بسم الله الرحمن الرحيم في السلك ضنب العرب *مستوي المنتخب بمونديال العرب كان مخجلا *بالذات للسودانيين المقيمين بقطر *والسودانيين الذين تكبدوا مشاق السفر لقطر(طبعا اعضاء البعثة الهلامية مامعاهم) *ياخ جقرنا الاكل الكبري خجل للمنتخب *المخجل كان المستوي والاداء *اجدادنا القدماء كان ممكن يقدموا عروض افضل حالا مماقدمه ابو عشرين ورفاقه *قون بجيب قون في روحو!!!!! *ده آخر الزمان زاتو *الهزائم الخماسية والرباعية لم تكن مخجلة بقدر الخجلة من الاداء *ياها دي امارات الخير بامكانياتها *اخدت خمسة والشمس بره *وده في حد ذاتو مامبرر لينا *لكن الواجعني الاداء المتخلف ولعب الدافوري ومستوي اللاعبين الفني *ابجديات *تمرير خاطئ *ولا اظن ان بالبطولة كلها مرر لاعب تمريرتان خاطئتان غير ناس ارنق تنق بتاعننا ديل *كلهم بدون فرز *ياخ لاعب يثبت التمريرة تلاتة مرات *حارس يطلع سااااااي *يرجف كلو تقول طالع من حجر جبرة *رمضان يجيب قون فينا *قون من عمان يخش فينا *تلاته مباريات ولاتصويبة تجاه المرمي *وتقول لي الغربال بتمنمية الف دولار *اريتو لو بالسوداني زي ناس ابو عشرين خمسة وعشرين مليار *بالدولار والبلنت شاتها بالسوداني *ده مالعب دولار *المهم *نحنا طيش البطولة *طيش العرب *العرب العرفو الكورة امس القريبة دي نحنا طيشهم *ونحنا لما لعبنا الكورة كان اسمها التيوة *وهم كانوا مقرقبين بلعبوا عنتر وعبلة في الضلمة *وده كلو لاننا ندمن الخلاف وننسي الاحترافية في ادارة شأننا *هم قيادات الادارة ان يفشلوا الادارة التي تتربع علي الكرسي *ثم تتبدل الادوار *اننا ضنب العرب *تحقيقا لتلك المقولة الشهيرة *اردناكم رأس افريقيا ولكنكم اخترتم ضنب العرب *وياريتنا لو ضنب العرب رياضيا بس *سبحان الله *بقينا ضنب العرب سياسيا *أيا والله *بلد مواطنيها اقل من سكان الحاج يوسف *ويتدخلون في شأننا السياسي كمان *ده غير الشأن الاقتصادي *والدهب الذي ينوبنا منه الضهب والدهشة *فلو كنا نندهش لحالنا الذي صنعناه بايدينا *ماكنا اندهشنا لهم *ولكننا ادمنا ان نفتح خشومنا ونندهش من اي شئ *الا ما اوصلنا اليه وطننا من حال *المنتخب منتخب دولة *لذا وجب علينا ان نجد الدولة اولا ثم نؤسس لها منتخب يتشرف بها قبل ان يشرفها *ولن نجد الدولة طالما نحن نرتضي ان نكون ضنبا لهم *ايها الناس *اتمني ان اعيش لاري موقفا نتعامل فيه بندية لا بدونية *نحنا عندنا القديم وهم لاقديم لهم *والماعندو قديم ماعندو جديد *لاتسقني كأس الحياة بذلة *بل اسقني بالعز كأس الحنظل *كأس الحياة بذلة كجهنم *وجهنم بالعز افضل منزل *ايها الناس *الاشقاء هم من يسندونك عند الشدة *لامن يستقلوك ويستنكحوك ويبتزوك ويتدخلوا في شأنك غصبا عنك *اشقاء زي ديل اخير منهم اولاد الحلة *يبقي نجد العذر لمنتخب الدولة الي ان نجد الدولة *ايها الناس *ان تنصروا الله ينصركم *اها *نجي لي شمارات والي الخرتوم *تعرف يا والينا المكلف علينا *نحن لنا وطن نحن اليه وننتمي ولكن ليست لدينا دولة تعنينا سلك كهربا ننساك كيف والكلب قال ضنب الكلب عمرو ماينعدل والي لقاء
