دق الدلجة محمد عبد الماجد طالبوا بالنقاط دفعوهم حق القارورات اطرف ما في شكوى المريخ ليس قرارات اللجنة المنظمة حول شكوى المريخ الأولى والتي كانت ضد نادي الأمل في مشاركة لاعبه (عمر عثمان) في مباراة الفريقين قبل نحو ثلاثة أسابيع بالدوري الممتاز حيث قالت اللجنة أن اللاعب لم تكن هناك عقوبة إيقاف قد نفذت عليه حينما كان لاعبا بالإتحاد المحلي بمدينة القضارف شرق السودان وبالتالي جاءت مشاركته صحيحة ليعتبر المريخ خاسرا 0-2 من الأمل. الكلام دا بالهندي؟. بالروسي؟. بالشنقيطي؟. الكلام دا واضح وصريح. قالوا ليك المريخاب ديل ما خلوا حاجة في الشكاوي ..بعد (عمر عثمان) ما فاضل ليهم إلّا يشتكوا في (عمر الجزلي). بعملوها. والطرفة ولا في قرار اللجنة المنظمة في الشكوى التانية. ابدا ما في في شكوى المريخ الثانية ضد فريق هلال كادقلي حول إشراك لاعبه (طوق كونغ) وحمله لجنسية جنوب السودان دون تصحيح وضعه كلاعب أجنبي له بطاقة إنتقال دولية، رفضت اللجنة المنظمة بالإتحاد السوداني الشكوى، وأكدت على أن اللاعب سوداني الجنسية، وذلك بعد إستعراضها لكل المستندات المتعلقة بوضعية اللاعب في سجلات إتحاد الكرة السودانية، وأكدت أن اللاعب سوداني الجنسية وفقا لمنشور التعاقدات وقرارات الجمعية العمومية لإتحاد الكرة السوداني وقرارات مجلس إدارته فيما يتعلق يتعلق بلاعبي دولة جنوب السودان التي كانت دولة واحدة مع السودان. حسب ما جاء من رصد للشكاوي في موقع كووورة عربية. الكلام دا باكستاني؟. اندونيسي؟. كلام هضربة ساكت كدا. الكلام دا واضح ولا عاوز ليه (جمال الوالي). ولا (مزمل ابوالقاسم). الطرفة ما في الحاجات دي …(اصلو ما عاوزين نقول لينا حاجة او نقطع لينا حاجة من رأسنا). عارفين (الطرفة) وين؟. والحاجة البتغيظ وتخلي ليك المريخاب يشوفوا مجدي شمس الدين (120 – 120) غير البدلات (اسامة عطا المنان). الطرفة في قرار اللجنة المنظمة والذي كان على ذلك النحو : (غرمت اللجنة المنظمة نادي المريخ مبلغ خمسة ألاف جنيه لثبوت قذف جماهيره ملعب مباراة الفريق ضد هلال الأبيض الأسبوع الماضي بالدوري الممتاز، بقارورات المياه). كمان!!. شوفوا الحقارة. عليكم الله – من الله خلقكم قابلتكم (حقارة) زي دي. صادفتكم في شارع التحدي؟. غايتو دي نحن لو حصلت لينا في الهلال طوالي بنقلب ونشجع (اهلي شندي). ولا بنكضب. القاعدين ليها شنو؟. خسارة (طابق تاني) ساكت. المريخ بعد القروش المتلتلة دي كلها والتى دفعها في رسوم الشكاوي ..ح يغرموها خمسة ألاف جنيه عشان رموا قارورات المياه في مباراة المريخ وهلال الابيض. ناس هلال الابيض الدخلهم هنا شنو؟. هم المريخاب ديل ناقصين ..عشان يدفعوا ليكم بعد دا خمسة مليون جنيه. جماعتكم عشمانين في نقاط الامل. عشمانين في نقاط هلال كادوقلي. قالوا لو جلت دي ..بنلقى دي – تقوموا يا مجدي تغرموهم خمسة مليون جنيه. انتوا لجنتكم دي ما فيها (سيحة)؟. ما عندكم (سيحة) في اللجنة المنظمة؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). عارفين حكاية تغريم المريخ خمسة مليون جنيه بسبب قذف جماهيره للملعب بقارورات المياه في مباراة المريخ وهلال الابيض وهم مقدمين شكوتين في الامل عطبرة وهلال كادوقلي زي شنو؟. زي الزول البكون عازمكم سمك ..يقوم يدفعك حق السمك. معزوم وتدفع. هسع ناس المريخ بعد الشكاوي دي ح يدفعوا تاني. ناس الاتحاد ديل ما بيشبعوا من (رسوم الشكاوي) دي. الاتحاد مفروض يكون غنى من رسوم الشكاوي – المريخ في كل اسبوع بتقدم ليه بي شكوى. وبمشوا تاني يستأنفوا. يعني بدفعوا رسوم الاسئتنافات. وقبل كدا دفعوا رسوم الشكاوي. وح يدفعوا غصبا عليهم رسوم القارورات. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). في واحد من ناس الحلة – النوع البيقيف قدام الباب داك ..قال لي انت خمسة مليون جنيه ما كتيرة على (قارورات المياه)؟. قلت ليه ما كتيرة. قال لي انت عارف القارورات دي ما بتكون قارورات مياه وخلاص. القارورات دي بتكون فيها حاجة تانية. انا فهمتو غلط للامانة كدا..قلت ليه لا لا كمان ما بتحصل الدرجة دي..ما بكون فيها شيء كعب. بتكون موية عادية. زولكم قال لي كعب شنو؟..انا هسع جبت لي سيرة للشيء الكعب. قلت ليه طيب ح يكون فيها شنو؟..عشان يدفعوهم قصادها خمسة مليون جنيه؟. قال لي يكون فيها (تبلدي). اصلو الايامات دي (التبلدي) محظور. ممنوع عديل كدا. نحن عندنا (خالة) خطيرة شديد في (الشربوت). وعيد الضحية قرب يا سلك. قرب عديل كدا. وخالتنا بدأت تجيب في البلح والبهارات عشان تعمل (الشربوت). ونحن بقينا نخش ونطلع في البيت..اي زول نشوفو نقول ليه اشتريتو الخروف. والشربوت كيف؟. عارف يا سلك نحن قلنا للخالة شنو؟. قلنا ليها السنة دي يا حاجة ما عاوزين في العيد (شربوت). الخالة قالت لينا عاوزين شنو كمان؟. قلنا ليها عاوزين (تبلدي). تبلدي بارد كدا. الخالة قالت لينا مالكم عاوزين تحرجونا مع (المريخاب)..يا اولادي احسن ليكم (الشربوت). قلنا ليها البيشرب ليه (شربوت) تاني منو مع (عنكبة) دا؟. تبلدي بس. الشربوت ما في زول بيمشي عليه. التبلدي ذاتو بخلي ليك الزول يمخمخ ليك في المواضيع كدا – لمن تحس بالشاعرية. يوم داك قطعت لي كوز تبلدي ..كتبت لي قصيدة طوالي. كتبت شعر عديل كدا. (وادفقت حاجات – خربشتي حس الشوق – لخبطي درب السوق – ورينا كيف بنروق؟). (شخبطنا في الكراس – حرفا ولا اسمك – عارفين شمار الناس لو شافو هم حرفك – تبقى الكلام واللوم). عشان حركاتهم دي كتبنا حرف من حروف حبوبتك ..عشان ما نجيب ليك الكلام. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). التبلدي خطير. واحد شرب ليه (تبلدي) ودخل امتحان الجغرافيا. اول سؤال كان اجباري قالوا ليه ما هي جنسية زوجة رئيس الصين؟. زولكم قعد يفكر. عرف ليك السؤال فيه خدعة…التبلدي اشتغل. دخل ليك في الاجابة قال ليهم : زوجة رئيس الصين جنسيتها (صينية) لكن زوجها (كوز). اعمل ليكم شنو؟. التبلدي بقى (شربوت). شربوت عديل. واحد مشى يتقدم ليه لي واحدة. اهل البنت جابوا ليه (تبلدي) ..ما عارفنو مريخابي. ابو البنت جاء داخل – قال للولد ان شاءالله خير؟. الولد قال ليه خير وين مع (التبلدي) القدامي دا يا حاج؟ – والله انا جيت طالب يد بنتك ..لكن عشان (التبلدي) القدامي دا ..ح اشوف عداد الكهربة واتخارج. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). واحد صبت عندهم مطرة. لاقى ليه واحد زعلان في المطر. قال ليه تعال هنا ..صعبة (الشقلبة) وإلّا (العنكبة). شبكتونا شقلبة بكري – شقلبة بكري ..لمن عنكبة جاء وراكم (الشقلبة) الما بتعرفوها. اتعنكب ليكم في استادكم. والحاجة البتغيظ عنكبتو دي وهو (اعارة). اخر حاجة. هسع بعد رفض الشكاوي دي …ح تدفعوا غرامة القارورات؟. والله لو دفعتوها يكون ما عندكم دم. ولا بتحسوا. ………. و في رعاية الله وحفظه يغادر سيد البلد. يا الله الهلال يعود من هناك ببطاقة التأهل. مباراة سموحة مباراة ما ساهلة. مباراة صعبة. اعملوا حسابكم وشدوا حيلكم. ما تقصروا مع الناس. الناس هنا بقى ما عندها شغلة غيركم. الهلال وبس. ………. السيدة (ل)…يوم داك في زول شرب لييه تبلدي جلدوه (21) جلدة – دا تبلدي شنو دا؟. وقرّض على كدا.
