بسم الله الرحمن الرحيم في السلك بابكر سلك مدارسنا ومصاريفنا *رسوم المدارس(الخاصة) تدوش *والتعليم القبل المدرسي اجباري *والدولة التعليم المدرسي (الحكومي) ماشغاله بيهو *والتعليم البعد المدرسي مهارات فردية *فما بالك من التعليم القبل المدرسي!!!!! *الامهات بقن يودن شفعن الروضة لاجل شئ سوي الراحة من الازعاج لمدة اربعة ساعات *في رواية اخري تلاتة ساعات *وفي روضات اخري ساعتين ونص *رسوم الطفل الدراسية في روضة متوسطة الحال تلتمية وخمسين مليون في السنة *والسنة كلها اجازات *ياكورونا يا مواكب *تلتمية وخمسين مليون *تقول الطفل بقرأ جراحة *ده غير الفطور والترحيل *وبعد ده كلو لما الطفل يرجع البيت وتسالو ادوكم شنو ياحمودي؟ *يقول ليك ادونا فطور *تلتمية وخمسين مليون وادوك فطور؟ *والفطور شايلو من البيت؟؟؟ *الطفل يجي ماشي الروضة *تلقاهو مشنط *شنطة في الضهر *زمزمية في الكتف اليمين *ميل بوكس علي الكتف الشمال *حذاء رياضي *تشوفو تقول ماشي يحرر حلايب *وبعد ده كلو يقول ليك ادونا شلاتين *اقصد ادونا فطور *والطفل الاستفاد شديييييد *تقول ليهو ادوكم شنو ياحمودي؟ *يقول ليك ادونا *تا تمساح *وتا كلب *وتا كديسة *وتا بقرة *تلتمية مليون وتا كديسة *لكن بصراحة *ايجار مبني الروضة بكم؟ *مواهي المامات كم؟؟؟ *ازعاج الشفع بكم؟؟؟ *تصديق الروضة بكم؟؟؟ *وطفل الروضة داير ورق يشخبط فيهو يوماتي بكم؟ *والصلصال *والالعاب *طوطحانية لو انكسرت *الحداد لو لقي كهربا بلحمها بكم؟؟؟ *يبقي *ربي ماتحرم بيت من الاطفال *وتلتمية ماكتيرة علي براءة تحلم بدنيا فيها سلام ووطن آمن وشعب بحب بعضو *في الروضة حب لايفرق بين لون او عرق او جهة *ياريت في البرلمان يكون الحب كدة *ونرفع القبعات لماما سهام وماما هزار وماما تينة وماما السمحة وماما الشينة *لانو حتي الشنة من زوايا كتيرة بتكون سماحة وروعة *في شنة سمحة سمحة سمحة لمن سمحة *ايها الناس *برغم كل ما(حدس) *يتخرج الطفل في الروضة وهو يتمتع بمهارات عديدة *التعامل مع المجتمع *الثقة بالنفس وفي النفس *بعرف انو في زمن للقراية وزمن للعب *بعرف انو الانسان كائن اجتماعي جدا *بتعلم الاعتماد علي النفس *وممكن يكتشف مواهبو *وعلي اقل تقدير بتعلم كيف يمسك بالقلم *وبتعرف علي الزمن *والزامية الواجب *بعرف الشوق والتحية وادب الاعتذار *التعليم قبل المدرسي مفيد جدا *وليس عبارة عن تلتمية مليون وادونا فطور وتا أرنب *عشان كدة *بننادي بالتعليم قبل المدرسي في كورة القدم *مدارس سنية يتخرج فيها اللاعب مرحلة مرحلة *وعندما يصل لقمة النضج الكروي *يكون بالجد بالجد عمرو عشرين *وتختفي عن منتخبنا قصة اللاعب الدولي البثبتها بي ساقو *وحارس المرمي البطلع غلط *وحانتعلم التمرير من لمسة واحدة *وتوزيع اللياقة *وتنفيذ التكتيكات *نأمل في ذلك *والي ذلك الحين دعونا نستمتع بلاعبينا وهم يجيبون علي سؤالنا *ادوكم شنو؟ *ادونا تا أرنب *ايها الناس *اذا صدقت اخبار تعاقد المريخ مع الاجهزة الفنية *يكون هذا المجلس من رجع من مصر لي اسي اتعاقد مع سبعة اجهزة فنية *ايها الناس *ان تنصروا الله ينصركم *اها *نجي لي شمارات والي الخرتوم *والينا *عرفت منو البقلع في المواكب موبايلاتنا منينا *ولا نجيب المجني عليهم يحكوا لينا؟؟؟؟ سلك كهربا ننساك كيف والكلب قال وبعدين معاك يابلد!!!!!!! والي لقاء
