*شفت لي صورة لمجموعة من المحترفين في صالة الوصول *قلت حولينا وما علينا *وإن كان لابد *إن شاء الله أبو "نضارة نظر" ده ما يكون جايينا *فقد يكون من استجلبه جابو على أساس أن الطشاش في بلد العمى شوف *وطبعا نحن نعيش قمة فقدان البصر، والبصيرة في أحايين كتيرة *فعلا بلد العمى *ما دام السماسرة وبمساعدة الجماجرة بجيبوا للبلد دي سنويا محترفين ليدو ما بقدروا يلعبوا *محترف لابس نضارة نظر؟؟؟؟ *ما غريبة *قبل كده جبنا محترف عندو بواسير *ومرة في واحد رجعناهو على أساس عندو كبد وبائي *والغريبة في نفس الموسم سجلنا واحد سعران *والهلال جاب واحد أظنو عندو جدري القرود *الكورة كلها يتحكه *لكن أبو نضارة ده سألتكم بالله ختونا ليهو *إضاءة استاداتنا النظرو ستة على ستة ما بشوف *تجيبوا لينا أعمش؟؟؟؟ *ختونا الطشاش يرحمكم الله *وعلى السماسرة البحث عن حتة تانية ياكلوا منها *السماسرة ديل ما كفاهم شغل تذاكر البصات في العيد؟؟؟ *تذكرة بسبعة *تلقى المكتب قافل والبص فاضي والتذاكر عند سمسار شانق طاقيتو *بخمسطاشر *يعني البطلع بيهو السمسار سيد البص مابطلع بيهو *وده السبب الحقيقي في انهيار البلد دي *السمسرة *من ينتج لا بستفيد قدر السمسار *كيلو الطماطم مثلا يصل اتنين مليون *يطلع من المزارع بي ميه وعشرة *قول العتالة شالوا خمسة *الدفار الرحل شال في الكيلو عشرة (منها أربعة لسمسار الشحن المسمي كومسنجي) *يصل سوق بحري التكلفة مية خمسة وعشرين للكيلو *يدخلوا السماسرة *يوصلوهوا مليون وتسعمائة للكيلو *الزول البفرش وبقيل في الشمس يخت مية يطلع الكيلو للمستهلك اتنين مليون *المزارع شال مية وعشرة فيها عماله وجاز للري وكراتين للتعبئة *الدفار شال عشرة مخصوم منها حق السماسرة *العتالة خمسة *البفرش خت مية *يعني مجمل التكلفة بأرباح الدفار والبفرش والبعتل والبزرع بطلع الكيلو بميتين خمسة وعشرين *بصل المستهلك بألفين *الفرق مليون وسبعمائة وخمسين في الكيلو *ده بمشي للسمسار *عرفتوا البلد دي بالعها منو؟ *عليكم الله أبو نضارة ده ختونا ليهو *المهم *الخرطوم اشتكى *وقبلو بشهور الأمل اشتكى *وبسأل أهل المريخ *إنتوا راجين الاتحاد؟؟؟ *راجيين ناس معتصم وأسامة وهلم جر ينصفوا الخرطوم والأمل ؟؟؟؟ *عندكم أمل ؟؟؟؟ *كان راجين الشكوى دي *أخير تسجلوا أبو نضارة *طشاش أخير من عمى *أيها الناس *إن تنصروا الله ينصركم *أها *نجي لي شمارات والي الخرتوم *كان شفت يا والينا *البلد كلها قايمة بعصيها وسكاكينها *ملعون أبو الفكه الفتنة فينا سلك كهربا ننساك كيف والكلب قال للمواكب بجوا بدري قبل الموكب بي ست ساعات ولفض الاشتباكات بتأخروا….. وإلى لقاء.
