بالعربي الكسيح محمد الطيب الأمين معتصم يأكل من طبيخ أسامة والوالى صايم !! * سعادة الوزير (مسك) الاتحاد من يدو البتوجعو .. * والاتحاد ينظر الآن نظرة تسول لجمال الوالى حتى يبعد يد الوزير من الحتة البتوجع معتصم جعفر .. * ولكن جمال الوالى نفسه (مُوجع) ولا يستطيع أن يزيل وجع الآخرين .. * الموضوع ده أكبر من (اللقيمات) ولذلك على معتصم جعفر أن (يضوق هذا الملاح الذي طبخه أسامة ومجدي) .. * سيدخل الوزير التاريخ من أوسع أبوابه إذا خلصنا من هذا الاتحاد وقام بتعيين لجنة لتسيير النشاط بالبلاد .. * إحنا في الهلال ضد التدخل الحكومى ولكننا سنكون سعداء بدخول الحكومة لإيقاف عبث الاتحاد .. * ويا الله مطرة .. * اسوأ (مسكول) هو ذلك الذي يأتي قبل الأفطار بخمسة دقائق أو الذي يأتي بعد الأفطار بسبعة دقائق .. * في ناس كده .. * الواحد يمسكل ليك في الوقت البتكون انت منتظر فيهو الآذان .. * قالوا في واحد قاعد مع زوجتو ، تلفونو رنة مع الآذان .. * قام رد وإتكلم دقيقين وقفل الخط .. * زوجتو قامت تجوط قالت ليهو : انت أصحابك ديل ما بصلوا ولا ما صايمين ولا كفار ؟؟ * قال ليها : ديل ما أصحابي ده أخوك … قالت ليهو يا حليلو بيكون لسه ما آذن عندهم .. * القصة دي بتذكرني إعلام المريخ مع بكري المدينة .. * إعلام المريخ يتعامل مع بكري وفق مقولة : (يا حليلو بيكون لسه ما آذن عندهم) .. * بكري المدينة ليهو زمن (ضيف ثقيل) على تشكيلة المريخ ومع ذلك إعلام المريخ لا يتحدث عنه .. * ومعروف إنو علاقة بكري بالمريخ هى علاقة مالية خالية من الولاء والمحبة .. * ورغم هذا يجدون له العذر وهو يقدم اسوأ المباريات بشعار (الإصيفر) .. * مصعب عمر بيموت ليهم موت في الملعب ومع ذلك بيشتمو ، وبكري المدينة بيلعب على الواقف ومع ذلك بشكرو .. * صدق الشاعر عبد العظيم أكول حينما قال : (الدايرو ليك بتقربو وانت البريدك بتزدري) .. * حاجة تكسف .. * من الذكاء أن يطلب الهلال مباراة ودية مع هلال كادوقلي في الأيام القادمة .. * أو بالأصح أن يطلب هلال كادوقلي مباراة ودية مع الهلال قبل مواجهته للمريخ .. * بيلاتشي قال أنه يحتاج لمباريات ودية وأعتقد أن هلال كادوقلي أيضا يحتاج لمباراة ودية ، فما الذي يمنع أن نلعب معهم وديا خدمة لإعدادنا وخدمة لإعدادهم .. * إذا لعب هلال كادوقلي مع الهلال ثم لعب مع رديف الهلال سيكون في قمة الجاهزية لمواجهة (الإصيفر) .. * نرجو أن يتقدم هلال الجبال بخطاب للهلال ونتمنى أن يوافق الهلال على الطلب .. * ومعسكركم بتاع القاهرة ده يا محسن سيد (بلو وأشربو مويتو) .. * وبالمناسبة .. * أنا شايف لو محسن سيد إتعلم (رص العلامات) على هامش المعسكر ده يكون أحسن .. * أدخل ليك كورس يا محسن على هامش المعسكر فذلك أفضل لك ولهم .. * غايتو أنا شايف كده .. * واى زول طبعا حر في (شوفو) .. * غايتو جنس غايتو !! * خبرة سادومبا الكبيرة تمثلت في تنفيذه لركلة الجزاء بالجهة الشمال لجمال سالم (الخفيف) .. * ساسا إستفاد من قون شيبولا ولعب الكرة لجمال سالم بنفس الزاوية التى سجل فيها شيبولا .. * يبقي هذا هو إعلان وترويج لكل المهاجمين .. الداير يجيب قون في جمال سالم يشوت في الزاوية الشمال .. * شوتو بالشمال وما تنسو الحق الأدبي لشيبولا وسادومبا .. * وتبكو بس .. عين قطرة وعين مس .. * من مفاسد العشرة الأخيرة في رمضان (التلفزيون والواتساب والفيس وشارع النيل) .. * إختصروا هذا (الملاهي) فنحن في رحاب أيام يجود بها الله علينا باليلة خير من ألف شهر .. * الحسنة مضاعفة والخير بابو فاتح وكذلك الجنة فعلينا أن نخلص العبادة والطاعة فيما تبقى من أيام وندعو الله أن يرفع عنا البلاء والغلاء وأن تنعم بلادنا بالخير والسلام والمحبة .. * كما نسأله الشفاء لكل المرضى في كل مكان والرحمة والمغفرة لكل الموتى المسلمين .. * اللهم آميييين .. * من كرامات شهر رمضان المعظم أن مباراة القمة الأخيرة ليس لديها ضحايا وذلك لانها جاءت بعد فترة الشطب والتسجيل .. * لو القمة دى ما جات بعد التسجيلات زي الوقت ده بيكون مصعب عمر داخل غرفة تسجيلات الأهلى العاصمى .. * والله صحي .. * وهذه أول مباراة قمة تمر بدون ضحايا مع إنو الضحايا على قفا من يشيل يا عنكبة .. * عموما .. شهر اطناشر وبعد قمة الدورة الثانية أتوقع أن يشطب المريخ ستة من ضحايا قمة رمضان وخمسة من ضحايا قمة الدورة الثانية المنتظرة بأذن الله .. * يعنى يا مصعب عمر ما تفرح ساكت إنت مشطوب مع وقف التنفيذ .. * ده إسمو الشطب (الآجل) .. * هسه عليكم الله ما في طريقة نلاقي المريخ تاني ؟؟ * شوفو لينا أى مسمي نقابل بيهو المريخ تانى .. * أى مسمي .. * كاس العيد .. * كاس نهاية رمضان .. * كاس عزو .. * كاس دعم متضرري السيول .. * كاس كسوة العيد .. * كاس دعم الكهربا .. * اللهم أي كاس .. * بس نقابل المريخ تانى .. * إن شاء الله كاس بمناسبة قانون الرياضة الجديد .. * ما معقول نقعد كده لحدي نهاية الدورة التانية .. * مريخ زي ده يفترض نقابلو كلو أسبوعين .. * والله صحي .. * ده مريخ ما بتفوت .. * أنا حقيقة في حاجة أتوقعتها لكن المريخ خذلني فيها .. * إتوقعت المريخ يشكو الهلال في (ضيق الملعب) .. * مش بيلاتشي ضيق ملعب الهلال وعمل (حركة بحركتين) ؟؟ * أنا أتوقعت المريخ يشكو في الحتة دي .. * كان ممكن يقولوا ملعب الهلال ناقص وما قانوني .. * لكن نسوا الحاجة دي وإشتكو شيبوب .. * والشكوى اليوم مرت عليها (7) أيام ولا جديد .. * أنا بديكم ستة شهور لشكوى شيبوب .. * ستة شهور كاملة بتكفيكم ولا نزيدها ليكم يا متوكل ؟؟ * أفتكر جمال الوالى عندو قروش ، يعنى بيقدر يدفع قروش الشكوى وتكاليف لوزان .. * لوزان ب(الضاء) ؟؟ * ونركب صافنات ونجيبة (جوامعية) وأصلو الزول بيموت والذكرى تفضل حية .. * و..و.. * وقالوا متألم شوية ياخى بعد الشر عليك …(لكن كمان ما ظريفة تفطر قدامنا) ..
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore