دق الدلجة محمد عبد الماجد نحن بنخاف من (صلاح الجزولي) يطلع لينا (جوليام) الموضوع بتاع الدقيقة السادسة عاوز ليه اخصائي (مخ واعصاب). وصلعة. ونضارة قراية. عاوز ليه زول يكون متفرغ عديل كدا للمخ والاعصاب. يكون ما عندو اي شغلة غير (المخ والاعصاب). حافظ ليك الاعصاب دي عصبة – عصبة. المخ يفكو قدامك زي الساعة. اقول ليكم شيء. تمشوا (الطاحونة) طوالي. تشوفوا عمكم (عثمان ود الاريل) شغال وإلّا ما شغال؟. الموضوع كمان جاب ليه (طاحونة). مالك عاوز تصعّب القضية؟. عليك الله اعفينا من موضوع (الطاحونة) دا. ولا فايقين لي كلام زي دا. هو في زول عاقل في الزمن دا بيشيل ليه (عيش) وبمشي بيه على (طاحونة). الفائق منو؟. في (طاحونة) في الزمن النحن فيه دا. طاحونة شنو كمان؟. عاوزين اخصائي (مخ واعصاب) يكون خبرة كمان. عشان يشوف الحاصل شنو؟. في جماعة اعصابهم ضربت. شوفوا لينا اخصائي (مخ واعصاب). سريع. انا بتكلم جد. قالوا لي ناس ضفر وقت وصلوا تونس قالوا ليهم جوليام جاب ليه قون من الدقيقة السادسة. قالوا نحن لو عارفين الكلام دا من الخرطوم ما كنا اتحركنا. ولا بنجازف. ولا بنكضب. كمان شن قدرنا على الموضوع دا. نحن بنخاف من (صلاح الجزولي) يطلع لينا (جوليام). ايه العظمة دي؟. ايه الابه دي؟. ناس (بلة جابر) القعدة غلبتهم في تونس. عرفها (عنكبة). مرق منها (عنكبة). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (كلتوم بنت الزردية) قالت بعد الكلام دا (امير كمال) ما بقعد ليكم. ولا بكضب. لو ما لقيتوا ليكم اخصائي (مخ واعصاب) شوفوا ليكم (استاذ جغرافيا). استاذ الجغرافيا ممكن يقوم بالواجب. استاذ جغرافيا بقضي الشغلة. اساتذة الجغرافيا قاعدين يتشوبروا. اصلو ما بقصروا. جوليام دا قالوا بجيب قونو من الدقيقة السادسة. مستعجل شديد. ولا فاضي للركنيات. ولا بعرف حاجة اسمها مخالفة برة الخط. بجيب قونو من بدري. طبعا ما بستوعبوا لينا الكلام دا بالساهل. شوفوا لينا اخصائي جراحة. خيلنا بتاع المخ والاعصاب. خلينا استاذ الجغرافيا. عليكم الله هو لو ما ساي ..استاذ الجغرافيا عاوز يعمل شنو لي ناس علي جعفر. يقول ليهم شرق…يمشوا غرب. يقول ليهم شمال .يمشوا جنوب. شوفوا لينا بتاع جراحة…ان شاءالله خريج تربية. ما في مشكلة. كلهم شغالين كدا. عشان نقعد معاه…ويشرح لينا موضوع الدقيقة السادسة دي من بدري. عاوزين نفهم. عاوزين نعرف الحاصل شنو؟. ممكن ناس بلة جابر دي يروحو فيها. وجيبوا ليكم (عجور). كمان جابت ليها (عجور). الموضوع كبر اوي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (العجور) من رمضان يقرب بيطير السما. اقول ليكم حاجة عاوزين لينا (اخصائي باطينة). اسهل اخصائي الباطنية. احسن نكون معاكم واضحين. قون جوليام دا قالوا بعمل (قبضة). سفوا ليكم (حلبة). واشربوا ليكم (حرجل). اغلوه كويس. وقبل النوم اشربوه. قون الدقيقة السادسة دا – اصلو ما بنفوتو ساكت. كمان جابت ليها (حرجل). دا الموضوع كبر اوي اوي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (الحرجل) دا والله ما في ليه داعي. خلاص ممكن نعفيكم..من اخصائي المخ والاعصاب. استاذ جغرافيا ذاتو ما عاوزنو. ولا اخصائي جراحة. ولا باطينة. ولا بنقول اخصائي اذن وانف وحنجرة. كل الحاجات دي ..بنعفيكم منها. بس شوفوا لينا (ركشة). ركشة شنو كمان؟. كمان جابت ليها (ركشة). ماشى وين انت؟. قالوا ليك (جوليام)..من اول لمسة. من اول هبشة. من الدقيقة السادسة ..جاب قونو. وفي (النجم التونسي) كمان. يعني الزول دا ناس الخرطوم الوطني ومريخ الفاشر والاهلي شندي من (التسخينة) بجيب فيهم تلاتة. ولا بنتظر الدقيقة السادسة. جوليام دا زي الزول البيعقد من (قولة الخير). من فتح الخشم. يمشوا للتعارف ..يقولوا ليك عقدوا. الولد طلع مننا. وواحد من الجماعة الكبار عشان يصلّح الموضوع ..يقوم يقول ليك طلعنا اهل. انتوا (خليفة ود التلح) ببقى ليكم شنو؟. واحد من اهل العريس يقول الزول دا في الحسبة عمنا. واحد من اهل العروس يقول (خليفة ود التلح) طول ما هو عمكم – نحن نبقى ولاد اعم لزم. شوفوا ليكم (ماذون) قريب. يقوموا في خمسة دقائق كدا يجيبوا ليهم (ماذون). الحكاية مرتبة من بدري. هسع (جوليام) عمل نفس الحكاية. كنا فاكرنو غريب. وكنا قايلنو عاوز ليه فترة عشان يتأقلم …ويشيل (كيس الخضار) وينزل السوق. طبعا العريس وقت يكون جديد ..سنة كاملة ما بمشي على السوق. سنة كاملة ما بدخل ايدو في جيبو. بعد سنة بلزوه. بعد سنة بدفروه دفرة على السوق. اول مرة بنفعل يجيب ليه كيلو لحمة وبطيخة وموز. تانى مرة بعصّر على ربع الكيلو. والعدس. والقرع. كمان جابت ليها (قرع). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (القرع) دا اصلو ما كان في ليه داعي في (العمود) دا. القرع مالو؟. القرع في رمضان بتفتشو فتيش. الواحد فيكم من الساعة 11 يقول ليك نفسي في (قرع). عشان الموضوع ما يبقى ليكم صعب. شيلوا غارزيتو. وشيلوا محسن سيد. وشيلوا علي جعفر. وشيلوا الريح علي (اصلو قاعد ساكت). وشيلوا ضفر. وشيلوا بلة. وشيلوا الوسط كلو. قون الدقيقة السادسة دا لا بقدروا عليه جماعتكم ديل ولا حاجة. ولا عندهم استطاعة. انا يا دوب عرفت ليه المريخ كان خايف من معسكر تونس. عرفت السبب. الناس ديل ما بقعدوا مع (جوليام) في بلد واحدة. الله شافكم في المجموعات. لو وقعتوا معانا بي (فسلكم) دا في مجموعة واحدة ..جوليام دا كان كلو تلاتة منكم طفشهم على بلد. ولا بقعدوا. ولا بيستحملوا. دي حالة احسن منها (العدس). كمان جابت ليها عدس. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (الشيخ ود الطيب) قال ليكم جوليام ما مقتنع بالرقم الوطني بتاع جمال سالم. غيروا ليه الرقم. عشان يقدر يتفاهم معاهو. …………. و عاوزين مباريات ودية قوية تاني في تونس. من النجم وانت ماشي فوق. طبعا الترجي التونسي اتراجع شديد. وبقى ما عندو اي اثر. ما عندو اي وجود. بطل الدوري في تونس الافريقي. والوصيف النجم. وين الترجي؟. قلنا ليكم الترجي انتهى قعدتوا تغالطوا في الناس. السنة كلها تغالطوا. يا حليل الترجي. بقى يلعب في الكونفدرالية. يا ريت الهلال يلعب مباراة افريقية مع احد الفرق الافريقية القوية…التى تشابه كورة مازمبي. عاوزين مباراة ودية في الخرطوم. عشان الناس تشوف ناس جوليام..والشعلة. حالتها دي بدون (اندرزينهو). اعملوا ليكم مباراة اعدادية ودية في الخرطوم. خلوا جمهور الهلال يبعث روحه في المحترفين. عشان ناس جوليام يفهموا حاجة. عشان الموضوع يقع ليهم. من حق الجمهور ..ان يحكم على فريقه. وان يتفرج على الهلال. لا بد من ان يلعب الهلال اكبر عدد من المباريات قبل مباراة مازمبي. الوقفة بتأثر في المستوى. جميل ان الهلال سوف يلعب امام الاهلي شندي في الممتاز. وسوف يلعب امام الامل عطبرة. ومباراة اخرى في الممتاز قبل مباراة مازمبي. لكن قبل الكلام دا ..عاوزين مباراة اعدادية مع فريق افريقي. ان شاءالله مع سان جورج الاثيوبي. ……….. السيدة (ل)..يعني اعتذار (ساندرا) دي انتي اقتنعتي بيها. وقرّض على كدا.
