محمد الطيب الأمين أول مرة في حياتي أشوف لي فريق بيلبس (أصفر) الساعة (3) عصراً !!
إن نِسيت ، لا ولن أنسى لحظة تعليمنا (ضرب النار) على هامش معسكر الخدمة الوطنية . * لحظات صعبة عندما تنبطح على الأرض والصدر بارز والأقدام مفتوحة في شكل (8) أو في شكل (7) ما فرقت . * هي خمس طلقات مطلوب منك أن تضربها داخل (التختا) حتى تكون الأول في ضرب النار (الرماية) . * أنا والحمد لله من جملة خمس طلقات ضربت أتنين في (تختتي) والتلاتة سافرن في أعلى قمة الجبل . * طاشن مني وبالتالي (سقطت) . * وكل طلقة طايشة كان يتبعها (عكاز) في نص الضهر من (التعلمجي) الذي يقف خلفنا . * يديك عكاز في نص ضهرك ويقول ليك : (خسرت الدولة طلقة والطلقة دي أغلى منك يا مستجد يا وهم) . * تصارع في (الكِلاش) و(العكاز) . * أتاحت لنا تلك اللحظات معرفة الجيش عن قرب . * عرفنا أن ما يربط الجيش بالوطن (حب) أشرف من حب (قيس للأخت غير الشقيقة ليلى) . * وقد صدق المساعد محمد على في قصيدته الشهيرة (ينضمو فوق ناس الجيش) وهو يقول : البربطنا بيهو الجيش لا منصب ولا مرتب لا مأكل ولا مشرب عشق وطن جوانا اتركب وينضمو فوق ناس الجيش * المساعد محمد على أبدع في هذه القصيدة التي حركت مشاعر كل أهل السودان وقد تألق في طريقة الإلقاء الحماسي . * الجيش عقيدة ، وأعظم ما في عقيدة الجيش إنك تقاتل كلما نادى المندى. * مرة في الجنوب ومرة في الحدود ، مرة في الصيف ومرات في الخريف ، تارة في راجا وأخرى في الفشقة . * هذه هي الوطنية . * الآن الشعب السوداني تفاعل بشكل كبير مع انتصارات الجيش في حدودنا مع أثيوبيا. * الكل سعيد بما يحققه الجيش من انتصارات ونجاحات برغم التحفظات على (فض الإعتصام) . * ولكن تبقى حدود الوطن خط أحمر. * في ثوابت كده ما فيها لعب ومنها : الفشقة وحلايب وشلاتين وكاودا . * وبما أن ذلك كذلك فإن الهلال في تاريخ الحياة السودانية هو مثل جبل مرة ونهر النيل وسد مروي والفشقة. * ولهذا فوز الهلال خارج الديار استقبله الشعب بفرحة تضاهي فرحة إنتصار الجيش بالفشقة. * إنتصار الهلال دوماً هو حدث قومي . * زي إنتصار القوات المسلحة . * الجيش لما ينتصر في كاودا ممكن تسمع (مرا) بتزغرد في مدني . * والهلال لما ينتصر في غانا ممكن تسمع (فتاة) بتزغرد في بابنوسة. * عشان كده نحن بنقول : (الهلال فاز على الاشانتي) و(انيمبا خسر أمام المريخ) . * عرفت ليه؟ * لأنو فوز الهلال افرح السودانيين ، بينما خسارة انيمبا اسعدت المريخاب . * إحساس القومية هذا يجعلني مستغرب في حكاية (شعار) الهلال . * حقيقي مستغرب . * يقول ليك فلان سجل شعار الهلال. * الهلال ده زي النيل الجاري في بطن الخرطوم . * زي الهواء . * ما في حاجة إسمها قانون في الموضوع ده . * ما ينطبق على (النيل) وشجر (الهشاب) و(الهواء) ينطبق على الهلال. * في ثوابت كده أكبر من القانون . * صحيح قالوا الزول داك مسجل الشعار فيما يتعلق بالطواقي والأعلام والشالات فقط . * مسجل العلامات التجارية (شالات طواقي وأعلام) . * لكن برضو ده كلام ميت . * تجدني دائماً اتحاشى الحديث عن قصة شعار الهلال لأنو الموضوع بالنسبة لي عباطة ما أكتر. * والله بحساباتي الهلال ده زي عطبرة والكاملين ونيالا . * ما في زول ممكن يمشي يسجل كوستي باسمو. * لو كنت رئيس الهلال موضوع الشعار ده ما اتفاوض فيهو . * لا بعرف قانون ولا ملكية فكرية. * ملكية فكرية أنت قايل الهلال ده قصيدة كاتبها الحلنقي ولا شنو ؟ * القانون ذاتو لو سمح بالكلام ده يبقى قانون أعرج. * طبعاً ناس المريخ مرتاحين من موضوع الشعار ده . * لو مشيت سجلت شعار (المريخ) بإسمك طوالي هم ح يشتغلوا بإسم (المسالمة) . * لو سجلت (المسالمة) بإسمك ح يشتغلوا بإسم (نجمة فكتوريا) . * والله صحي. * المهم . * وبما إنو إستاد الهلال ماشي مع المريخ مية مية أنا عندي اقتراح. * بقترح تغيروا لون شعاركم . * شيلوا من الأزرق شوية ، أو شيلوا من الأبيض حبة . * اموركم ح تظبط أكتر لو كسرتو الاصفر ده بالأزرق. * اصلو ما ممكن فريق يكون لابس أصفر ولاعب الساعة 3 عصر . * الشمس دي دايرة ألوان هادئة ومريحة للعين . * سخانة وأصفر وكورونا وأحمر . * نحن الأصفر بالأحمر ده خلينا (كبسولات النزلة) عشانو. * كبسولات النزلة بتتكون من (شورت وفانلة) برضو . * الكبسولة من فوق أصفر ومن تحت أحمر. * والتلاتة حبات ما علاج للنزلة . * وما أي نزلة كورونا . * وما أي كورونا نزلة . * غايتو الفرحة الدخلها فينا الهلال السنة دي نستنا أحزان سنين . * الأجواء في الهلال الأيام دي ممكن تخليك تكتب (عمودين في اليوم) . * لو العرف الصحفي بسمح بكتابة عمودين في اليوم داخل الصحيفة لكتبت دون تردد . * أي حاجة في الهلال الأيام دي محفزة للكتابة والفرح . * فريق الكرة ، الجهاز الفني ، نجوم التسجيلات ، لون الدم ، النجيلة ، أبو عاقلة كل شئ يدعو للفرح . * أول أمبارح الحكيم سجل زيارة للسوباط . * كبير بيهني كبير بمناسبة إنتصار الكبير . * عظمة يا هلال . * الله يديم علينا نعمة الأفراح ويهدي النفوس. * ملحوظة : (اعتباراً من أول السنة سأقوم بتغيير إسم عمودي هذا لاسم آخر إن شاء الله) . * ونركب صافنات ونجيبة (جياشية) واصلو الزول بيموت والذكرى تفضل حية . * و..و.. * وعندي ليك سر من زمان عايز أقول ومنكسف …….. (لو ما إستاد الهلال ما كنتوا بتلحقوا مرحلة تلعبوا مع انيمبا) .