بابكر سلك كشف المريخ زي كشف البكا *كشفنا بقى جنس كشف *زي كشف البكا *مليااااان ما شاء الله *تلات صفحات *ويمكن لحق كراس ونحن ما عارفين *لكن كمان بقينا ما عارفين منو الموجود في الكشف *زي قصة الزول لمن يمسك كشف البكا ويضربو *وما يسلم الكشف لأهل الوجعة عشان يعرفوا منو الساهم وبي كم *الزول البضرب الكشف بدسو *ويجيب ليهو وريقة كده فيها لوحين تلج وملح ورجلة *الرجلة دي في البكيات أساسية *زي الفاتحة *في بكا *في فاتحة *وفي رجلة *غايتو كشفنا جايط *لدرجة ممكن يجي لاعب يسأل أنا اسمي مكتوب؟؟؟؟ *طيب *ده غير المعلقين في السيستم *سيستم زي شنكل الجزارة *معلقين فيهو خمسين *لكن بي كشفنا ده *سنعيد ألق المريخ *ونلعب أربع مباريات في أربع مدن وفي نفس التوقيت *خمسين لاعب ياخ *كلو حداشر في مدينة بي أربعة وأربعين *فضل ستة *كلو مدينة احتياطي واحد *فضل اتنين *نوزعهم واحد مع التشكيلة الفيها حمزة عشان بتعوق *وواحد نوقفو قون مع القون الواقف *لأنو قونا القديم ده القون كبير عليهو براهو *أيها الناس *فكرة تصدي الأقطاب لتأهيل الاستاد فكرة رائعة *لكن بصراحة *لو دايرين تأهيل من أمو وعلى أصولو *ويحل المشكلة حل نهائي *ويمرقنا من عيوب التربة والمنطقة والموية السطحية *القصة دي الأقطاب براهم ما بقدروا عليها *لازم كل أمة المريخ تشارك وبقوة *بس يعفونا من قصة التطوع في الشغل *ويتجهوا لينا على الشركات المتخصصة *صيانة استاد المريخ وهو قابع على بركة الماء هذه *لا تكون ناجعة وأخيرة *إلا إذا فصلنا الاستاد عن التربة الحولينو *نحن فصلنا الجنوب *لو دايرين نفصل الاستاد صدقوني *أما لو دايرنها مؤقتة سراميك في بيت جالوص *يبقى حا نصين العمر كلو *ويبقى الاستاد معلقا مع اللاعبين على السيستم *لتيق ما بنفع *بجيب الوقيع وزعميط النجيلة *نقعد نصبغ ما بنفع *لأنو الصبغة بجيها يوم ما بتلقى غير التراب والصبغة ما بتمسك في التراب *أيها الناس *إن تنصروا الله ينصركم *أها *نجي لي شمارات والي الخرتوم *والينا المكلف علينا *رمضان مشى يا أخينا *تفتكر العيد ما عيدين ببقى لينا؟؟؟؟ سلك كهربا ننساك كيف والكلب قال لو عيدتوا عيد واحد احمدوا الله وإلى لقاء