بالعربي الكسيح محمد الطيب الأمين خرطوش الموية !! * (الطبع الشين عدو الخجل) .. * ما في زول طبعو شين وبخجل .. * لما تلقي زول ما بخجل طوالى تعرف إنو طبعو شين والعكس صحيح .. * عشان كده النسوان بيقولن ليك : (الشافع ده ما شافع مرقه) .. * ما شافع مرقه يعنى (ما ينفع تسوقو معاك مشوار أو زيارة) .. * بيفضحك .. * شافع المرقه لما تمشي بيت الناس زيارة بيكون قاعد بأدبو .. * لا بجر ملايا ولا بكسر كباية ولا بضرب (مصور) .. * بكون مؤدب .. * من شدة الأدب (الشربات ما بكملو كلو) .. * لكن في شُفع كده ، الواحد يرفع كباية العصير مرة واحدة وينزلها فاضية ويقبل على كباية أمو وكل الكبابي .. * وبعد يكمل شربات الكبابي يقول لست البيت : (يا عمتو أنا عايز زيادة) .. * ده غير إنو ممكن يبوظ (ريموت التلفزيون) ويشيل (الجداعة) يحشرها في (التلاجة) ويعاين للحيطة يشوف صورة سيد البيت معلقة يقوم يقول لأمو : الراجل ده مالو نخرتو كبيرة كده ؟؟ * هسه يا جماعة إتأكد لينا تماما إنو المريخ ده (ما فريق مرقه) .. * والله صحي .. * فريق زي ده يفترض من البلد دي ما يمرق شبر .. * ياخ خليك من الكورة والمستوى الفني .. * أخلاق ما في ؟؟ * إذا كان خلق الإنسان (ضيقا) فهو ربما يحتاج ل(ترزي) حتى يقوم باجراء التوسعة اللازمة .. * ولكن الترزي نفسه سيقف عاجزا إذا طلبت منه توسعة (بنطلون كباية) .. * حسب فلسفة (الترزية) فأن (الكباية) لا يمكن توسعتها .. * وما ظهر به المريخ بالمغرب (كباية) في الإخلاق و(كباية) في المستوى الفني .. * وبما أن المريخ هو (فريق حكومي) نرجو من الحكومة أن تمسك (إبنها الرضيع) حتى لا يفسد علاقتنا بالدول الصديقة .. * اسوأ حاجة في الدنيا دي لما يجي (طفل البيت) يخرب علاقة ناس البيت مع الجيران .. * والله صحي .. * شافع ما يسوى حاجة يقوم يبوظ علاقتكم مع جيرانكم في حاجات أصلا فارغة ساكت .. * والمريخ الذي لم يزل طفلا (يرضع) من (ثدي الحكومة) لن نسمح له أن يخرب علاقتنا مع الأشقاء في الوطن العربي والمحيط الأفريقي .. * المريخ أقل من إنو يخرب علاقتنا مع الأخوة العرب .. * الكورة وقت غلبتكم كان يفترض تخلو ذكرى جميلة .. * كان تخلوا ذكرى أفضل من ذكرت (الدم) .. * حداشر راجل غلبوكم (رجااااااله) كده تقوموا (تشلتوا) الصحفيين والمصورين ؟؟ * ذنبهم شنو ؟؟ * الكورة خليناها .. أخلاق ساي ما في ؟؟ * أنا والله مستغرب في حاجة .. * مستغرب في إنفعال لعيبة المريخ ديل .. * أنا ما عارفهم زعلانين لشنو ؟؟ * يعني كنتوا متوقعين تتأهلوا ولا شنو ؟؟ * غايتو متنا من الضحك والضحك كلتنا .. * أصلا المريخ ده هو من الحاجات البضحكني جدا .. * أكتر (7) حاجات بضحكني (5) هي : محمد هنيدي والمريخ والفاضل سعيد .. *والله صحي .. * مما عرفت المريخ وأنا في حالة ضحك .. * أصلا إحنا عرفنا المريخ بعد كبرنا .. * في حاجتين عرفناهم بعد كبرنا : (المريخ والزواج الجماعي) .. * لما كنا صغار فاكرين إنو الزواج الجماعي (العروس من الحكومة) .. * حسب الجهل كنا فاكرين الحكومة بتلقط بنات عمر (14) سنة وبتدخلهن معسكر مقفول وبعد كل خمسة سنين بيطلعوا البنات ديل لزوم الزواج الجماعي .. * دي كانت نظرتنا للزواج الجماعى .. * ولكن بعد ما كبرنا عرفنا حاجات كتيرة من بينها المريخ والزواج الجماعي .. * وبعدين يا جماعة أهلنا بيقولوا : (الخريف من رشتو) .. * الخريف بتعرفو من أول (رشه) .. * ورشة المريخ كانت معروفة .. * قالوا في عمك جاب (خرطوش الموية) وقعد يضرب ولدو الصغير .. * ضرب الولد ده لما جسمو جاب دم .. * زي المصور المغربي .. * في واحد من الجيران دفر الباب ودخل على عمك .. * قال ليهو : مالك يا زول بتضرب الولد ده كده ؟؟ * قال ليهو : لا ابدا ما في حاجة بس أنا مسافر الليلة العصر والنتائج بكرة .. * نتائج الإمتحان بكرة وهو مسافر الليلة ولذلك ضرب إبنه (مقدما) لانو عارف النتيجة .. * وأسامة ونسي عشان ما عارف النتيجة قام عمل ليهم (نفرة) وهم في الحقيقة كانوا محتاجين لخرطوش موية .. * زي ديل يا أسامة ونسي النفرة ما بتنفع معاهو .. * ديل دايرين خرطوش موية عديل .. * كده دقيقة عليك الله .. * بالذمة إنتو كنتوا متوقعين تتأهلوا ؟؟ * كان عندكم أمل يعني ؟؟ * معقولة ؟؟ * هو الهلال ما وصل المجموعات تجوا تصلوا إنتو ؟؟ * لابسين لي أصفر كده أ تقول (شغالين في التطعيم) .. * وأقول ليكم حاجة .. * مش الهلال طار من دور ال(32) ؟؟ * برضو تصنيف الهلال أفضل منكم على كافة المستويات .. * يعني تأهلكم لدور الترضية زي (العصفورة الدخلت بالشباك ومرقت بالباب) .. * ما عملت ولا حاجة .. * وبعدين يا جماعة أي زول لما يمشي محل بيكون عندو هدف معين .. * يعني هسه أنا لما أمشي (الجوازت) مستحيل أكون داير أطلع ( رخصة) .. * مشيت الجوزات معناها هدفك إنك تطلع جواز .. * المريخ قبل ما يلعب المباراة عمل رحلة ترفيهة وجابوا ناس عنكبة متصورين مع القرود .. * أنا مما شفت الصور دي عرفت إنو المريخ مشى المغرب من أجل النزه والترفيه .. * والله صحي .. * طوالي قنعت من النتيجة .. * من الله خلقني ما لقيت لي فريق بيعمل رحلة ترفيه قبل ما ينجز المهمة التى جاء من أجلها !! * بترفهوا على شنو ؟؟ * على المغطى ولا على الملان شطة ؟؟ * الزول بينجز هدفو بعد داك بيمشي يعمل زيارة لمعالم المدينة .. * لكن الجماعة ديل واضح إنهم مشوا المغرب من أجل الترفيه بينما كانت مباراة المراكش (برنامج مصاحب) .. * عشان كده حصل الحصل .. * وده الوضع الطبيعي للمريخ .. * ودي حاجة لازم تعرفوها .. * كونو السنة الفاتت وصلتوا المربع (صحبة راكب) ده ما معناها ح تصلوا كل عام .. * ما في منطق في الحاجة دي .. * ثم ثانيا .. وللدنيا والزمان .. لو في بطولة الهلال طار منها لازم إنتو تطيروا تقديرا للهلال الذي أتاح لكم فرصة المشاركة ووفر لكم مقعد في الأبطال .. * اليوم قصدت ما أتكلم عن الحكم ولا عن الكوكب ولا عن (البونية) والشلوت) و(العضة) .. * قصدت ما أتكلم عن الحاجات دي على أن أعود لها بالتفصيل الممل إعتبارا من يوم غدا بأذن الله .. * غدا والأيام التالية .. أضحك مع (الإصيفر) .. * غايتو جنس غايتو !! * و..و.. * وتعالوا شوفوا الكنت راجيهو …(طار على يد فريق هابط) ..
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
