امس ناس الابيض كلهم في الاستاد ..يضحكوا متل (وقفة العيد). ضحكاتهم حايمة زي (شفع) العيد. ولا عجب في ذلك اذا كانت (رمال) الابيض بترقص قي اغنيات صديق عباس متل العروس. اتر (الشوق) في الرملة…دروبنا مرسومة بتضحك. العلاقة بين القمر والرملة علاقة (سمر). نفير نهضة شمال كردفان بعد هدف مهند الطاهر في المريخ ما عاوز ليه اي (ترويج). ما عاوز اي (اعلان). شغلوا هدف الغزال ..القروش بتقع عليكم (هبطرش). بتقع ليكم براها. في واحد من ناس شمال كردفان قال لي انا امس بعد هدف مهند الطاهر ..(جيبي) ما فيه غير (100) جنيه. بعد هدف مهند الطاهر المية جنيه براها طلعت ومشت للولاية. من نفسها كدا. لا رسوم. ولا جباية. ولا نفير. تبرع ساكت كدا. انا امس لغاية الساعة ستة مساء ..كنت مفتكر (التبلدي) مشروب (بلدي). مشروب عادي كدا. ما فيه اي مشكلة. ما قايل طلعو فيه (قانون). الساعة سبعة جاتني رسالة – قالوا لي الاممالمتحدة تضم مشروب (التبلدي) الى المشروبات (المُسكرة). يا ناس الزمن دا. التبلدي ممنوع رسمي. مالهم الناس ديل معانا ؟– رمضان قرب ..ونحن ما بنفطر من غير (التبلدي). بنحس في (التبلدي) بي سودانيتنا ..بنشوف فيه ذاتنا – وطعمنا. مشروب مننا وفينا. زي الجلابية والعمة..ومهند الطاهر. قلت والله ناس الاممالمتحدة ديل عاوزين ليهم سبب معانا ساكت. التبلدي الدخلو مع (المُسكرات) شنو؟..لو الناس ديل ما شايلنها معانا. التبلدي مالو؟. فيه شنو؟. لكن ببني وبينكم بعد ما سمعت بي هدف مهند الطاهر – قلت (التبلدي) ما بعيدة عليه. ممكن يدخل في الحتة دي. خاصة لمن يكون (منعنش) وقاعد ليه يوم في التلاجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). قالوا ليك امس في واحد قبضوه (يترنح) في الشارع من الفرح وبغني في اغنية عثمان حسين (انا ما لي والهوى). ويا غزال الحي يا غزال يا غزال. ولي في الابيض غزال. طبعا اغنية (انا ما لي والهوي) ما بتدخل في الحتة دي…عاملها ليكم تمويه. لكن الزول دا دخلها في الحتة الصعبة دي. عملها. زولكم يقوم ويقع. ويتنفط. ويتلفت. ويضحك براهو. ويترتح – من غير مناسبة. ويغني في (من عيونك يا غزالي). ناس النظام قبضوه ..قايلنو (سكران). طبيعي يثبتوه. الطوطاح البعمل فيه دا ما طوطاح زول واعي. كمان نحن ما بنعرف الزول الواعي من الزول الما واعي. فتشوه لقوه شايل ليه (قزازة تبلدي). الجماعة اتهجموا – ما عرفوا يقولوا ليه شنو؟. اتحيروا في الدنيا دي جنس حيرة. اخر حاجة في واحد منهم قال ليهم (التبلدي) بيسكر؟؟؟. التبلدي فيه حاجة؟؟. بعملها. زولكم قال ليهم (التبلدي) ما بيسكر والله ..البيسكر (هدف مهند الطاهر). دخلوه (القفص). قالوا ليه هدف مهند الطاهر علينا نحن – (التبلدي) الشايلو دا اصلو ما طبيعي. بكون فيه حاجة. في زول بيحبسوه في (تبلدي). في واحد جوه الحبس قال ليه يا زول انت مالك؟ – ما فيك اي (ريحة) ….الشيء الما فيه ريحة دي كشفوه كيف ؟..شارب شنو انت؟. صاحبكم قال ليه شارب (تبلدي). الجماعة عاوزين يدقوه ..قالوا ليه (تبلدي) بعمل كدا – بخلييك (تترتح) فينا زي الترباس الما بقفل. الناس الجوه قالوا ليه الحاصل برة شنو؟…كمان يا رجال الزمن دي (التبلدي) بقى يسكركم…والله حليل رجال زمان؟. بقيتو اي كلام. التبلدي بقى يجيب رأسكم. حليل كرري..وام دبيكرات. (تبلدي) يعمل فيكم كدا؟. في واحد من الجماعة الجوه قال ليهم والله انا (التبلدي) دي لو غرقت فيه لي هنا – ما بعمل لي حاجة. كمان التبلدي بقى مشروب (مسكر). انتوا الحاصل عليكم شنو؟. في واحد الظاهر عليه كان متابع المباراة – قال ليهم والله (مهند الطاهر) دا (الحلومر) منو خوفه معاهو. الزول دا خطير. ما في زول قال حاجة. كلهم سكتوا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). انتوا كلامي الفي العمود دا بتشوفه غريب. وبتشوفه ما منطقي. وبتقولوا الزول دا بتكلم ساكت. وانا ما قاعد اتكلم ليكم ساكت. ممكن اثبت ليكم ان (التبلدي) مشروب (مسكر). مافي في ذلك شك. ح اثبت ليكم. بس انتوا روقوا لي. واقعدوا لي في الواطة دي. ما تبقوا لي زي (التلاتات) القاعدة في جدول الضرب ساكت. رغم انو ما في اي علاقة بين التلاتات والكلام البقول ليكم فيه دا. خلوني اشوف ادخل ليكم من وين؟. ح اثبت ليكم ان (التبلدي) مُسكر. وستين مُسكر كمان. التبلدي بقى منو خوفة. اللجنة المنظمة في الاتحاد العام امس اجتمعت. الكلام دا فيه (تبلدي). اصبروا (التبلدي) جايكم ورا. اللجنة المنظمة اجتمعت وبرمجة مباريات الممتاز المؤجلة على ذلك النحو : 10/6/2016 الهلال كادوقلي x المريخ الخرطوم كادوقلي 15/6/2016 الأهلي شندي x المريخ الخرطوم شندي 15/6/2016 الهلال الخرطوم x الخرطوم الوطني الهلال 20/6/2016 الهلال الخرطوم x المريخ الخرطوم الهلال هسع دا ما تبلدي. ما عاوزين نقول ان اللجنة المنظمة برمجة مباراة القمة في اليوم الثالث من شهر رمضان الكريم باعتبار ان رمضان هذا العام ان شاءالله سوف يكون يوم 6 يونيو. هم الجماعة ديل في (الفطر)..قاعدين يتجرسو. عاوزين تلعبوهم قدام ناس كاريكا وبشه وثلعبونا والغربال صائمين. في الشهر الفيه (التبلدي) ذاتو. دا عذر جاهز لتأجيل القمة …(نحن صايمين). تقول بصوموا براهم. لكن خلونا نقول ما في مشكلة – القمة تكون في رمضان. الاخطر من هذا ان اللجنة المنظمة برمجة مباراة المريخ امام هلال كادوقلي في رمضان. وكادوقلي ما فيها (كشافات). يعني تاني ح يأجلوا مباراة المريخ امام كادوقلي. الظاهر كدا مباراة المريخ امام هلال كادوقلي سوف تلعب في الموسم القادم. العمل البتعمل فيه اللجنة المنظمة دي – ما عندو اصلو تفسير غير انهم كتروا في (التبلدي). المشكلة ان اللجنة المنظمة التى قالت ان المريخ سوف يلعب يوم 10 يونيو امام هلال كادوقلي هي نفسها التى وضعت المريخ في نفس اليوم ليلعب امام ود نوباوي في كاس السودان. يعني المريخ يوم 10 يونيو 2016 سوف يلعب امام هلال كادوقلي في الممتاز. ويوم 10 يونيو 2016 سوف يلعب مع ودنوباوي في كاس السودان. معقولة (التبلدي) بعمل كدا. والله اخير الزول الكان بترتح من البتعمل فيه اللجنة المنظمة دي. اخير يترنحوا عديل كدا. المباراة والمباراة لمن يكون بينها اسبوع ناس المريخ بشكوا من الارهاق وضغط المباريات – هسع عاوزنهم يلعبوا ليكم في يوم واحد مباراتين في الدوري والكاس. والله فالحين. الظاهر عاوزين ليهم من هسع سبب يأجلوا بيه مباراة كادوقلي. اصلو مباراة كادوقلي خايفين منها شديد. الموسم الماضي غشوهم بالشكوى. ناس كادوقلي ما بخلوا نقاطهم. ما بخلوا حقهم. وناس المريخ خايفين من الموضوع دا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الامر الاخر الذي يثبت ان (التبلدي) مسكر ..هو ان اللجنة المنظمة لم تذكر مباراة المريخ امام الاهلي عطبرة. ما جابوا ليها سيرة. ما معروف سوف تلعب متين؟. الظاهر تقلوا في (التبلدي). تقولوا لي التبلدي ما (مُسكر). انتوا بتتكلموا ساكت. ……….. و مهند الطاهر عندو نية يمشي كادوقلي في الدورة الثانية. عاوز يلعب في هلال كادوقلي. مالكم؟. فيها حاجة. التسجيلات في مايو. ومباراة هلال كادوقلي والمريخ في يونيو. انتوا قايلين يونيو بعيد. كمان كادوقلي فيها جنس تبلدي. ومن عيونك يا غزالي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. السيدة (ل) – وقفنا القهوة والشاي والتبلدي – رمضان قرب. وقرّط على كدا.
