بابكر سلك سيد البنلت *فرح الإخوة الأهلة بالممتاز فرحا محليا كالعادة *يدركون جيدا أنه مجال فرحهم الوحيد *تسعين سنة وأفراحهم محلية *الصيوان في خشم الباب الناس خلتو *الفرح بقى صالات يا عمك *وناس محمد عبد الماجد خيمهم تتطاقش *وتقرأ علي الصيوان *صيوانات ود الحلة للأفراح والأتراح *ولما رمضان يجي *والبيت يبقى بيت بكا *بجيبوا نفس الصيوان *مش مكتوب صيوانات ود الحلة للأفراح والأتراح؟ *أها رمضان جا والأتراح جات ونفس الصيوان *المحلي *ياخ الناس بقوا ختان أنجالهم بعملوه في صالة *الأهلة لي أسي محلي وخشم البيت *والمحلي ذاتو أريتو كان عرق جبين *أهلي شندي اتاكل في بنلتي والشمس بره *شوف زي أهلي شندي في كم *وفي كم نقطة جاتهم بالطريقة دي *وشوف في كم بنلتي خيالي حسم ليهم كور *وبالطريقة دي جات كم نقطة؟؟؟ *هو بي ده كلو الفرق تلات نقاط *يعني بدون ده كان الحال يكون كيف؟ *عشان كده لما قابلتهم راجعين من الجبل *وشايلين معاهم كاس الود الغاني مهاجم الساحل *وبهتفوا سيد البلد *قلت ليهم سيد البنلت *المهم *الزول بعد أدوهو الكاس ورجع بيتهم *قال خلاس الدوري انتهى الننقض المشاط *ينقض وينقض وينقض *جوهوا ناس الاتحاد ومعاهم بوليس *قالوا ليهو أدينا كاس الزول عامل أقوانك الكلها ملح وبنلتيات دي *يا تدينا يا تملك جنائي *والكأس بات في بلدا طيرها غراب *بالله ده اتحاد ده؟؟؟ *الحصل ده مفروض تكون عقوبتو عدم ممارسة أي عمل إداري رياضي مدى الحياة لي ناس الاتحاد وجيرانهم في الحلة *تخلوا الزول ينقض مشاطو علي السراب؟؟؟ *أسي تاني يمشط ولا كيف؟؟؟ *زول مشط البيضاء مع الزرقاء بعد خرف أقصد تعب *تاني يلمهم كيفن عاد!!!!! *المهم *سيد البلنت ليس مبررا لفقداننا لأسهل بطولة ممتاز *مهما فعل الحكام وأكرموا سيد البلنت *نحن فرطنا في النقاط ليه؟؟؟ *عذر مافي *معسكر إعدادي مصري أهلاوي شهرين *لاعبين ومشجعين وطمبارين وأهل المريخ ورموزه ومدرب تجربة شهرين وبعدو مدرب إنجليزي يا مرسي ثم إبراهومة وحيدا شهرين *الناقصكم شنو؟؟؟ *ده غير دورة كااااملة لاعبنها بمية أربعة وخمسين لاعب. *لاعب ينطح لاعبا *ونطلع مدرنين مع فرق معسكر خدمة إلزامية ما عملتو *عذر مافي *أيها الناس *لون الدم الجوه عروقك أحمر *ليه تستنكر وليه تتنكر؟؟؟؟؟ *أيها الناس *إن تنصروا الله ينصركم *أها *نجي لي شمارات والي الخرتوم *والينا المكلف علينا *ماشي معانا الجنينة؟ سلك كهربا ننساك كيف والكلب قال جنينة وسيدها غايب ياجنائن وإلى لقاء.
